پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا مەن تۋريزم جانە سپورت ءمينيسترى ەربول مىرزابوسىنوۆ الماتى وبلىسىنداعى تۋريستىك نىسانداردىڭ جازعى ماۋسىمعا دايىندىعىن تەكسەردى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
جۇمىس ساپارىنا ورتالىق مەملەكەتتىك ورگانداردىڭ, ۇكىمەت اپپاراتىنىڭ وكىلدەرى, سونداي-اق الماتى وبلىسىنىڭ اكىمى مارات سۇلتانعازيەۆ قاتىستى.
تەكسەرۋ بارىسىندا قوناەۆ قالاسىنداعى كوممۋنالدىق جاعاجايلار مەن «ASP Arena» كوپفۋنكتسيونالدى كەشەنى قارالدى. وبلىس اكىمدىگى مەن بەيىندى قىزمەتتەر سانيتاريالىق دايىندىق, قاۋىپسىزدىك شارالارى, مەديتسينالىق, قۇتقارۋ جانە قۇقىق قورعاۋ قىزمەتتەرىنىڭ جۇمىسى, سونداي-اق دەمالۋشىلارعا قولايلى جاعداي جاساۋ جونىندە باياندادى.
ايدا بالاەۆا نىسانداردىڭ تولىق دايىندىعىن ءدال قازىردەن باستاپ قامتاماسىز ەتۋ قاجەتتىگىنە ەرەكشە نازار اۋداردى. سونىمەن قاتار حالىقپەن ۋاقىتىلى ءتۇسىندىرۋ جۇمىستارىن جۇرگىزۋدىڭ, سۋداعى قاۋىپسىزدىكتى, ازىق-ت ۇلىك قاۋىپسىزدىگىن قامتاماسىز ەتۋدىڭ جانە قوعامدىق ءتارتىپتى ساقتاۋدىڭ ماڭىزدىلىعىن اتاپ ءوتتى.
ۇكىمەت جاڭا كونستيتۋتسيانى ءتۇسىندىرۋ جونىندەگى ءىس-شارالار جوسپارىن بەكىتتى
سونىمەن بىرگە بارلىق جاعاجايلار مەن دەمالىس ايماقتارى اكىمدىكتەردىڭ قاراۋىندا ەمەس ەكەنى دە ارنايى ايتىلدى. وسىعان بايلانىستى ايدا بالاەۆا جەكەمەنشىك نىسانداردىڭ يەلەرى دە تازالىققا, قوعامدىق تارتىپكە, ينفراقۇرىلىمنىڭ جاي-كۇيىنە جانە ەڭ الدىمەن ادامداردىڭ سۋداعى قاۋىپسىزدىگىنە تولىق جاۋاپكەرشىلىكپەن قاراۋعا ءتيىس ەكەنىن ايتتى. وبلىس اكىمدىگىنە دەمالىس ايماقتارى يەلەرىنىڭ اتىنا قاۋىپسىزدىكتى قامتاماسىز ەتۋ, سانيتاريالىق تالاپتاردى ساقتاۋ جانە جازعى ماۋسىم كەزەڭىندە جۇمىستى ءتيىستى دەڭگەيدە ۇيىمداستىرۋ جونىندەگى ۇسىنىمدار قامتىلعان ءتيىستى حابارلامالار ازىرلەۋ تاپسىرىلدى.
بۇدان بولەك, تۋريزم جانە سپورت مينيسترىنە تۋريستىك نىساندار يەلەرى مەن جەكە كومپانيالاردىڭ قاجەتتى ينفراقۇرىلىمدى قامتاماسىز ەتۋىنە, قاۋىپسىزدىك تالاپتارىن ساقتاۋىنا جانە بەلگىلەنگەن نورمالاردى ورىنداۋىنا قاتىستى جاۋاپكەرشىلىگىن رەتتەيتىن قۇقىقتىق تەتىكتەردى پىسىقتاۋ تاپسىرىلدى. جەكەمەنشىك دەمالىس ايماقتارى ازاماتتار مەن مەملەكەت الدىنداعى ءتيىستى جاۋاپكەرشىلىكسىز تەك كوممەرتسيالىق قىزمەتپەن عانا شەكتەلمەۋگە ءتيىس ەكەنى باسا ايتىلدى.
2029 جىلعا دەيىن حالىقتىڭ تابىسى قالاي ارتادى؟ ۇكىمەت جاڭا باعدارلاما ازىرلەپ جاتىر
پرەمەر-ءمينيستردىڭ ورىنباسارى تۋريستىك ايماقتاردا جۇمىس ىستەيتىن قوعامدىق تاماقتانۋ ورىندارى مەن وزگە دە سەرۆيستىك نىساندار قىزمەتىنىڭ زاڭدىلىعىن باقىلاۋ قاجەتتىگىنە دە ايرىقشا نازار اۋداردى. ۋاكىلەتتى ورگاندارعا ەڭبەك زاڭناماسىنىڭ ساقتالۋىن, قىزمەتكەرلەرمەن, ونىڭ ىشىندە جۇمىسقا تارتىلاتىن جاستارمەن جانە ستۋدەنتتەرمەن جاسالعان ەڭبەك شارتتارىنىڭ بولۋىن, سونداي-اق ەڭبەك قاۋىپسىزدىگى تالاپتارىنىڭ ورىندالۋىن تەكسەرۋدى قامتاماسىز ەتۋ تاپسىرىلدى. ازاماتتاردىڭ قۇقىقتارى تولىق كولەمدە ساقتالۋعا ءتيىس ەكەنى اتاپ ءوتىلدى. بۇل دەمالۋشىلاردىڭ دا, جەرگىلىكتى تۇرعىندار مەن قىزمەتكەرلەردىڭ دە قۇقىقتارىنا بىردەي قاتىستى.
سونىمەن قاتار كولىك لوگيستيكاسى, اۆتوتۇراقتاردىڭ جەتكىلىكتىلىگى, جول قوزعالىسىن ۇيىمداستىرۋ جانە جاپپاي دەمالىس ورىندارىنداعى كولىك اعىنىن رەتتەۋ ماسەلەسى دە كوتەرىلدى. قوعامدىق ءتارتىپ پەن قاۋىپسىزدىك تالاپتارىن بۇزۋعا قاتاڭ ارەكەت ەتۋ قاجەتتىگى بولەك كورسەتىلدى. ايدا بالاەۆا بارلىق بەلگىلەنگەن تالاپتار مۇلتىكسىز ساقتالۋعا ءتيىس ەكەنىن, ال قۇقىق بۇزۋشىلارعا قاتىستى شارالار ۋاقتىلى ءارى زاڭناماعا سايكەس قابىلدانۋى قاجەت ەكەنىن اتاپ ءوتتى.
«تازا قازاقستان يدەولوگياسى جاي ۇران بولىپ قالماي, تۋريستىك نىسانداردىڭ جاي-كۇيىنەن كورىنىس تابۋى كەرەك. ول تازالىقتان, تارتىپتەن, كەڭىستىكتىڭ تۇسىنىكتى ۇيىمداستىرىلۋىنان جانە ورتاق دەمالىس ورنىنا دەگەن قۇرمەتتەن بايقالۋعا ءتيىس. ال «زاڭ مەن ءتارتىپ» قاعيداتى بارلىق قىزمەتتىڭ ناقتى ءارى ۇيلەسىمدى جۇمىسىنان جانە قاۋىپسىزدىك تالاپتارى مەن قوعامدىق ءتارتىپ نورمالارىن بۇزعاندارعا قاتىستى شارالاردىڭ بۇلتارتپاي قولدانىلۋىنان كورىنۋى قاجەت», دەدى ايدا بالاەۆا.
جۇمىس ساپارىنىڭ قورىتىندىسى بويىنشا پرەمەر-ءمينيستردىڭ ورىنباسارى اۋماقتاردىڭ سانيتاريالىق جاعدايىن كۇشەيتۋدى, ينفراقۇرىلىم مەن قاۋىپسىزدىك قىزمەتتەرىنىڭ دايىندىعىن قامتاماسىز ەتۋدى, حالىقپەن پروفيلاكتيكالىق ءتۇسىندىرۋ جۇمىستارىن جانداندىرۋدى, سونداي-اق كوممۋنالدىق جانە جەكەمەنشىك دەمالىس نىساندارىنا جۇيەلى باقىلاۋ ورناتۋدى تاپسىردى. سونىمەن بىرگە زاڭدىلىقتىڭ ساقتالۋىنا, ازاماتتاردىڭ ەڭبەك قۇقىقتارىن قورعالۋىنا جانە مەنشىك يەلەرىنىڭ قاۋىپسىزدىك, ءتارتىپ پەن كورسەتىلەتىن قىزمەت ساپاسى ءۇشىن جاۋاپكەرشىلىگىنە ەرەكشە ءمان بەرىلدى.