تاراز. 4 تامىز. وتكەن شىلدە ايىندا «قورداي» كەدەندىك باقىلاۋ ايماعىنىڭ كەدەنشىلەرى شەكارا قىزمەتكەرلەرىمەن بىرلەسە وتىرىپ, ەسىرتكى الىپ ءوتۋدىڭ ءۇش فاكتىسىنىڭ جولىن كەسكەن بولاتىن. ناتيجەسىندە 52 كيلوگرامنان اسا ەسىرتكىلىك زات – گەروين تاركىلەندى. بۇل تۋرالى egemen.kz ءتىلشىسى حابارلادى.
جامبىل وبلىستىق مەملەكەتتىك كىرىستەر دەپارتامەنتى «قورداي» كەدەنى باسشىسىنىڭ ورىنباسارى بەكەن نۇراحمەتوۆ ۇستالعانداردىڭ بارلىعى قىرعىز ازاماتتارى ەكەنىن مالىمدەدى.
سونداي-اق جاقىندا «قاراسۋ» كەدەن بەكەتىندە تۇنگى ساعات 11-لەر شاماسىندا مەملەكەتتىك نومەرى S5059AH «ۆولگا 3110» ماركالى اۆتوكولىك توقتاتىلىپ, سكانەرلىك تەكسەرۋدەن وتكىزۋ بارىسىندا ارتقى دوڭگەلەكتەرىنىڭ ۇستىڭگى قاپتالىندا كۇدىكتى زاتتىڭ ورنالاسقاندىعى بايقالدى. كۇدىك تۋدىرعان جاسىرىن جەردى شۇعىل تۇردە تەرەڭدەتە تەكسەرىپ قاراعان كەزدە ارنايى سكوتچپەن ورالعان 95 دانا بريكەت شىقتى. دەرەۋ تاعايىندالعان حيميالىق ساراپتاما ناتيجەسىندە ۇستالعان زات جالپى سالماعى 32 كيلوگرام 509,84 گرامم گەروين جانە 46,8 گرامم گاشيش ەكەنى انىقتالىپ, بۇل فاكتى بويىنشا قىلمىستىق كودەكستىڭ 286 بابى 2 تارماعىنىڭ 5 پۋنكتى نەگىزىندە قىلمىستىق ءىس قوزعالدى. قازىرگى ۋاقىتتا ەلىمىزدىڭ ۇلتتىق جانە مەملەكەتتىك قاۋىپسىزدىگىن قورعاۋ ماقساتىندا اسا ءىرى كولەمدەگى ەسىرتكىلىك زاتتى ۇستاپ, ەرەكشە قىراعىلىق تانىتقان كەدەن قىزمەتكەرلەرىن مەملەكەتتىك ماراپاتقا ۇسىنۋ ماسەلەسى قاراستىرىلۋدا.
ورالحان ءداۋىت.
دەرەك: egemen.kz.
سۋرەت: gurk.kz.