كەشەگى ۇكىمەت وتىرىسىندا ەلدەگى ساۋدا سالاسىنىڭ دامۋ ۇردىستەرى كۇن تارتىبىنە شىقتى. سالا بويىنشا بايانداما جاساعان ساۋدا جانە ينتەگراتسيا ءمينيسترى ارمان شاققاليەۆ جارتى جىلدا ساۋدا كولەمى 8,4%-عا ءوسىپ, جالپى تاۋار اينالىمى 31,4 ترلن تەڭگەنى قۇراعانىن ايتتى, دەپ جازادى Egemen.kz.
نەگىزىنەن ءوسىم كوتەرمە ساۋدانىڭ 45%-دان استامىن قۇرايتىن 9 نەگىزگى تاۋار توبى ەسەبىنەن بولدى. ونىڭ قاتارىندا مۇناي مەن مۇناي ونىمدەرى, گاز, تۇرمىستىق تەحنيكا, ۇيالى تەلەفون, فارماتسەۆتيكالىق ونىمدەر, ماشينا جاساۋ, استىق پەن تەمەكى ونىمدەرى بار. اتالعان تاۋارلاردى جىل سوڭىنا دەيىن وتكىزۋدىڭ بولجامدى كولەمى 26,4 ترلن تەڭگەنى قۇرايدى. وسى رەتتە ىشكى ءوندىرىس ۇلەسىن ارتتىرۋ ارقىلى سول كولەمدى قامتاماسىز ەتۋگە ەرەكشە كوڭىل بولىنەدى.
«جارتىجىل قورىتىندىسى بويىنشا ەلدىڭ بارلىق وڭىرلەرى وڭ ديناميكا كورسەتتى. ساۋدا وسىمىنە ەڭ كوپ ۇلەس قوسقان وڭىرلەر – الماتى, استانا, شىمكەنت قالاسى, سونداي-اق اتىراۋ مەن قاراعاندى وبلىسى. بۇل وڭىرلەردىڭ ۇلەسىنە جالپى تاۋار اينالىمىنىڭ 72%-ى تيەسىلى», دەدى ا.شاققاليەۆ.
ساۋدا ءوسىمى بويىنشا كوشباسشى وڭىرلەر: تۇركىستان وبلىسى (+69,3%), اقمولا وبلىسى (+45,4%) جانە پاۆلودار وبلىسى (+22,3%).
مينيسترلىك ساۋدا سالاسىن 3 نەگىزگى باعىتپەن جۇيەلى تۇردە دامىتىپ جاتىر. ءبىرىنشى – ساۋدانىڭ زاماناۋي فورماتتارىن ىلگەرىلەتۋ. ىنتالاندىرۋ تەتىگى ەنگىزىلىپ, زاڭناماعا وزگەرىس ەنگىزىلدى. بيىل ىشكى ساۋدا سۋبەكتىلەرىن قولداۋعا 5,2 ملرد تەڭگە قاراستىرىلعان. نەگىزگى كاپيتالعا ينۆەستيتسيا تارتۋ بەلسەندى تۇردە جالعاسۋدا. جوسپار – 1 220 ملرد تەڭگە. ساۋدا سالاسىندا جالپى سوماسى 168,4 ملرد تەڭگە بولاتىن 33 نىساننان تۇراتىن ۇلتتىق ينۆەستيتسيالىق جوبالار پۋلى قالىپتاستى. سونىمەن قاتار بولشەك ساۋدا نارىعىن جاڭعىرتۋ اياقتالۋعا جاقىن.
ەكىنشى – ەلەكتروندىق ساۋدانى دامىتۋ. جارتى جىلدا e-commerce نارىعىنىڭ كولەمى 10%-دان استام ءوسىپ, بولشەك سەگمەنتتە 1,5 ترلن تەڭگەگە جەتكەن. ونىڭ ىشىندە 1,3 ترلن تەڭگەسى Kaspi.kz, Hayk market, Forte, Jusan, Ozon جانە Wildberries سياقتى التى ءىرى ماركەتپلەيس ارقىلى قامتاماسىز ەتىلدى. ەكىنشى جارتىجىلدىقتا درايۆەرلەر رەتىندە ءتورت dark store ورتالىعىنىڭ ىسكە قوسىلۋى, ەكى فۋلفيلمەنت-ورتالىق قۇرىلىسىنىڭ اياقتالۋى مەن قازپوشتانىڭ مۋلتيمودالدى لوگيستيكالىق ورتالىق جەلىسىن ىسكە اسىرۋ باستالادى. سونداي-اق, Kaspi مەن قازپوشتانىڭ سەرىكتەستىگى اياسىندا قازاقستان – قىتاي باعىتى بويىنشا B2B فورماتىنداعى ەلەكتروندىق پلاتفورما ىسكە قوسىلادى.
ءۇشىنشى – كولەڭكەلى ساۋدانى ازايتۋ. مينيسترلىك تاۋاردى كاتالوگتاۋ مەن قاداعالاۋ بويىنشا شارانى دايەكتى تۇردە جۇزەگە اسىرىپ ءجۇر. ۇلتتىق تاۋار كلاسسيفيكاتورى (وكترۋ) ەنگىزىلۋدە, تاڭبالاناتىن تاۋار پوزيتسيالارىنىڭ ءتىزىمى كەڭەيۋدە. قارجى مينيسترلىگى جانە «قازاقتەلەكوم» اق-پەن بىرلەسىپ نكت مەن ەكت ۇلتتىق كاتالوگتارىنىڭ ينتەگراتسياسى اياقتالۋعا جاقىن. ەكىنشى دەڭگەيلى بانكتەرمەن بىرگە, نارىقتارداعى تاۋار اينالىمىن تسيفرلاندىرۋ مەن اقشا اعىنىنىڭ اشىقتىعىن ارتتىرۋعا باعىتتالعان «Digital Bazar» جوباسى ىسكە قوسىلادى.