جىل باسىنان بەرى ەلىمىزدە شەتەل انشىلەرىنىڭ قاتىسۋىمەن 270-تەن استام كونتسەرت وتكەن ەكەن. قوناقتاردى تارتۋدىڭ بۇل باعىتى «وقيعالى تۋريزم» دەپ اتالادى. سەبەبى تانىمال شەتەل جۇلدىزدارى ونەر كورسەتەتىن كونتسەرتكە ەلىمىزدىڭ ءار ايماعىنان, سونداي-اق كورشىلەس ەلدەردەن دە كورەرمەن كوپتەپ كەلەتىنى بەلگىلى.
كەيىنگى جىلدارى ەلىمىزدە حالىقارالىق دەڭگەيدەگى مادەني ءىس-شارالار ءجيى وتەتىن بولدى. مىسالى, جاقىندا الەمگە ايگىلى «Backstreet Boys» توبىنىڭ ەلىمىزگە كەلەتىنى تۋرالى حابار تارادى. بۇل وقيعا مادەني تۋريزم مەن كرەاتيۆتى يندۋستريانى دامىتۋعا سەرپىن بەرۋگە ءتيىس. ءارى ەلىمىزدىڭ بەدەلىن ارتتىرىپ, جاڭاشىل قۇندىلىقتاردى قولدايتىن مەملەكەت رەتىندە تانىلۋىنا ىقپال ەتەدى. دەمەك وقيعالى تۋريزم – ەل برەندىن, ۇلتتىڭ مادەني مۇراسىن اسپەتتەپ كورسەتۋدىڭ ءتيىمدى جولى. مۇنداي ءىس-شارالارعا ادەتتە مادەنيەت, بيزنەس وكىلدەرى, ۆولونتەرلەر, جاستار ءجيى تارتىلادى. مادەنيەت جانە اقپارات مينيسترلىگى مادەنيەت كوميتەتى توراعاسىنىڭ ورىنباسارى ازامات بەلقايىروۆ ءباسپاسوز كونفەرەنتسياسىندا «Backstreet Boys» توبىنىڭ كونتسەرتى جەكە ينۆەستيتسيا ەسەبىنەن ۇيىمداستىرىلاتىنىن ءمالىم ەتتى.
«جوبانى جەكە ۇيىمداستىرۋشىلار ىسكە اسىرادى. مەملەكەتتىك بيۋدجەتتەن قاراجات بولىنبەگەن. الايدا مادەنيەت جانە اقپارات مينيسترلىگى ىقىلاس تانىتىپ, اقپاراتتىق قولداۋ كورسەتىپ وتىر. اتاپ ايتقاندا, مادەني جوبالاردى ۇيلەستىرۋ, اقپاراتتىق سۇيەمەلدەۋ, مەملەكەتتىك جەرگىلىكتى اتقارۋشى ورگاندارمەن ءوزارا كەلىسىم قامتاماسىز ەتىلىپ جاتىر. بۇل – مەملەكەت پەن بيزنەستىڭ ءتيىمدى ىنتىماقتاستىعىنىڭ ناقتى ۇلگىسى. كونتسەرت جاي عانا شوۋ ەمەس, ەلىمىزدىڭ جاڭا مادەني كەلبەتىن قالىپتاستىرۋعا باعىتتالعان ماڭىزدى قادام. مۇنداي باستامالاردى قولداي وتىرىپ, ەلىمىزدى مادەني, تۋريستىك باعىت رەتىندە الەمگە تانىتا بەرگىمىز كەلەدى. بۇل مينيسترلىك ىسكە اسىرىپ وتىرعان اۋقىمدى جۇمىستىڭ ءبىر باعىتى عانا», دەدى ا.بەلقايىروۆ.
ۇلتتىق ستاتيستيكا بيۋروسىنىڭ مالىمەتىنشە, بىلتىر ەلورداعا 1,5 ملن تۋريست كەلگەن. ونىڭ 350 مىڭى – شەتەلدىك قوناقتار. بيىل شامامەن 1,7 ملن تۋريست كەلەدى دەگەن بولجام بار. ازىرگە ءبىرىنشى توقساندا ەلورداعا 300 مىڭ قوناق كەلسە, ونىڭ 68 مىڭى – شەتەلدىكتەر. بۇگىندە ەلوردا ساياسي, ىسكەرلىك ورتالىق قانا ەمەس, مادەني ءىس-شارالار ءجيى وتەتىن قالاعا اينالدى. استانا قالالىق ءتۋريزمدى دامىتۋ ورتالىعىنىڭ باسشىسى ارتەم كۆاشۋكتىڭ ايتۋىنشا, «Backstreet Boys» توبىنىڭ كونتسەرتى سياقتى اۋقىمدى ءىس-شارالاردى وتكىزۋ قالاعا ءبىرىنشى كەزەكتە تولەم قابىلەتى جوعارى تۋريستەردى تارتادى. ءارى حالىقارالىق ارەنادا استانا قالاسىنا دەگەن قىزىعۋشىلىقتى ارتتىرادى. كونتسەرت كۇنى قوناقۇيلەر تولىپ, مەيرامحانالاردا, مادەني نىسانداردا, كورىكتى جەرلەردە ادام ۇزىلمەيدى. ءبىر كونتسەرتتىڭ ءوزى بىرنەشە باعىتتىڭ دامۋىنا سەرپىن بەرەدى.
«قالانىڭ ينفراقۇرىلىمى كەز كەلگەن دەڭگەيدەگى ءىس-شارانى وتكىزۋگە دايىن. مۇندا 300-گە جۋىق قوناقۇي بار. ونىڭ 9-ى – 5 جۇلدىزدى, 100-دەن استامى – 3-4 جۇلدىزدى. جىل وتكەن سايىن استانا «وقيعالار قالاسى» مارتەبەسىن نىعايتىپ كەلەدى. بىلتىر 128 حالىقارالىق ءىس-شارا ءوتتى. بيىل 200-دەن استام ءىس-شارا ۇيىمداستىرىلماق», دەدى ا.كۆاشۋك.
باتىس ەۋروپادا 10 مىڭ ادامعا ارنالعان كونتسەرت ورتا ەسەپپەن شاعىن جانە ورتا بيزنەس نىساندارىنا 1 ملن دوللاردان استام قوسىمشا تابىس اكەلەدى ەكەن. بۇل دەگەنىڭىز – قوناقۇي بيزنەسىن دامىتۋعا نيەتتى ينۆەستورلارعا ۇلكەن بەلگى. قورىتا كەلە, «Backstreet Boys» توبى 21 قىركۇيەكتە استانادا العاش رەت ونەر كورسەتەتىنىن حابارلايمىز. بيلەتتەر 14 شىلدەدەن ساتىلىمعا شىعادى.