اقش پرەزيدەنتى دونالد ترامپ مىس يمپورتىنا جاڭا 50 پايىزدىق باج سالىعىن ەنگىزۋدى جوسپارلاپ وتىرعانىن مالىمدەدى, دەپ حابارلايدى Egemen.kz CNN تەلەارناسىنا سىلتەمە جاساپ.
الايدا اتالعان سالىقتىڭ ناقتى قاي ۋاقىتتا كۇشىنە ەنەتىنى ازىرگە بەلگىسىز.
بيىل اقپاندا دونالد ترامپ ۇلتتىق قاۋىپسىزدىك مۇددەسىنە سۇيەنە وتىرىپ, مىس يمپورتىنا قاتىستى تەرگەۋ جۇرگىزۋ تۋرالى تاپسىرما بەرگەن بولاتىن. اتالعان زاڭ اياسىندا پرەزيدەنت كەيبىر ونىمدەرگە جوعارى تاريفتەر ەنگىزە الادى.
مىس — ەلەكترونيكا, تۇرمىستىق تەحنيكا جانە اۆتوكولىك ءوندىرىسى ءۇشىن ماڭىزدى شيكىزات كوزى. ساراپشىلاردىڭ پىكىرىنشە, بۇل باستاما اقش-تا اتالعان ونىمدەردىڭ قىمباتتاۋىنا اكەلۋى مۇمكىن. ساۋدا مينيسترلىگىنىڭ مالىمەتىنشە, وتكەن جىلى امەريكا قۇراما شتاتتارىنا 17 ميلليارد دوللار كولەمىندە مىس يمپورتتالعان.
ايتا كەتەيىك, ترامپتىڭ مالىمدەمەسىنەن كەيىن نيۋ-يوركتەگى بيرجادا مىس باعاسى كۇرت وسكەن. فيۋچەرستىك كەلىسىمدەر 15 پايىزعا كوتەرىلىپ, ءبىر فۋنتى 5,68 دوللارعا دەيىن جەتكەن.
سونداي-اق, پرەزيدەنت فارماتسەۆتيكالىق ونىمدەرگە 200 پايىزدىق باج سالىعىن ەنگىزۋدى دە جوسپارلاپ وتىرعانىن جەتكىزدى. بۇل شارا وتاندىق ءوندىرىستى ىنتالاندىرۋ ءۇشىن قولعا الىنادى. دەگەنمەن, ناقتى ەنگىزىلۋ مەرزىمى كەيىنگە شەگەرىلۋى مۇمكىن. وسى ورايدا ترامپ امەريكادا ءدارى-دارمەك ءوندىرىسىن ۇلعايتۋ قاجەت ەكەنىن ايتىپ, باسقا ەلدەرگە تاۋەلدىلىكتەن ارىلۋ كەرەك دەگەن پىكىر بىلدىرگەن.
بۇعان قوسا, دونالد ترامپ جاقىندا 1 تامىزعا جوسپارلانعان ساۋدا باجدارىنىڭ كۇشىنە ەنۋ مەرزىمى كەيىنگە قالدىرىلۋى مۇمكىن ەكەنىن دە جوققا شىعارمادى. بۇل تۋرالى ول دۇيسەنبى كۇنى يزرايل پرەمەر-ءمينيسترى بينيامين نەتانياحۋمەن اق ۇيدەگى كەزدەسۋدىڭ الدىندا جۋرناليستەر سۇراعىنا جاۋاپ بەرگەندە ايتقان.