وتكەن سەنبىدە «قازاق ەلى» مونۋمەنتى الدىنداعى الاڭدا استانا قالاسىنىڭ اكىمى ادىلبەك جاقسىبەكوۆ ۇلتتىق بىرىڭعاي تەستىلەۋدىڭ ناتيجەسى بويىنشا ءوز بىلىمدەرىن دالەلدەگەن ەلوردا تۇلەكتەرىنە «التىن بەلگى» توسبەلگىلەرىن تابىستادى.
ءداستۇرلى التىن بەلگى توسبەلگىلەرىن تابىستاۋ راسىمىنە قازاقستان رەسپۋبليكاسى پارلامەنتىنىڭ دەپۋتاتتارى, قالالىق ءماسليحات دەپۋتاتتارى, ءبىلىم جانە عىلىم مينيسترلىگىنىڭ وكىلدەرى قاتىستى. اكىم مەكتەپ ءبىتىرۋشىلەردى ۇلكەن ءومىر ساپارىنا باستاعان اتاۋلى كۇنمەن جانە بىلىمدەرىن راستايتىن العاشقى قۇجاتتى الۋلارىمەن قۇتتىقتادى. قالا باسشىسى, سونداي-اق, بيىل التىن بەلگى يەگەرلەرىنىڭ سانى 84-تەن 111 تۇلەككە دەيىن وسكەنىن اتاپ كورسەتتى.
استانا قالاسىندا بيىل ۇلتتىق بىرىڭعاي تەستىلەۋگە 3399 ءتۇلەك قاتىستى. ولاردىڭ 111-ءى
التىن بەلگى يەگەرى اتاندى. ايتا كەتەيىك, №59 ورتا مەكتەپتىڭ تۇلەگى ريانا مۇستافينا ۇبت قورىتىندىسى بويىنشا 125 بالعا قول جەتكىزدى.
سونىمەن قاتار, №10 جانە №70 ورتا مەكتەپتەرىنىڭ ەكى تۇلەگى 124 بالل ەنشىلەدى. ۇبت قورىتىندىسى بويىنشا استانا قالاسى بويىنشا ورتاشا كورسەتكىش 86,26 باللدى قۇرادى. 2015 جىلى ەلوردا العاشقى رەت ۇبت-نىڭ كومپوزيتتىك يندەكسى بويىنشا ەلىمىزدىڭ باسقا ايماقتارىنىڭ اراسىندا ءبىرىنشى ورىندى يەلەندى.
ادىلبەك جاقسىبەكوۆ جىلدار بويى وقۋشىلارعا ساپالى ءبىلىم, سانالى تاربيە بەرگەن اتا-انالار مەن مۇعالىمدەرگە العىس ءبىلدىردى.
– ەلوردادا ءبىلىم دەڭگەيى جىلدان-جىلعا ارتىپ كەلە جاتقانى قۋانىشتى جايت. استانا ءبىلىم ساپاسى بويىنشا ەلىمىزدە ءبىرىنشى ورىندا تۇر, – دەدى اكىم.
سونىمەن قاتار, قالا باسشىسى ەلىمىزدە 2011-2020 جىلدارعا ارنالعان ءبىلىم سالاسىن دامىتۋدىڭ مەملەكەتتىك باعدارلاماسى ويداعىداي جۇزەگە اسىرىلىپ جاتقانىن اتاپ ءوتتى. ونىڭ پىكىرىنشە, جاقىندا عانا ءبىلىم جانە عىلىم مينيسترلىگى مەن استانا قالاسىنىڭ اكىمدىگى اراسىندا بەكىتىلگەن 2015-2017 جىلدارعا ارنالعان ءبىلىم جۇيەسىن جەتىلدىرۋگە باعىتتالعان مەموراندۋم دا قالامىزدا ءبىلىم ساپاسىن ارتتىرۋعا سەپتىگىن تيگىزبەك.
– استانادا ءبىلىم سالاسىنىڭ دامۋىنا ينفراقۇرىلىمدىق دامۋ جاعدايى دا وڭ اسەر ەتەدى. 17 جىلدىڭ ىشىندە ەلوردادا 44 مەكتەپ سالىندى. سونىمەن قاتار, بيىل 5075 ورىنعا ەسەپتەلگەن جالپى ءبىلىم بەرەتىن 5 مەكتەپ پەن 1050 ورىندىق مەكتەپكە قوسىمشا عيمارات سالىنباق, – دەدى ەلوردا باسشىسى.
اكىمنىڭ اتاپ وتۋىنشە, ەلىمىزدە ءبىلىم سالاسىن دامىتۋعا مەملەكەت باسشىسى ەرەكشە نازار اۋدارادى. بۇگىنگى كۇننىڭ وزىندە-اق وڭ ناتيجەلەردى بايقاۋعا بولادى. ۇستىمىزدەگى جىلدىڭ قورىتىندىسى بويىنشا 399 وقۋشى حالىقارالىق وليمپيادالار مەن عىلىمي جارىستارعا قاتىستى, سونىڭ ىشىندە 238-ءى مەدالدارمەن ماراپاتتالدى.
– بۇگىندە ەلوردادا ەلىمىزدەگى الدىڭعى قاتارلى جوعارى وقۋ ورىندارى ورنالاسقان, ولاردىڭ ەسىكتەرى سىزدەر ءۇشىن ءاردايىم اشىق جانە بۇل مەكەمەلەردە وتاندىق جانە شەتەلدىك بىلىكتى ماماندار جۇمىس ىستەيدى, – دەدى اكىم.
سۋرەتتەردە: كەشتەن كورىنىستەر.
جىلقىباي جاعىپار ۇلى,
«ەگەمەن قازاقستان».
سۋرەتتەردى تۇسىرگەن
ەرلان وماروۆ.