بالا تولىق جانە ۇيلەسىمدى دامۋى ءۇشىن ول وتباسى اياسىندا, باقىت پەن ماحاببات, تۇسىنۋشىلىك جاعدايىندا ءوسۋى قاجەت. ەلىمىزدەگى «نەكە-وتباسى» زاڭناماسى بالالاردىڭ وتباسىندا تاربيەلەنۋ باسىمدىعى, ولاردىڭ ءوسىپ-جەتىلۋى مەن ءال-اۋقاتتى بولۋىنا قامقورلىق كورسەتۋ قاعيداتتارىنا نەگىزدەلگەن. بۇگىندە جامبىل وبلىسى اكىمىنىڭ قولداۋىمەن وڭىردە جەتىم بالالار مەن اتا-اناسىنىڭ قامقورلىعىنسىز قالعان بالالاردى وتباسىلىق جاعدايدا تاربيەلەۋ بويىنشا ماڭىزدى شارالار قابىلدانىپ جۇرگىزىلۋدە.
اتاپ ايتقاندا, ۇستىمىزدەگى جىلدىڭ 6 ايىندا جاڭادان 10 وتباسىلىق ۇلگىدەگى بالالار ۇيلەرى اشىلدى. وبلىستا 2014 جىلى ەكى عانا وتباسىلىق ۇلگىدەگى بالالار ۇيلەرى بار بولاتىن, ەرجانوۆتار جانە تيموفەەۆتەر وتباسى ۇلگىسىندەگى بالالار ۇيلەرىندە 9 كامەلەتكە تولماعان بالالار تاربيەلەنسە, جاڭادان اشىلعان 10 وتباسى ۇلگىسىندەگى بالالار ۇيلەرىندە 55 بالا تاربيەلەنۋدە. وتباسى ۇلگىسىندەگى بالالار ۇيلەرىن دامىتۋعا 2014 جىلى 5 ملن. 954 مىڭ تەڭگە بولىنسە, 2015 جىلى 25 ملن. 309 مىڭ تەڭگە قارالىپ وتىر. سونىمەن قاتار, وبلىستا جەتىم جانە اتا-اناسىنىڭ قامقورلىعىنسىز قالعان بالالاردى پاتروناتتىق تاربيەگە بەرۋ ءۇردىسى دامىپ كەلەدى. 2012 جىلى – 1577 بالا پاتروناتتىق تاربيەگە بەرىلسە, 2013 جىلى – 1732 بالا, 2014 جىلى – 1759 بالا, 2015 جىلى – 1689 بالا بەرىلدى. جەتىم بالالار مەن اتا-اناسىنىڭ قامقورلىعىنسىز قالعان بالالاردى ورنالاستىرۋدىڭ وتباسىلىق نىساندارىن ناسيحاتتاۋدى كوزدەيتىن «ريزاشىلىق», «قۋان, ءسابي», «قامقورشى كۇنى» رەسپۋبليكالىق قايىرىمدىلىق مەرەكەلەرى مەن «وتباسىنا بارار جول» اكتسياسى اياسىندا ۇيىمداستىرىلعان ءىس-شارالار ناتيجەسىندە جەتىم بالالاردى وتباسىندا تاربيەلەۋگە العىسى كەلەتىن وتباسىلاردىڭ سانى ەداۋىر ارتتى. 2014 جىلى بالالار ۇيلەرىنەن بالا اسىراپ الۋعا ۇمىتكەرلەر رەتىندە 235 وتباسى تىركەلسە, بيىلعى جىلدىڭ 6 ايىندا 95 وتباسى نيەتتەنىپ وتىر. 2014 جىلى وبلىستاعى بالالار ۇيلەرىنەن 42 بالانى قازاقستاندىق ازاماتتار اسىراپ الىپ, 60 بالاعا قورعانشىلىق پەن قامقورشىلىق بەلگىلەندى, 11 بالا پاتروناتتىق تاربيەگە بەرىلدى, 50 بالا تۋعان وتباسىنا ورالدى. جەتىم بالالار مەن اتا-انالارىنىڭ قامقورلىعىنسىز قالعان بالالارعا ارنالعان ۇيىمداردى كەزەڭ-كەزەڭمەن قىسقارتۋ – وسى ساناتتاعى بالالاردى الەۋمەتتىك بەيىمدەۋ ءۇشىن قاجەتتى شارا. 2011 جىلى وبلىستا جەتىم جانە اتا-اناسىنىڭ قامقورلىعىنسىز قالعان بالالارعا ارنالعان 5 ينتەرناتتىق مەكەمەلەردە جانە 3 وتباسى ۇلگىسىندەگى بالالار ۇيلەرىندە 588 بالا تاربيەلەنسە, 2012 جىلى «ۇلان» بالالار ءۇيىن جانە 2015 جىلى ۆ. ساۆۆا اتىنداعى جەتىم جانە اتا-اناسىنىڭ قامقورلىعىنسىز قالعان بالالارعا ارنالعان مەكتەپ-ينتەرناتىن ق. سارىمولداەۆ اتىنداعى بالالار ۇيىنە قوسۋ ارقىلى 2 بىرلىككە قىسقارتىلىپ, وندا تاربيەلەنىپ جاتقان بالالار سانى 2011 جىلعى 588-دەن 370-كە, ياعني 218-گە كەمىدى. سونداي-اق, وبلىستا جەتىم جانە اتا-اناسىنىڭ قامقورلىعىنسىز قالعان بالالاردى تۇرعىن ۇيمەن قامتاماسىز ەتۋ بويىنشا ناتيجەلى جۇمىستار جۇرگىزىلۋدە. 2014 جىلى مەملەكەتتىك تۇرعىن ءۇي قورىنان 157 بالا تۇرعىن ۇيمەن قامتاماسىز ەتىلدى. بۇگىنگى كۇنى جالپى وبلىس بويىنشا 363 جەتىم جانە اتا-اناسىنىڭ قامقورلىعىنسىز قالعان بالا تۇرعىن ۇيمەن قامتاماسىز ەتىلگەن.
سۇلۋشاش قۇرمانبەكوۆا, جامبىل وبلىستىق ءبىلىم باسقارماسىنىڭ باسشىسى.
جامبىل وبلىسى.