كەشە الماتىداعى ۇلتتىق ءباسپاسوز كلۋبىندا بەلگىلى جازۋشى ادولف ارتسيشەۆسكيدىڭ «بيگەلدى گابدۋللين: پراۆو نا يسپوۆەد» («بيگەلدى عابدۋللين: اعىنان جارىلۋ قۇقى») اتتى جاڭا كىتابىنىڭ جارىق كورۋىنە ورايلاستىرىلعان ءباسپاسوز ءماسليحاتى بولىپ ءوتتى. وعان اۆتورمەن بىرگە قازاقستاننىڭ ەڭبەك سىڭىرگەن مادەنيەت قايراتكەرى, كورنەكتى جازۋشى سماعۇل ەلۋباي, پروزاشى ءۇمىت تاجىكەنوۆا جانە باسقالار قاتىسىپ, تىڭ تۋىندىعا بايلانىستى ءوز وي-پايىمدارىن ورتاعا سالدى.
بىزدە جۋرناليستەر جايىندا جازىلعان كىتاپ كوپ ەمەس. بالكىم, مىنا جيناق سول قاتارداعى تىرناقالدى بولار. ونىڭ ۇستىنە ول دەرەكتى رومان-ەسسە دەيتىن سيرەك جانردا ورنەكتەلگەن. مۇندا ءبىزدىڭ ماماندىقتىڭ نەبىر قياپات قيىندىقتارى, قاپتالداسا قاتار جۇرەتىن قاۋىپ-قاتەرلەرى, كوڭىل-كۇيىندەگى كۇيزەلىستەر جايلى دا بۇكپەسىز ايتىلعان. سونداي-اق شىعارماشىلىق ەڭبەكتىڭ بىزگە سىيلايتىن قۋانىش-شاتتىعى دا نازاردان تىس قالماعان.
كىتاپتىڭ باس كەيىپكەرى جۋرناليستىك ءھام جازۋشىلىق ورتالاردا كادىمگىدەي-اق ءماشھۇر ادام. بيگەلدى عابدۋلليننىڭ ءبىر باسىنا جەتەرلىك قايشىلىقتارى دا بار, جۇرتتىڭ بارىنە بىردەي جاعا دا بەرمەيدى, وڭاي-وسپاق تا تۇلعا ەمەس. بىراق ول, ءتىپتى, ءوزىنىڭ اداسۋلارىندا دا بارىنشا ادال, بارىنشا شىنايى. سوعان قاراماستان, بۇل تۇلعا جاڭا زامانداعى قازاقستان مەدياكەڭىستىگى ساۋلەتكەرلەرىنىڭ بىرىنەن سانالادى. بۇگىن تاڭدا جۇرت ونى قارىمدى قالامگەر, جاڭاشىل جۋرناليست رەتىندە تانيدى. بەرتىنگى ۋاقىتتا «نوۆوە پوكولەنيە» جانە «ءححى ۆەك» رەسپۋبليكالىق گازەتتەرىنىڭ باس رەداكتورى ءارى قۇرۋشىسى بولعان. جاقىندا ءبىز قازاقستاننىڭ اسا تانىمال گازەتتەرىنىڭ ءبىرى, بيگەلدى عابدۋللين قۇرىپ, باسقارىپ كەلە جاتقان Central Asia Monitor-دىڭ 10 جىلدىعىن اتاپ وتكەنبىز. قازاق ادەبيەتىنىڭ كلاسسيگى ءابدىجامىل نۇرپەيىسوۆ قازاق پەن-كلۋبىنىڭ تىزگىنىن وزىنەن كەيىن ناق وسى بيگەلدى عابدۋللينگە ۇستاتۋى دا بەكەر ەمەس. ونىڭ باسشىلىعىمەن وسىناۋ جازۋشىلار بىرلەستىگى جاڭاشا تىنىستاپ, جاڭاشا وركەن جايۋدا. ول سونىمەن بىرگە «ۆەليكوە كوچەۆە» (« ۇلى كوش») اتتى تاماشا تانىمدىق جيناقتىڭ اۆتورى. ونىڭ ءومىربايانى شيەلەنىسكەن وزگەشە قاتپارلارىمەن قايران قالدىرىپ, بىزگە ادامي بولمىستىڭ قايتالانباس تارتىمدىلىعىن عيبرات ەتەدى. ونىڭ ۇستىنە ءومىر ادامعا ءبىر-اق رەت بەرىلگەن. ءبىزدىڭ ارقايسىمىز تاعدىر تالقىسىنا قاراماستان, ول ءومىردى ارقاشان اق پاراقتان باستاپ جازۋعا ءماجبۇرمىز. ادولف ارتسيشەۆسكيدىڭ «بيگەلدى عابدۋللين: اعىنان جارىلۋ قۇقى» دەرەكتى رومان-ەسسەسىنىڭ بەتتەرىنەن وسىنداي رۋحاني بولمىس-ءبىتىمى ابدەن قالىپتاسقان ەرەكشە ادامنىڭ ءومىرى اعىنان جارىلىپ سىر اشادى.
قورعانبەك امانجول, «ەگەمەن قازاقستان».
الماتى.