وبلىس ورتالىعىنىڭ كوشەلەرىنە جاڭا 44 اۆتوبۋس شىقتى. جاڭا كولىكتەر №24, №4, №35, №12 باعىتتاردا جولاۋشى تاسىمالداۋعا ماۋسىم ايىنىڭ سوڭىندا كىرىسەدى.
قازىر قالا اۋماعىندا 42 مارشرۋت جۇمىس ىستەيدى. وعان 331 اۆتوبۋس تارتىلعان. وبلىس ورتالىعىندا بەس تاسىمالداۋشى جولاۋشىلارعا قىزمەت كورسەتەدى. دەگەنمەن سەمەيدىڭ اۆتوبۋس پاركى كەيىنگى التى جىلدا جاڭارماعان, جاڭا اۆتوبۋس الىنباعان.
وبلىس اكىمدىگىنىڭ قولداۋىمەن «اۆتو ترانس سەمەي» جشس سەمەيدە جاسالعان 44 جاڭا اۆتوبۋستى ساتىپ الىپ, قالانىڭ كولىك جۇيەسىن جاڭارتتى. جاڭا كولىكتەر قالا تۇرعىندارىنا جايلى سالقىنداتۋ جۇيەسىمەن جابدىقتالعان. ەندى سەمەي جۇرتى العاش رەت سالقىنداتقىشى بار اۆتوبۋستارمەن جۇرەتىن بولادى. ءوڭىر باسشىسى الدا قالا اۆتوبۋسى كەزەڭ-كەزەڭىمەن جاڭارتىلا بەرەتىنىن ايتتى.
– وسىدان ءبىر اي بۇرىن وبلىستىڭ دامۋ جوسپارىن تانىستىرعان كەزدە قالانىڭ اۆتوبۋس پاركىن جاڭارتامىز دەپ ۋادە بەرگەن ەدىك. ەندى مىنە, 44 اۆتوبۋستى قالا كوشەلەرىنە جىبەرگەلى تۇرمىز. ونىڭ 30-ى ۇلكەن, 14-ءى شاعىن اۆتوبۋس. ءبارى دە ءوزىمىزدىڭ سەمەيدە شىعارىلعان, ساپالى, باسەكەگە ساي اۆتوبۋستار. بۇل كولىكتەرگە باسقا وبلىستار دا قىزىعۋشىلىق تانىتىپ وتىر. بىراق زاۋىت باسشىلىعى ءبىرىنشى بولىپ بىزگە وسىنداي مۇمكىندىك تۋعىزدى, – دەدى وبلىس اكىمى بەرىك ءۋالي.
كولىكتەردىڭ تاعى ءبىر ەرەكشەلىگى, ابايدىڭ 180 جىلدىعىنا وراي اۆتوبۋستاردىڭ سىرتى ۇلى اقىن بەينەسى بار لوگوتيپپەن بەزەندىرىلگەن. اكىمنىڭ ايتۋىنشا, جىل سوڭىنا دەيىن قالاداعى جاڭا اۆتوبۋستاردىڭ سانى 70-كە جەتىپ, كەلەر جىلعا تاعى دا 50 اۆتوبۋس حالىق يگىلىنە جاراتىلماق.
اباي وبلىسى