قازاقستان مەن قىتاي شەكاراسىندا جۇرگىزۋشىسىز جۇك كولىكتەرى قاتىنايتىن جاڭا جۇيە ىسكە قوسىلدى. بۇل – «باقتى» – «پوكيتۋ» شەكارالىق وتكىزۋ بەكەتىندە جۇزەگە اسىرىلىپ جاتقان «اقىلدى كەدەن» پيلوتتىق جوباسىنىڭ ناتيجەسى. ەندى جۇك كولىكتەرى شەكارانى اۆتوماتتى تۇردە, ياعني جۇرگىزۋشىسىز كەسىپ وتەتىن بولادى, دەپ جازادى Egemen.kz.
مەملەكەتتىك كىرىستەر كوميتەتىنىڭ حابارلاۋىنشا, جوبا كەدەندىك راسىمدەردى جەڭىلدەتۋگە, ادامي فاكتوردى ازايتۋعا جانە تاۋار اينالىمىن جەدەلدەتۋگە باعىتتالعان. ەكى ەل اراسىندا بىرىڭعاي ەلەكتروندى دەكلاراتسيا ەنگىزىلىپ, بارلىق قۇجاتتار تسيفرلىق فورماتتا راسىمدەلەدى. جۇك كولىكتەرىنىڭ قوزعالىسى تاۋلىك بويى توقتاماي جۇرەدى, ال باقىلاۋ مەن باعىتتى قاداعالاۋ ارنايى اۆتوماتتاندىرىلعان جۇيەلەر ارقىلى ىسكە اسادى.
وسى جوبادان كۇتىلەتىن ناتيجەلەر مىناداي: جۇك اعىنى جىلىنا 10 ميلليون تونناعا دەيىن ۇلعايادى; كەدەندىك راسىمدەۋ ۋاقىتى مەن قارجىلىق شىعىندار ازايادى; شەكارا ماڭىندا لوگيستيكالىق ورتالىقتار داميدى; اۋىل شارۋاشىلىعى ونىمدەرىن قىتايعا ەكسپورتتاۋ جەڭىلدەيدى.
بۇل باستاما مەملەكەتتىك كىرىستەر كوميتەتىنىڭ توراعاسى جاندوس دۇيسەمبيەۆ پەن قىتايدىڭ تاچەن قالالىق پارتيا كوميتەتىنىڭ حاتشىسى چجي سيانۆەي اراسىنداعى رەسمي كەزدەسۋ ناتيجەسىندە قولعا الىندى. كەزدەسۋ بارىسىندا ەكى تاراپ ءوزارا ىنتىماقتاستىق تۋرالى مەموراندۋمعا قول قويدى.
ايتا كەتەيىك, وسىعان دەيىن قازاقستان مەن قىتاي اراسىندا جاڭا تەمىرجول ءدالىزىن اشۋ ماسەلەسى دە تالقىلانعان بولاتىن.