پرەمەر-ءمينيستردىڭ ورىنباسارى قانات بوزىمباەۆتىڭ توراعالىعىمەن 2025 جىلعى سۋ تاسقىنى كەزەڭىنىڭ قورىتىندىسى جانە «Tasqyn» سۋ تاسقىنىن بولجاۋ مەن مودەلدەۋ جۇيەسىن ودان ءارى دامىتۋ ماسەلەلەرى بويىنشا كەڭەس ءوتتى. ءىس-شارا بارىسىندا قولدانىستاعى مەحانيزمنىڭ تيىمدىلىگى سارالاندى.
توتەنشە جاعدايلار مينيسترلىگىنىڭ مالىمەتىنشە, بيىل سۋ تاسقىنى اقمولا, ماڭعىستاۋ, سولتۇستىك قازاقستان وبلىستارى مەن اباي وبلىسىنىڭ 16 ەلدى مەكەنىندە تىركەلگەن. سونىڭ ىشىندە 10 جاعداي رمك «قازگيدرومەت» دەرەكتەرى نەگىزىندە الدىن الا بولجانعان, 2 وقيعا حالىقارالىق GloFAS پلاتفورماسىنىڭ مالىمەتتەرىمەن قامتىلعان. ال ەرىگەن قار سۋى مەن جەراستى سۋلارىنىڭ كوتەرىلۋىنە بايلانىستى ورىن العان 4 جاعداي بويىنشا بولجام جاسالماعان.
جۇرگىزىلگەن تالداۋ ناتيجەلەرى جۇيەنى جەتىلدىرۋدىڭ ناقتى باعىتتارىن كورسەتتى.
كەڭەس قورىتىندىسى بويىنشا «Tasqyn» جۇيەسىن جاڭعىرتۋ كەزەڭدەرى مەن مەرزىمدەرى ايقىندالدى. سونىمەن قاتار ەرىگەن جانە جاۋىن-شاشىن سۋىنىڭ اعىنى پارامەترلەرىن ەسكەرە وتىرىپ گيدرولوگيالىق مودەلدى تولىقتىرۋ, گيدروبەكەتتەر جەلىسىن كەڭەيتۋ, وزەن ارنالارىن باتيمەتريالىق ءتۇسىرۋ, سۋقويمالارىنان تومەن ورنالاسقان وزەن ۋچاسكەلەرىندە سۋ شىعىنىن بولجاۋ, سونداي-اق 2024 جىلى سالىنعان بوگەتتەردى ەسكەرە وتىرىپ جەر بەدەرىنىڭ تسيفرلىق مودەلدەرىن جاڭارتۋ جونىندە ناقتى تاپسىرمالار بەرىلدى.