ەلىمىزدە باستالىپ جاتقان تەمىرجول ۆوكزالدارىن رەكونسترۋكتسيالاۋ جانە جاڭعىرتۋ جوباسى اياسىندا جالپى قۇنى 250 ملرد تەڭگەنى قۇرايتىن 125 جوبانى جۇزەگە اسىرۋ جوسپارلانعان. بۇل رەتتە شاتىر, قاسبەت, ىشكى كورىنىس, جولاۋشىلار پلاتفورمالارى, ينجەنەرلىك جەلىلەر مەن ىرگەلەس اۋماقتاردى قامتي وتىرىپ, 21 ساپارجاي تولىق قالپىنا كەلتىرىلمەك, دەپ حابارلايدى Egemen.kz.
نەگىزىندە مۇنداي اۋقىمدى شارۋا جولاۋشىلارعا قىزمەت كورسەتۋ ساپاسىن ارتتىرۋدى كوزدەپ قانا قويماي, وتاندىق تاۋار وندىرۋشىلەردىڭ قاتىسۋىنا دا ايتارلىقتاي مۇمكىندىكتەر تۋعىزۋى كەرەك. الايدا شىن مانىندە, قازاقستاندىق وندىرۋشىلەر ءۇشىن بۇل جوبالار بويىنشا اقپارات شەكتەۋلى. ءماجىلىس دەپۋتاتى, قحپ فراكتسياسىنىڭ جەتەكشىسى ماگەررام ماگەرراموۆتىڭ قاتىسۋىمەن وتكەن «اتامەكەن» ۇكپ تورالقاسىنىڭ وڭدەۋ ونەركاسىبى كوميتەتىنىڭ وتىرىسىندا بيزنەس وكىلدەرى وسىلاي دەدى. پالاتا توراعاسىنىڭ ورىنباسارى مۇرات ءامريننىڭ ايتۋىنشا, ۇكىمەت وتاندىق تاۋار وندىرۋشىلەردى بارلىق ءىرى جوبالارعا تارتۋ بويىنشا بەلسەندى جۇمىس جۇرگىزىپ جاتىر جانە ولاردىڭ تۇراقتى جۇكتەمەسىن قامتاماسىز ەتۋ ماڭىزدى.
«Qazaq Stone» تاس وڭدەۋ ونەركاسىبى وداعىنىڭ توراعاسى داۋرەن اعزىموۆ: ء«بىزدىڭ سالانىڭ پروبلەماسى – ءىرى بيۋدجەتتىك جوبالارداعى جەرگىلىكتى قامتۋ دەڭگەيىنىڭ تومەندىگى. بۇل تەك تاس وڭدەۋگە عانا ەمەس, جيھاز وندىرۋشىلەرگە, جەڭىل ونەركاسىپكە جانە باسقا وڭدەۋ سالالارىنا دا قاتىستى. شەتەلدىك جەتكىزۋشىلەردىڭ كوپتەگەن ۇلتتىق جوبالارعا ەنىپ جاتقانىن كورىپ وتىرمىز, ال وتاندىق كومپانيالار 20-30 پايىز عانا جۇكتەلگەن», دەپ اتاپ كورسەتتى.
ول رەسپۋبليكامىزدا زاماناۋي تولىق تسيكلدى تاس وڭدەۋ كاسىپورىندارى جۇمىس ىستەيتىنىن, ولار قاپتاۋ مەن گرانيتتەن باستاپ ەرنەۋ مەن كەسپەكشەگە دەيىن ىشكى نارىقتىڭ قاجەتتىلىكتەرىن 100 پايىز وتەۋگە قابىلەتتى ەكەنىن ەسكە سالدى. بۇل كاسىپورىنداردىڭ وندىرىستىك قۋاتى ونىڭ ماركاسىنا بايلانىستى جىلىنا 713,8 مىڭ توننانى قۇرايدى. ء«بىز مەملەكەتتىك ورگانداردان تاس وڭدەۋ ونەركاسىبىنە قولداۋ كورسەتۋدى جانە ءىرى ينفراقۇرىلىمدىق جوبالاردى جۇزەگە اسىرۋعا قازاقستاندىق تابيعي تاستان جاسالعان بۇيىمدار وندىرۋشىلەردى مىندەتتى تۇردە تارتۋ مەحانيزمىن باستاۋدى سۇرايمىز», دەدى بيزنەس وكىلى.
وڭدەۋ ونەركاسىبى دەپارتامەنتىنىڭ ديرەكتورى المات اسقار وتاندىق تاۋار وندىرۋشىلەردى تارتۋ ءۇشىن ۋاقتىلى جوسپارلاۋ مەن بولجاۋ, سونداي-اق ينفراقۇرىلىمدىق جوبالاردى اشىق جۇزەگە اسىرۋ قاجەتتىگىن مالىمدەدى.
«شىندىعىندا جاعداي ۋاكىلەتتى ورگانداردىڭ پارلامەنت مىنبەرىنەن مالىمدەگەنىندەي ءماز ەمەس. بۇكىل پارلامەنتتىك فراكتسيا وتاندىق بيزنەستى قولداۋ ماسەلەلەرى بويىنشا ۇلتتىق كاسىپكەرلەر پالاتاسىمەن تىعىز ىنتىماقتاسۋعا جانە وسى ماسەلەلەردى باقىلاۋدا ۇستاۋعا دايىن ەكەنىنە سەندىرگىم كەلەدى», دەدى دەپۋتات ماگەررام ماگەرراموۆ.
تاراپتار كابەلدىك ونىمدەردى, جەلدەتۋ جابدىقتارىن, قاسبەت بويىنشا شەشىمدەر مەن باسقا دا كومپونەنتتەردى جەتكىزۋدى قوسا العاندا, وتاندىق ءوندىرۋشىنىڭ تەمىرجول ۆوكزالدارىن جاڭعىرتۋعا قاتىسۋى جونىندە جيىنتىق ۇسىنىس بەرۋگە كەلىستى.