ونەركاسىپ جانە قۇرىلىس مينيسترلىگىنىڭ مالىمەتىنشە, قازاقستاندا كارىز تازارتۋ قۇرىلعىلارىنىڭ توزۋ دەڭگەيى 65%-عا جەتكەن. بيىل بۇل جۇيەلەردى جاڭعىرتۋعا بيۋدجەتتەن 25 ملرد تەڭگە ءبولىنىپ, قىزىلوردا مەن لەنگەر قالالارىندا ءىرى جوبالار قولعا الىندى, دەپ حابارلايدى Egemen.kz.
بۇل قاراجات كارىز جۇيەلەرىن جاڭعىرتۋ مەن قايتا جاڭارتۋ جوبالارىنا باعىتتالۋدا. ونىڭ ىشىندە:
قىزىلوردا قالاسىنىڭ كارىز تازارتۋ قۇرىلعىسىنا – 720 ميلليون تەڭگە,
لەنگەر قالاسىنىڭ كارىز جۇيەسىن جاڭعىرتۋعا – 1 ميلليارد تەڭگە قاراستىرىلعان.
سونداي-اق, اقتاۋ, اتىراۋ, قارقارالى جانە قاراجال قالالارىندا سۋ بۇرۋ جۇيەلەرىن جاڭارتۋعا ارنالعان 4 جوبا جۇزەگە اسىرىلىپ جاتىر.
جالپى «كوممۋنالدىق جانە ەنەرگەتيكا سەكتورلاردى جاڭعىرتۋ» ۇلتتىق جوباسى اياسىندا 45 قالادا كارىز تازارتۋ قۇرىلعىلارى جاڭعىرتىلىپ, 2,8 شاقىرىم سۋ بۇرۋ جانە 5 مىڭ شاقىرىم سۋ قۇبىرى جەلىلەرى جاڭارتۋ جوسپارلانىپ جاتىر.
سونىمەن قاتار, 2029 جىلعا قاراي سۋ قۇبىرى جەلىلەرىنىڭ توزۋىن 39%-دان 33%-عا دەيىن تومەندەتۋ كوزدەلگەن. «2029 جىلعا قاراي ۇلتتىق جوبا اياسىندا سۋمەن جابدىقتاۋ جانە سۋ بۇرۋ جەلىلەرىنىڭ توزۋ دەڭگەيىن تومەندەتۋ ماقساتىندا اۋقىمدى جاڭعىرتۋ جۇمىستارىن جۇرگىزۋ جوسپارلانعان. اتاپ ايتقاندا, سۋ قۇبىرى جەلىلەرىنىڭ توزۋ دەڭگەيىن اعىمداعى 39%-دان 33%-عا دەيىن, ال سۋ بۇرۋ جۇيەلەرىنىڭ توزۋىن 41%-عا دەيىن تومەندەتۋ جوسپارلانۋدا», دەلىنگەن حابارلامادا. بۇل ءىس-شارالاردى جۇزەگە اسىرۋ ينفراقۇرىلىمنىڭ تيىمدىلىگىن ارتتىرۋعا جانە وڭىرلەردەگى ەكولوگيالىق جاعدايدى جاقسارتۋعا باعىتتالعان.