«قازگيدرومەت» رمك سينوپتيكتەرى 2025 جىلعى 8, 9 جانە 10 شىلدە كۇندەرىنە ارنالعان اۋا رايى بولجامىن جاريالادى. اتموسفەرالىق فرونتتاردىڭ وتۋىنە بايلانىستى ەلىمىزدىڭ باسىم بولىگىندە جاڭبىر جاۋىپ, نايزاعاي وينايدى, دەپ حابارلايدى Egemen.kz.
9–10 شىلدە كۇندەرى سولتۇستىكتە, 10 شىلدەدە سولتۇستىك-باتىس, وڭتۇستىك جانە وڭتۇستىك-شىعىس وڭىرلەردە قاتتى جاڭبىر, بۇرشاق جانە داۋىلدى جەل كۇتىلەدى. تەك رەسپۋبليكانىڭ باتىسىندا سولتۇستىك-باتىس انتيتسيكلونىنىڭ ىقپالىمەن جاۋىن-شاشىنسىز اۋا رايى ساقتالادى. ەلىمىز بويىنشا جەلدىڭ كۇشەيۋى, ال تۇنگى جانە تاڭعى ۋاقىتتاردا سولتۇستىكتە تۇمان ءتۇسۋى ىقتيمال.
9–10 شىلدەدە ەلىمىزدىڭ باتىسى مەن وڭتۇستىك-باتىسىندا كۇن قاتتى ىسيدى. اۋا تەمپەراتۋراسى 35–41°C دەيىن, سولتۇستىك-باتىستا 35–38°C دەيىن كوتەرىلەدى.
سولتۇستىك وڭىرلەردە تۇنگى تەمپەراتۋرا 7–15°C, ال كۇندىز 20–27°C ارالىعىندا بولادى. وڭتۇستىك پەن وڭتۇستىك-شىعىستا تەمپەراتۋرا بىرتىندەپ تومەندەيدى. قالعان ايماقتاردا تەمپەراتۋرالىق فون ايتارلىقتاي وزگەرمەيدى.
بۇعان دەيىن «قازگيدرومەت» شىلدە ايىنا ارنالعان كەڭەس سيپاتىنداعى بولجامىن ۇسىنعان بولاتىن. سينوپتيكتەردىڭ مالىمەتىنشە, شىلدە ايىندا ەلىمىزدە تۇراقسىز اۋا رايى ساقتالادى. ەلدىڭ كوپ بولىگىندە نايزاعايلى وتكىنشى جاڭبىر, بۇرشاق جانە قاتتى جەل بولۋى مۇمكىن.
وڭتۇستىكتە وتە قاتتى اپتاپ ىستىق كۇتىلەدى, كەيبىر ايماقتاردا شاڭدى داۋىلدار بولۋى ىقتيمال. بۇل وڭىرلەردە ءورت قاۋىپى جوعارى دەڭگەيدە ساقتالادى.