تاۋ الىستان قاراعاندا سۋىق, سۇستى كورىنەدى. ال جاقىنداپ بارساڭ, تاۋ مۇلدە جاتىرقامايدى, سەنىمەن سويلەسەدى, بارا-بارا تاۋ سەنىڭ دوسىڭا, اينىماس سەرىگىڭە اينالادى. ساعان قۇشاعىن كەڭ اشادى.
قۇشاعىنا ەنگەنىڭدە سىلدىراپ اققان بۇلاعى دا, جايقالىپ وسكەن قۇراعى دا سەنىمەن سىرلاسا باستايدى. سوندايدا وزگەشە ءبىر كۇي كەشىپ, مۇزداعان جانىڭ جىلىنادى, قۋات الاسىڭ. تاۋدىڭ سۋىق ەمەستىگىن جان دۇنيەڭمەن سەزىنەسىڭ. تاۋ باۋرايىندا دۇنيەگە كەلىپ, تاۋ سامالى بەتىن وپكەن, تۇما بۇلاعىنان سۋسىنىن قاندىرىپ وسكەن جان ءومىر بويى تاۋدى اڭساپ جۇرەتىنى سوندىقتان با دەيمىن. ءوزىم دە تاۋدا ءوسىپ, تاۋدا ەرجەتتىم. تاۋ ماعان ءاردايىم ىستىق تارتىپ تۇرادى. مەن ءۇشىن بالداۋرەن شاعىم وتكەن قۋلىق تاۋدان بيىك – تاۋ جوق.
تاۋدا وسكەن جاندار تىم اسەرشىل, سەزىمتال, ارمانشىل كەلەدى. تابيعاتتىڭ ءتورت مەزگىلىندە تاۋدىڭ ءتۇرلى بەينەگە ەنەتىنى سياقتى تاۋلىقتاردىڭ مىنەزدەرى دە قىزىق, ەرەكشە. ارقايسىسى ءوزىن تاۋ باۋرايىنداعى ءبىر-ءبىر اسۋ سياقتى سەزىنەدى. تاۋدا تۋىپ, تاۋدا ءوسىپ, تاۋدا شىڭدالعان, تاۋ تۇلعالى اعالارىممەن سىرتتاي تانىسپىن, تاۋ تۋرالى, تۋعان ولكەمىز جايلى شىعارمالارىن وقىپ جۇرەمىن. ابزال اعالارىم تۋرالى تولعانعان ساتتە, اسىرەسە, مەنىڭ كوز الدىما كورنەكتى جازۋشى, قازاقستاننىڭ ەڭبەك سىڭىرگەن قايراتكەرى, حالىقارالىق «الاش» ادەبي سىيلىعىنىڭ لاۋرەاتى, فيلولوگيا عىلىمدارىنىڭ كانديداتى, رايىمبەك اۋدانىنىڭ قۇرمەتتى ازاماتى تۇرلىبەك مامەسەيىت كەلەدى.
الماتىدا جۇرگەنىمدە جازۋشىنىڭ نارىنقولدان ەكەنىن شىعارمالارى ارقىلى بىلەتىن ەدىم. كەيىننەن استانادا تۇرلىبەك اعانى «ەلوردا» باسپاسىنا باس رەداكتور بولىپ قىزمەتكە كەلگەندە كوردىم. بىردەن ارالاسىپ كەتە المادىق. اماندىق-ساۋلىقتان ءارى اسپادىق. تاۋ مىنەزدى جاندار ەمەسپىز بە؟ سارىارقا تورىنە قونىس اۋدارعان جازۋشى شىعارماشىلىقپەن ءونىمدى اينالىستى. ءحانتاڭىرىن ەرەكشە ساعىنۋمەن جۇرگەن قالامگەر بار كۇش-جىگەرىن, قابىلەت-قارىمىن ءحانتاڭىرىنىڭ باۋرايىندا وتكەن بالداۋرەن شاقتا كورگەن-بىلگەن, كوكەيىنە تۇيگەن, زەردەسىنە توقىعان وقيعالاردى اق قاعازدا ءتىرىلتتى. ەل مەن جەر تاريحىن, ءحانتاڭىرى باۋرايىنداعى كومەسكى تارتقان شەجىرەنى ساناسىندا قايتا جاڭعىرتىپ, شىعارمالارىنا ارقاۋ ەتتى. رەسپۋبليكالىق باسىلىمداردا اڭگىمە, حيكاياتتارى ءجيى جارىق كورەتىن. كىتاپتارى دا وقىرماندارعا جول تارتىپ جاتتى.
تۇرلىبەك اعا سىرتتاي قاراعاندا ادامعا ءبىر ءتۇرلى سۋىقتاۋ كورىنەتىن. مىنەزى دە ءتىپ-تىك, كوپ اشىلا بەرمەيدى. اماندىقتان اسا المايتىن ەدىك. جۇمىس بابىمەن اندا-ساندا «ەلوردا» باسپاسىنا بارىپ قالعان ساتتەردە قىسقا عانا تىلدەسىپ, جۇمىس جايىن ءسوز ەتىپ, ءوز جونىمە كەتەتىن ەدىم. مەنىڭ دە مىنەزىم تۇيىقتاۋ. اعالى-ءىنىلى بولىپ شەشىلىپ سويلەسكەنىمىز كەيىن عوي. تاۋدى قالىڭ بۇلت باسىپ, داۋىل تۇرىپ, اينالانىڭ استان-كەستەنى شىعىپ, ەرتەسى كۇن شايداي اشىلىپ, تۇك بولماعانداي تاۋ باۋرايى شۋاققا بولەنەتىن شاقتار بار عوي. سونداي ءبىر جايدارى كەزدە تۇرلىبەك اعامەن تىلدەسىپ قالعانىم بار. اعانىڭ ماعان ىقىلاسى اۋىپ, ارامىزدى سىيلاستىق ءجىبى جالعاپ ەدى. مەنى «ۇكىمەت بالا» دەيتىن. ءومىرىنىڭ سوڭىنا دەيىن وسىلاي اتاپ كەتتى جارىقتىق.
تۇرلىبەك اعانىڭ مىنەزى تاۋ مىنەزىنە ۇقساس ەكەنىن شىعارمالارىن وقىعاننان كەيىن بارىپ جەتە تۇسىنە باستادىم. ول مەيلى اڭگىمە بولسىن, حيكايات بولسىن, جازعان دۇنيەسىنىڭ كوركەمدىك دەڭگەيىنە ىشتەي سۇيسىنەسىڭ. سونداي ساتتەردە تۋىندىلارى ارقىلى جازۋشىنىڭ جان سىرىن ۇعىنىپ, مىنەزىنىڭ قالتارىسىن تاني تۇسەسىڭ. سۋرەتكەردىڭ وزىندىك ستيلىنە, وزگەشە قولتاڭباسىنا, شۇرايلى تىلىنە, تىڭ وبرازعا, سوزبەن سۋرەت سالعان شەبەرلىگىنە, وي تەرەڭدىگىنە, جادىنىڭ مىقتىلىعىنا ءتانتى بولاسىڭ. بىلايعى تىرلىكتە كوپ سويلەمەيدى, جان دۇنيەسى جۇمباق جان. ال تۋىندىلارى جۇرەگىڭنىڭ نازىك سەزىمدەرىن ءدال باسىپ, سان تولعانىسقا تۇسىرەدى, كەيىپكەرلەر ورتاسىندا ءوزىڭ جۇرەسىڭ, ولارمەن بىرگە كۇرسىنەسىڭ, بىرگە مۇڭاياسىڭ, جاقسىلىعىنا جۇرەگىڭ جارىلا قوسا قۋاناسىڭ. سۋرەتكەردىڭ سىرشىل, شىنشىل تۋىندىلارىنا قۇنىعا باس قوياسىڭ. كوركەمسوز شەبەرىنە دەگەن قۇرمەتىڭ, اعاعا دەگەن ءىلتيپاتىڭ كۇننەن-كۇنگە ارتا بەرەدى. تاۋ مىنەزدى جانعا بويىڭ ابدەن ۇيرەنەدى. كوپشىلىك ورتادان سىرتتاۋ, ءوز الەمىمەن ءوزى بولىپ جۇرەتىن قالامگەردىڭ بەكزات بولمىسىن كوركەم دۇنيەلەرىن وقىعان جان عانا تەرەڭ تۇسىنە باستايدى.
جازۋشىنىڭ بۇكىل شىعارماشىلىعىنىڭ تەمىرقازىعى – ەل-جەر, تۋعان ولكە تاريحى, ادام تاعدىرى, تابيعاتتىڭ تىلسىم سىرلارى ما دەرسىڭ. تابيعاتتىڭ نەبىر قۇبىلىستارى كەيىپكەرلەر مىنەز-قۇلقىمەن جىمداسىپ, استاسىپ جاتادى. تاۋ تۋرالى ءسوز قوزعاسا بولدى, ونىڭ ءار تاسى سىر شەرتەدى, ءار ءتۇپ جۋسانى, ءيسى اڭقىعان سان ءتۇرلى گۇلدەرى, جاسىل شالعىنى, ءمولدىر بۇلاعى سويلەپ قويا بەرەدى. اسپاندا جوڭكىلگەن بۇلت ەكەش بۇلت تا ەرەكشە سۋرەتتەلىپ, ادام جانىنىڭ يىرىمدەرىمەن بىتە قايناسىپ, مۇلدە بولەك كوركەم بەينەنى كوز الدىڭا اكەلەدى. مىسالى, جازۋشى «قاندى قۇيىن» اتتى حيكاياتىندا اتاقتى قارقارا جايلاۋىن بىلايشا سۋرەتتەيدى: «كەرۋەن قۇرعان كوگىلدىر تاۋلاردى بوكتەرلەي, لاباسىدان قىرعىزدىڭ سوناۋ قىزىل قياسىنا دەيىن كولبەپ, مىڭجىلقىنىڭ توسكەيىنەن كەگەننىڭ اڭعارىنا شەيىن كوسىلىپ, بالبىراپ جاتقان, ادامعا قونىس, مالعا ءورىس بولعان شۇرايلى ولكە, شۇرايلى مەكەن بۇل. كىلەمدەي جايناعان كەڭ القاپتىڭ قاق ورتاسىنان يرەلەڭدەي سوزىلعان قارقارا وزەنى جايلاۋ توسىنە ەرەكشە ءسان بەرە, ورنەك سالا اعادى. كوك شالعىنعا مالىنىپ, تۇنىپ تۇرعان تاۋلى ءوڭىردىڭ ماساتىداي قۇلپىرعان ءتۇرلى شوپتەرى مەن الۋان گ ۇلىنىڭ ءيسى ءلۇپ ەتكەن سامالمەن جۇپارداي اڭقيدى. سىلدىراپ اققان ءمولدىر بۇلاقتاردى جيەكتەپ مايدا بۇتالار, بەتكەيلەردى توبىلعى, ساي تاباندارىن تال مەن قايىڭ, ۇشقات پەن شەتەن كومكەرگەن. بوكتەرىن ارشا مەن شىرشا جاپقان تاۋ ءتوسى, اق باستى الىپ شىڭدارمەن استاسا بارىپ, اسقاقتاپ, اسپانداپ كورىنەدى» («تاۋ مىنەزى» كىتابىنان).
سۋرەتكەر شەبەرلىگى دەگەن, شىركىن, وسى ەكەن عوي دەپ ويلايسىڭ. بۇل – جازۋشىنىڭ شىعارمالارىنا ءتان ەرەكشەلىك, قالامگەرلىك قايتالانباس ءستيلى, سۋرەتكەرلىك قىرى. وسىندايدا جازۋشىلىق, اسىرەسە, مۇنداي سۋرەتكەرلىك اللا اركىمنىڭ ماڭدايىنا جازا بەرمەيتىن قۇبىلىس, باق-نەسىبە ەكەنىن مويىندايسىڭ. جازۋشىلىق – وقيعانى بايانداۋ نەمەسە اسەرلەپ جەتكىزۋ ەمەس, ول دەگەنىڭىز – سوزبەن ورنەك سالۋ, كوركەم وبراز سومداۋ.
جازۋشى شىعارمالارىمەن سۋسىنداعان سايىن وزىمشە جاڭالىق اشقانداي بولامىن. سوندايدا تۇرلىبەك اعانىڭ كوپسوزدىلىككە بوي الدىرمايتىن, ارزان كۇلكىگە جوق سىرىنىڭ ءمانى – ۇنەمى وي ۇستىندە جۇرەتىندىگىندە بولار دەگەن ويعا قالامىن. جازاتىن تۋىندىسىن, كەيىپكەرلەر وبرازىن, وقيعالار كومپوزيتسياسىن كوكەيىندە قورىتىپ, جۇرەگىنەن وتكىزىپ, قاعازعا تۇسىرەتىن قاسيەتى – شىعارماشىلىق لابوراتورياسىنىڭ ەرەكشەلىگى.
جازۋشى شىعارمالارىندا ءحانتاڭىرى شىڭى بارلىق قىرىنان اشىلىپ سۋرەتتەلگەن. ونىڭ ء«حانتاڭىرىنىڭ باۋرايىندا جالعىز شىرشا» دەگەن كولەمدى اڭگىمەسى كەزىندە «قازاق ادەبيەتى» گازەتىندە جاريالاندى. وقىپ شىعىپ, تۇرلىبەك اعانى قۇتتىقتاپ, ءوز پىكىرىمدى ايتتىم. اعا جىلى لەبىزىمدى تىڭداپ: «بۇل حيكاياتىمنان الىنىپ, قىسقارتىلىپ بەرىلگەن نۇسقاسى عوي» دەدى. «اعا, اڭگىمەنىڭ جۇگىن دە كوتەرىپ تۇر» دەپ, العان اسەرىمدى بولىسكەن ەدىم.
جازۋشىنىڭ ء«حانتاڭىرى باۋرايىنداعى جالعىز شىرشا» وقيعاسى «تاۋ مىنەزى» حيكاياتىندا باياندالادى. اسپانمەن استاسقان حانتاڭىرىدەن عانا ەمەس, اسقاق الاتاۋدان الىستاعان سايىن جۇرەگى نازىك, جانى جالعىز, ويى سەرگەك, زەردەلى جازۋشى قۋاتتى قالامىن ءبىر ءسات تە قولىنان تۇسىرگەن ەمەس, ۇنەمى ىزدەنىستە بولىپ, ۇدايى شەبەرلىگىن شىڭداي تۇسكەن. وعان كوركەمدىگى جوعارى اڭگىمە-حيكاياتتارى, روماندارى, پۋبليتسيستيكالىق شىعارمالارى ايقىن دالەل.
تۇرلىبەك مامەسەيىتتىڭ بىلتىر جارىق كورگەن «تاۋ مىنەزى» كىتابىنا «اتا جۇرت», «قاندى قۇيىن», «اڭشى» جانە «تاۋ مىنەزى» اتتى حيكاياتتارى ەنگەن. بۇل جيناعىن جازۋشى ءوزى ىرىكتەپ, دايىنداپ, كەزىندە ءوزى بارىپ مينيسترلىك ماماندارىنا وتكىزگەن. مادەنيەت جانە اقپارات مينيسترلىگىنىڭ باعدارلاماسى بويىنشا كىتاپ بولىپ جارىق كورىپ, وقىرمانعا جول تارتتى.
قالامگەر بۇل جيناعىن باسپاعا ازىرلەگەندە بىرىڭعاي تاقىرىپتاعى ءتورت حيكاياتىن توپتاستىرعانىندا دا ۇلكەن ماعىنا بار. كىتاپقا ەنگەن حيكاياتتاردا سۋرەتتەلەتىن تاقىرىپتار: تابيعات, تۋعان جەر, ادام جانە تاعدىر. وندا اسپانتاۋلار اياسىن مەكەن ەتكەن ادامداردىڭ جانكەشتى تىرلىگى, قارقارا كوتەرىلىسى, كەڭەستىك سولاقاي ساياساتتىڭ اياۋسىز سوققىسىنا تاپ بولىپ, جازىقسىزدان-جازىقسىز قۋعىن كورىپ, بۇكىل ءبىر اۋىلدىڭ تۇگەلىمەن قىزىل قىرعىنعا ۇشىراعان اۋىر تاعدىرى كوركەم تىلمەن سومدالعان.
ءتورت حيكاياتتىڭ قاي-قايسىسىن دا تەبىرەنبەي, تولقىماي وقۋ مۇمكىن ەمەس. جازۋشى ەڭبەك دەمالىسىن العان كەزىندە قۇستاي ۇشىپ, استانادان اۋىلىنا, ودان ءارى حانتاڭىرىنە جەتۋگە اسىعا-تۇعىن. اپتاپ ساعىنىشى ءحانتاڭىرىنىڭ ساۋمال-سامالىمەن تىنىستاعاندا عانا باسىلىپ, تاۋ باۋرايىنداعى جالعىز شىرشانىڭ جايقالىپ وسكەنىن ءار كورگەن سايىن جانى جاي تاباتىن بولعان. اتاپ ايتار بولسام, «تاۋ مىنەزى» حيكاياتىنداعى ءبىر عانا دەتال, جالعىز شىرشا وقيعاسى وسىنداي وي تۇيۋگە جەتەلەيدى. جازۋشى بالا كەزىندە جالعىز شىرشا تۋرالى اكەسىنەن ەستىگەن وقيعانى جەرىنە جەتكىزە سۋرەتتەيدى. اكەسىنىڭ ايتۋىنشا, كەڭەستىك قىسىمعا شىداماعان اۋىل تۇرعىندارى ءدوڭارشا اسۋى ارقىلى ارعى بەتكە اسپاق بولادى. الايدا ارادان ساتقىن شىعىپ, ءتيىستى ورگاندارعا حابارلاپ قويادى. سولداتتار اۋىل تۇرعىندارىن قۋىپ جەتىپ, وقتىڭ استىنا الىپ, بالا-شاعا, قارتتارعا دەيىن الدارىنا سالىپ, اۋىلعا قايتا ايداپ اپارادى, سودان كەيىن سۇراق-جاۋاپ الۋ, ت.ب. سۇرەڭسىز تىرلىك باستالادى. وسى وقيعانى جازۋشى بىلايشا وربىتەدى: «…انوۋ اۋليەشوقىنىڭ شىعىس جاعىنداعى سايدى كوردىڭ عوي. سودان اسپاق بولعان. سول اسۋدىڭ مۇزىنا كيىز توسەپ, كوشتىڭ الدى وتە بەرگەندە, مىنا اۋىلعا قۋعىنشى اسكەر كەلىپ جەتىپتى. جولدى ەشكىم بىلمەيدى, اسكەردىڭ ءبارى ورىس. سوندا, اۋىلدا ءالى بار, اتىن ايتپاي-اق قويايىن, ءاي, وپاسىز-اي, سول باستاپ كەلىپ, كوشتىڭ ۇستىنەن تۇسىرگەن عوي.
كوشكەن ەل جاڭاعى ءدوڭارشانىڭ ۇستىنە قاراۋىل قويعان. ول جەردەن تومەنگى اڭعار تۇگەل كورىنەدى. باسقا جول جوق. اسكەرلەردى باستاپ كەلگەن الگى جول كورسەتۋشى ەكىاشادان كەيىن ءاسۋتوردى ورلەپ, مىنا جانىمىزداعى سارىكوسەنىڭ اسۋىمەن كەلىپ تۋرا كوشتىڭ ۇستىنەن تۇسىرەدى. اۋەلى ءدوڭارشانىڭ ۇستىندەگى كۇزەتتى قاراۋىلعا الادى. قاپەرسىز وتىرعان جاس جىگىتتەردى وقتىڭ استىنا الىپ, ورىس اسكەرى شۇرىپپەنى باسىپ قالعاندا, تاس ۇستىندەگى ەكەۋدىڭ ءبىرى دومالاپ ءتۇسىپ, سۇلق قالادى دا, ەكىنشىسى ىرشىپ ءتۇسىپ, تاستى تاسالانىپ اتىسا باستايدى…» («تاۋ مىنەزى» كىتابىنان).
جازۋشىنىڭ بايانداۋىنشا, اتىس-شابىستان كەيىن وققا ۇشقان ەكەۋدىڭ ءبىرى ءولىپ, ءبىرى ءتىرى جاتقان. «بايعۇس بالا بىرەۋدىڭ جالعىزى ەكەن. قىرشىنىنان قيىلدى. الگى سەن باعانا تاڭعالا سۇراعان شىلىك اراسىنداعى جالعىز شىرشا-جالعىز قاراعاي وسى بەيكۇنا بوزداقتىڭ كوزى, بەلگىسى شىعار. سونىڭ رۋحىنا اللا تاعالانىڭ جىبەرگەن ەسكەرتكىشى شىعار…» دەگەن اكە ءسوزىن كەلتىرە وتىرىپ, جازۋشى زوبالاڭنىڭ زاردابىن تارتقان حالىقتىڭ قيلى كەزەڭدەگى تاعدىرىن كوز الدىمىزعا اكەلەدى.
جالپى, بۇل حيكاياتقا كەڭىرەك توقتالىپ, كەيىپكەرلەر تولعانىسىن كەلتىرۋىمىزگە سەبەپ – جازۋشى ءحانتاڭىرى باۋرايىنداعى جالعىز شىرشا وبرازىن سومداۋ ارقىلى كەشەگى كەڭەستىك ساياسات قۇربانىنا اينالعان اۋىلداستارىنا, بەيكۇنا بوزداقتارعا وسى شىعارماسىمەن ۇمىتىلماستاي ەسكەرتكىش قويۋدى ماقسات ەتكەندەي. جازۋشى ول ماقساتىنا جەتكەن.
تاعى ءبىر اتاپ وتەرىمىز, ارادا قانشاما جىلدار وتسە دە جازۋشى اۋىلعا بارعان سايىن ءحانتاڭىرى باۋرايىنداعى جالعىز شىرشانى ءوز كوزىمەن ءبىر كورۋگە اڭسارى اۋىپ تۇراتىن بولعان. جالعىز شىرشا – ول ءۇشىن قىمبات قۇندىلىق, بالالىق شاعىنىڭ ساۋلەتتى ءبىر ەلەسى عانا ەمەس, ارداقتى اكە ايتقان شەرلى شەجىرە عانا ەمەس, جالعىز شىرشا – ءحانتاڭىرى باۋرايىندا ازاتتىققا ۇمتىلعان بوزداقتاردىڭ كوز جاسىمەن سۋارىلىپ, جاراتقان يەمىزدىڭ قۇدىرەتىمەن ءدوڭارشادا بوي تىكتەگەن جۇمباق قۇبىلىس. ولاردى ۇمىتپاۋىمىز ءۇشىن بىزگە جاراتىلىستىڭ تارتقان سىيى شىعار, بالكىم.
تاۋ باۋرايىندا دۇنيەگە كەلىپ, تاۋ سامالى بەتىن وپكەن, تۇما بۇلاعىنان سۋسىنىن قاندىرىپ وسكەن جان ءومىر بويى تاۋدى اڭساۋمەن بولادى. تۇرلىبەك اعا دا ءحانتاڭىرىن ءجيى ساعىناتىنىن, ەشقاشان ويىنان دا, سوزىنەن دە ءبىر ءسات تاستامايتىنىن قارىمدى قالامگەردىڭ جارى, فيلولوگيا عىلىمدارىنىڭ كانديداتى, ەۇۋ-دىڭ قاۋىمداستىرىلعان پروفەسسورى گۇلنار ماماەۆا ءجيى ايتىپ وتىرادى. «اۋىلعا سوڭعى بارىپ كەلىپ جازعان شىعارماسى – «تاۋ مىنەزى» حيكاياتى. ءحانتاڭىرىن سوڭعى رەت كورىپ, قوشتاسىپ قايتقان سياقتى بولىپ كورىنەدى كەيدە ماعان... تۇرەكەڭدى كەڭسايعا جەرلەپ قايتقان سوڭ, ۇلى نارتاي ماعان «تاتە, قاراڭىزشى, پاپام تاۋعا قاراپ جاتىر عوي» دەدى. قاراسام, تۇرەكەڭ الاتاۋعا قاراپ جاتىر ەكەن» دەپ ەدى ءبىر سوزىندە گۇلنار بەيسەنقىزى. تاۋ-تۇلعاعا توپىراق ايبىندى الاتاۋ باۋرايىنان بۇيىرىپتى.
ءيا, جازۋشى ءومىر بويى اۋليەشوقىسىن قالامىنىڭ قۋاتى جەتكەنشە سۋرەتتەپ ءوتتى. تۇرلىبەك اعا جازعى ءبىر دەمالىسىندا ءحانتاڭىرىنىڭ باۋرايىنا بارىپ, جالعىز شىرشانى بەتكە الىپ سۋرەتكە ءتۇسىپ, سارتاپ ساعىنىشىن باسىپ قايتقانىن ءبىز مىسالعا كەلتىرىپ وتىرعان حيكاياتىندا جازعان. سول سوڭعى ساپارى ەكەن-اۋ. تۋعان جەر كورىنىستەرىن تاعى ءبىر رەت زەردەسىنە مىقتاپ توقىپ الىپ, «تاۋ مىنەزى» حيكاياتىنا نۇكتە قويىپ, وقىرمانعا مۇرا ەتىپ قالدىرۋىنا مۇمكىندىك بەرگەن اللا نەتكەن قۇدىرەتتى دەسەڭىزشى!..
«تاۋ مىنەزى» كىتابىن قولىما العان سايىن جازۋشى تۇرلىبەك مامەسەيىتتىڭ بولمىس-ءبىتىمى, تۇلعاسى كوز الدىما كەلەدى. ارتىندا ۇل-قىزىنان وربىگەن ۇرپاقتارى, جاناشىر جارى, تىلەكتەس, تىلەۋلەس دوس-جاراندارى مەن تۋعان-تۋىستارى, ەۋرازيا ۇلتتىق ۋنيۆەرسيتەتىندە ءتالىمىن العان دارىندى شاكىرتتەرى جانە وشپەس مۇراسى – كوركەم شىعارمالارىمەن سۋسىندايتىن قالىڭ وقىرمانى باردا, كوركەمسوز شەبەرىنىڭ ارداقتى ەسىمى ەشقاشان ۇمىتىلمايدى دەپ ويلايمىن.
...كەي-كەيدە تۇرلىبەك اعانىڭ ء«اي, ۇكىمەت بالا» دەگەن ءسوزى قۇلاعىما كەلگەندەي بولادى...
نۇرلان قالقا,
حالىقارالىق «الاش» ادەبي سىيلىعىنىڭ لاۋرەاتى