سوعىس جىلدارى تىلداعى تىرشىلىكتىڭ بار اۋىرتپالىعىن ايەلدەر مەن جاس بالالار كوتەردى. ەر-ازاماتىن, اكەسىن, اعاسىن مايدانعا شىعارىپ سالعان انالار, قىز-كەلىنشەكتەر, شيەتتەي بالا-شاعا اۋىر ەڭبەككە ارالاسىپ ستانوكتا تۇردى, وق-ءدارى شىعاردى, كومباين-تراكتورعا ءمىنىپ جەر جىرتتى, ەگىن ورىپ, ماساق تەردى, جەر استىنا ءتۇسىپ كومىر قازدى, كەن ءوندىردى.
وبلىستىق تاريحي-ولكەتانۋ مۋزەيىندە توبىل وڭىرىندەگى تىل ەڭبەككەرلەرىنىڭ ەرلىك تاريحىنان سىر شەرتەتىن كوپتەگەن قۇجاتتار, فوتوسۋرەتتەر ساقتالىپ قالعان. مۋزەي قىزمەتكەرى ءنازميا وتاشەۆانىڭ ايتۋىنشا, سوعىس باستالعان سوڭ 20 كۇننەن كەيىن قوستاناي وبلىستىق اتقارۋ كوميتەتىندە ايەلدەرگە شۇعىل تراكتور, كومباين, جۇك كولىكتەرىن جۇرگىزۋدى ۇيرەتۋ ماسەلەسى قارالىپ, 15 شىلدە مەن 15 تامىز ارالىعىندا مەحانيزاتور ايەلدەر بريگادالارىن دايارلاپ شىعارۋ تۋرالى شەشىم قابىلدانادى.
«وسىلايشا, از ۋاقىتتىڭ ىشىندە 3 مىڭنان اسا ايەل وندىرىستەن بوساتىلىپ, ءبىر ايلىق جەدەل كۋرستى ءتامامداپ, دايىن مەحانيزاتور بولىپ شىعادى. مۇنىڭ سىرتىندا, تاعى 1 جارىم مىڭ ايەل شارۋاشىلىقتا ءجۇرىپ تراكتور جۇرگىزۋدىڭ قىر-سىرىن ۇيرەنگەن», دەيدى مۋزەي قىزمەتكەرى.
مەحانيزاتسيا مەكتەپتەرىندە وقىعان ايەلدەر جۇك كولىكتەرى مەن كومباين جۇرگىزۋگە دە ماشىقتانعان. مەكتەپ تۇلەكتەرى كۋرستى ءتامامداي سالىپ, كومباين, تراكتور تىزگىنىنە وتىرعان. مۋزەيدە ساقتالعان دەرەكتەرگە سەنسەك, 1941 جىلدىڭ استىعى تۇگەلدەي ايەلدەردىڭ كۇشىمەن جينالادى. 1942 جىلى وڭىردەگى بۇكىل كولحوز-سوۆحوز جۇمىسشىلارىنىڭ 73 پايىزى ايەلدەردەن تۇرعان. ايەلدەر, قارتتار, جاس بالالار تاۋلىگىنە 16 ساعات جۇمىس ىستەيدى. مايدانعا استىق, ماي, ەت جىبەرەدى.
ەل باسىنا كۇن تۋعان اۋىر كەزەڭدە دەنى 18 جاسقا تولماعان قىز بالالار تراكتورعا ءمىنىپ جەر جىرتىپ, ەگىن ەگەدى. ماسەلەن, 1942 جىلى مەحانيزاتور ايەلدەر بريگاداسى 2 مىڭ گەكتار جەرگە ءدان ەگىپ, ەڭبەك نورماسىن ەكى جارىم ەسە ارتىق ورىندايدى. سوعىس جىلدارى تراكتور ءمىنىپ, جەر جىرتقان تىل ارداگەرىنىڭ ءبىرى – قوستاناي قالاسىنىڭ تۇرعىنى عاينيكامال تاتكەنوۆا. بۇگىندە 99 جاستاعى عاينيكامال اجەي تراكتور تىزگىنىنە وتىرعاندا نەبارى 15 جاستا ەكەن.
ء«تورت جاسىمدا اكەدەن ايىرىلدىم. شەشەم ءۇش بالامەن تۇرمىسقا شىعىپ ەدى, سوعىس باستالعان سوڭ كۇيەۋى مايدانعا كەتتى. كوز اشقالى جوقشىلىق, اشتىق كورىپ وستىك. مەن توعىزىنشى سىنىپتى بىتىرگەندە سوعىس باستالدى. ءبىر كۇنى باسقارما ۇيگە كەلىپ, مەكتەپتى تاستايسىڭ, تراكتور وقۋىنا باراسىڭ, وقۋعا بارماساڭ, ەڭبەك ارمياسىنا جىبەرەمىز دەدى. شەشەم ءۇش بالامەن ۇيدە وتىر. مەن ون بەس جاستاعى بالامىن. سودان تراكتور ۇيرەنىپ, سوعىس بىتكەنشە تراكتور ايدادىم. ءبىرىنشى شىققان تەمىر دوڭعالاقتى تراكتور, كابيناسى جوق, تىزگىنى اۋىر, ءجيى توقتاپ قالادى, استىنا جاتىپ, ۇستىنە شىعىپ, ءوزىم جوندەپ الامىن. كيىم جوق, جالاڭاياق ءجۇرىپ ەڭبەك ەتتىك. ەگىن ەكتىك. ونى ورىپ, شاۋىپ نان قىلدىق. جۇرتتى اسىراپ, بالا تاربيەلەدىك. ىستەگەن جۇمىسىمىزعا اقى سۇرامادىق. بەرسە, ءبىر كەلى بيداي بەرەدى. اش-جالاڭاش ءجۇرىپ, سونىڭ بارىنە توزدىك. ادامنىڭ باسىنان قانداي قيىنشىلىق ءوتىپ جاتىر, بارىنە شىدامدىلىق كەرەك. ال ەندى قازىر قانداي راقات, ويىن-كۇلكى, قايدا بارساڭ دا, جول اشىق. جاستارعا, بالالارعا باقىت, اماندىق بەرسىن, زامان تىنىش بولسىن!», دەيدى كەيۋانا.
قوستاناي وبلىسى