تورعايدا الاش قايراتكەرى مىرجاقىپ دۋلات ۇلىنىڭ 140 جىلدىق مەرەيتويىنا ارنالعان «جۇرەگىمنىڭ ءدۇرسىلى – تورعاي» اتتى ەتنو-رەاليتي جوباسى اياسىنداعى جارىستار ءوتتى.
اتالعان ءىس-شارا بارىسىندا وقۋشىلار مەن ستۋدەنتتەر, مەملەكەتتىك قىزمەتشىلەر, ءار سالادا ەڭبەك ەتىپ جۇرگەن جۇمىسشى جاستار ۇلتتىق سپورت پەن ۇلتتىق ويىن تۇرلەرىنەن سايىسقا ءتۇستى.
جارىستىڭ العاشقى كۇنى اۋەسقوي سپورتشىلار ساداق تارتىپ مەرگەندىك قابىلەتتەرىن سىناپ كوردى. سونداي-اق زياتكەرلىك ويىنعا قاتىسىپ, ءبىلىم مەن وي باسەكەسىنە ءتۇستى. اسىرەسە وسى كۇنگى ۆولەيبولشىلار جارىسى اسا تارتىستى ءوتتى.
ءىس-شارانىڭ ۇيلەستىرۋشىسى مارعۇلان باكىردىڭ ايتۋىنشا, باستى ماقسات – اۋىل جاستارىنىڭ باسىن قوساتىن ءارى ۇلتتىق قۇندىلىقتاردى ناسيحاتتايتىن وڭىرلىك جوبا قالىپتاستىرۋ, وسى ارقىلى وسكەلەڭ ۇرپاقتى سالاماتتى ءومىر سالتىنا شاقىرۋ.
ەتنو-رەاليتي جوباسىنىڭ ەكىنشى كۇنى بالۋاندار بەلدەسۋى باستالىپ, كورەرمەن جارتى كۇن بويى بوز كىلەمنىڭ ۇستىنەن قىزىق اۋلادى. ءتۇس اۋا قوي كوتەرۋ, ارقان تارتىس ءتارىزدى ۇلتتىق ويىندارعا كەزەك بەرىلدى. مۇنىڭ سوڭى اۋدان ەرىكتىلەرىنىڭ «تازالىقتى وزىڭنەن باستا» ەكولوگيالىق اكتسياسىنا ۇلاستى.
اۋىل جاستارىن ءبىر سەرپىلتكەن ءىس-شارا سوڭىندا جارىس جەڭىمپازدارى ماراپاتتالىپ, كوپشىلىك اۋدان, وبلىس كولەمىندە ونەر كورسەتىپ جۇرگەن دارىندى ءانشى, كۇيشىلەردىڭ كونتسەرتىن تاماشالادى.
قوستاناي وبلىسى