الماتىداعى مەملەكەتتىك ورتالىق مۋزەيدە ۇلتتىق دومبىرا كۇنىنە وراي «كۇمبىرلە, قوڭىر دومبىرا» اتتى اۋقىمدى كورمە اشىلدى, دەپ جازادى Egemen.kz.
حالقىمىزدىڭ باي مۇراسىن, رۋحاني قۇندىلىقتارىن دارىپتەپ, ۇلتتىق ونەرگە دەگەن سۇيىسپەنشىلىكتى ارتتىرۋعا باعىتتالعان ءىس-شارانى اشقان مۋزەي ديرەكتورىنىڭ مىندەتىن اتقارۋشى سەرجان باراحان ۇلى ۇلتتىق ونەرىمىز ۇلىقتالاتىن دومبىرا كۇنىنىڭ ءمان-ماڭىزىنا توقتالىپ, مۋزەي قورىندا ساقتالعان مۋزىكالىق اسپاپتاردىڭ تاريحىنا شولۋ جاسادى.
بەلگىلى كۇيشى, قازاقستاننىڭ حالىق ءارتىسى سەكەن تۇرىسبەك جينالعان قاۋىمدى مەرەكەمەن قۇتتىقتاپ, ءوزىنىڭ 30 جىل ۇستاعان سۇيىكتى دومبىراسىن مۋزەي قورىنا تابىس ەتتى.
- جانىما جاقىن اسپابىم ەدى. بۇگىن ءوز قولىممەن, شىن پەيىلىممەن مۋزەي قورىنا تابىستاپ وتىرمىن. تاريحىمىز بەن مادەنيەتىمىزدىڭ ورداسىنان ورىن السىن, - دەيدى سەكەن تۇرىسبەك.
تاعىلىمدى شارادا الماتى وبلىسى, ىلە اۋدانىنىڭ ارداگەرلەر ۇيىمىنىڭ توراعاسى, قوعام قايراتكەرى امزە الديبەك ۇلى ءسوز الىپ, جاس ۇرپاقتىڭ بويىنا ۇلتتىق قۇندىلىقتاردى دارىتۋدا دومبىرا كۇنىنىڭ ماڭىزى ەرەكشە ەكەنىن اتادى.
سونداي-اق, شارا بارىسىندا «اقجاۋىن» مەملەكەتتىك كامەرالىق وركەسترى جانە الماتى وبلىسى, ىلە اۋدانى, وتەگەن باتىر اۋلىنىڭ №1 بالالار مۋزىكا مەكتەبىنىڭ «سەرپەر» جانە «جىگەر» دومبىراشىلار انسامبلدەرى ونەر كورسەتىپ, تىڭدارماننىڭ قۇلاق قۇرىشىن قاندىردى. شارا بارىسىندا ونەر كورسەتكەن تالانتتى بۇلدىرشىندەر كۇيشى, قازاقستاننىڭ حالىق ءارتىسى سەكەن تۇرىسبەكتەن باتا الدى.
كورەرمەن نازارىنا مۋزەي قورىندا ساقتالعان حالقىمىزدىڭ رۋحاني قازىناسىن بايىتقان كورنەكتى تۇلعالارعا تيەسىلى دومبىرالار ۇسىنىلدى. ولاردىڭ قاتارىندا – حالىق ءانشىسى, كومپوزيتور جاياۋ مۇسا, ۇلى ابايدىڭ جارى ءدىلدا الشىنبايقىزى, ءان ونەرىنىڭ شەبەرى امىرە قاشاۋباەۆ, مۋزىكا زەرتتەۋشىسى, كومپوزيتور جانە ديريجەر احمەت جۇبانوۆ, قازاق وپەرا ونەرىنىڭ نەگىزىن قالاۋشىلاردىڭ ءبىرى كۇلاش بايسەيىتوۆا, اكادەميك قانىش ساتباەۆ, تەاتر ونەرىنىڭ تارلانى ەلۋباي ومىرزاقوۆ, سونداي-اق جۇبان مولداعاليەۆ, كاۋكەن كەنجەتاەۆ, ءابدىلدا جانگەلدين, قاپان قاسىموۆ جانە باسقا دا ءبىرتۋار ونەر قايراتكەرلەرىنىڭ دومبىرالارى بار.
كورمە اياسىندا دومبىرا شەبەرلەرىنىڭ شەبەرلىك ساعاتتارى ءوتىپ, ۇلتتىق كيىم ۇلگىلەرى كوپشىلىك نازارىنا ۇسىنىلدى.