«ۇلتتىق اقپاراتتىق تەحنولوگيالار» اق 2025 جىلعى 19 شىلدە كۇنى جوسپارلى تەحنيكالىق جۇمىستار جۇرگىزىلەتىنىن حابارلادى. جوندەۋ جۇمىستارى تۇنگى 02:00-دەن تاڭعى 08:00-گە دەيىن جالعاسادى. بۇل كەزەڭ ازاماتتاردىڭ ونلاين بەلسەندىلىگى تومەن ۋاقىتقا سايكەس تاڭدالىپ, قولايسىزدىقتاردى بارىنشا ازايتۋ كوزدەلىپ وتىر, دەپ جازادى Egemen.kz.
اتالعان ۋاقىتتا كەلەسى ەلەكتروندىق سەرۆيستەر ۋاقىتشا جۇمىس ىستەمەيدى:
• eGov.kz پورتالى مەن eGov mobile قوسىمشاسى (سونىڭ ىشىندە «تسيفرلىق قۇجاتتار» سەرۆيسى);
• e-Otinish جانە E-license پورتالدارى, «اشىق ۇكىمەت» پلاتفورماسى;
• قر ۇلتتىق كۋالاندىرۋشى ورتالىعىنىڭ (نۋتس رك) قىزمەتتەرى;
• «ۇات» اق سۇيەمەلدەيتىن وزگە دە جوبالار;
• ەلەكتروندىق ۇكىمەت ءشليۋزى ارقىلى ينتەگراتسيالانعان بانكتەر مەن باسقا جۇيەلەردىڭ مەملەكەتتىك قىزمەت كورسەتۋ سەرۆيستەرى.
رەسمي مالىمدەمەدە ازاماتتارعا تەحنيكالىق ءۇزىلىس كەزىندە قاجەت بولۋى مۇمكىن قۇجاتتاردىڭ تۇپنۇسقالارىن الدىن الا دايىنداپ, ماڭىزدى وپەراتسيالاردى جوسپارلانعان مەرزىمنەن بۇرىن اياقتاۋ ۇسىنىلعان.