تالدىقورعانداعى ءىلياس جانسۇگىروۆ اتىنداعى جەتىسۋ ۋنيۆەرسيتەتىندە يتاليانىڭ ماركە پوليتەحنيكالىق ۋنيۆەرسيتەتىنىڭ فيليالى رەسمي اشىلدى. شاراعا جەتىسۋ وبلىسىنىڭ اكىمى بەيبىت يساباەۆ, عىلىم جانە جوعارى ءبىلىم ءمينيسترى ساياسات نۇربەك جانە يتاليانىڭ قازاقستانداعى ەلشىسى انتونەللو دە ريۋ قاتىستى, دەپ حابارلايدى Egemen.kz.
فيليال مەملەكەت باسشىسىنىڭ تاپسىرماسىنا سايكەس اگرارلىق باعىتتا «اگرونوميا – اۋىل شارۋاشىلىعى عىلىمدارى مەن تەحنولوگيالارى» قوسديپلومدى باعدارلاماسىن جۇزەگە اسىرۋدا. العاشقى كەزەڭدە وبلىس اكىمدىگى 14 گرانت ءبولدى. ستۋدەنتتەرگە شەتەلدىك پروفەسسورلار ءدارىس وقيدى, زاماناۋي زەرتحانالاردا تاجىريبە جۇرگىزىلەدى. وقۋدى تامامداعان تۇلەكتەر قازاقستاندىق جانە يتاليالىق ديپلوم الىپ شىعادى.
«جەتىسۋ – اگرارلىق ايماق. سوندىقتان اۋىل شارۋاشىلىعى عىلىمىن دامىتاتىن, ەۋروپالىق تاجىريبەسى بار ماماندار دايارلاۋ – ۋاقىت تالابى. بۇل باستاما اۋىلعا ءبىلىم مەن عىلىمدى اكەلەدى», – دەيدى وبلىس اكىمى بەيبىت يساباەۆ.
بولاشاقتا تاعام ينجەنەرياسى, تۋريزم, ەكونوميكا جانە تسيفرلىق تەحنولوگيالار باعىتىندا دا جاڭا باعدارلامالار اشىلماق.