مەرەكە قارساڭىنداعى ماراپات

سالتاناتتى جيىندى اشقان ەرلان قوشانوۆ «پارلامەنت ءسوزى» سىيلىعىنىڭ يەگەرلەرى مەن باق وكىلدەرىن كەلە جاتقان كاسىبي مەرەكەسىمەن قۇتتىقتادى.

– قازىر قوعامدى ءجۋرناليسسىز ەلەس­تەتۋ مۇمكىن ەمەس. حالىق سىزدەردىڭ جازعان ماقالالارىڭىز بەن سيۋجەتتەرىڭىزدەن ەلىمىزدەگى جانە الەمدەگى وقيعالاردان حاباردار بولىپ وتىرادى. اسىرەسە مەملەكەت باسشىسى قاسىم-جومارت كەمەل ۇلىنىڭ ساياسي-ەكونوميكالىق رەفورمالارى مەن اۋقىمدى باستامالارىن حالىققا دۇرىس تۇسىندىرۋگە مول ۇلەس قوسىپ كەلەسىزدەر. سونىڭ ىشىندە پارلامەنتتە قابىلدانىپ جاتقان زاڭدار سىزدەر ارقىلى ناسيحاتتالىپ جاتىر. زاڭدى قابىلداۋ ءبىر بولەك, ونى حالىققا دۇرىس جەتكىزۋ – ول دا نەگىز­گى ميسسيانىڭ ءبىرى, – دەدى ءماجىلىس توراعاسى.

پالاتا سپيكەرى بۇگىندە ماجىلىستە 700-دەن اسا باق وكىلى اككرەديتتەلگەنىن اتاپ ءوتتى. بۇل ءتىزىم ۋاقىت وتكەن سا­يىن ۇلعايىپ كەلەدى. جۋرناليستەردىڭ جايلى جۇمىس ىستەۋىنە بارلىق جاعداي جاسالعان. دەپۋتاتتار بۇقارالىق اقپارات قۇرالدارىمەن ءتۇرلى فورماتتا بەلسەندى جۇمىس اتقارىپ جاتىر.

– ەلىمىزدىڭ ودان ءارى دامۋىن مىقتى بۇقارالىق اقپارات قۇرالدارىنسىز ەلەس­تەتۋ قيىن. سوندىقتان بۇگىندە باق-تىڭ جان-جاقتى دامۋىنا قاجەتتى جاعدايدىڭ بارلىعى جاسالىپ وتىر. سىزدەرمەن بىرگە ءبىز جاڭا سالالىق زاڭ قابىلدادىق. ول جۋرناليستەردىڭ قۇقىقتارىن قورعاۋدى كۇشەيتتى. بلوگەرلەر مەن باسقا دا اقپارات كوزدەرى بۇگىندە باق-پەن باسەكەلەسۋگە تىرىسىپ جاتىر. بىراق مەملەكەت بايىپتى جۋرناليستيكاعا سۇرانىستى جۇيەلى تۇردە قالىپتاستىرىپ كەلەدى, – دەدى ە.قوشانوۆ.

ءماجىلىس توراعاسى «پارلامەنت ءسوزى» سىيلىعىنىڭ توعىزىنشى جىل وتكىزىلىپ كەلە جاتقانىن ايتتى. وسى ۋاقىت ىشىندە 140-قا جۋىق ادام ماراپاتتالعان. بيىل بايقاۋعا قاتىسۋعا 100-دەن اسا ءوتىنىم كەلىپ تۇسكەن. تاڭداۋ وڭاي بولعان جوق. ناتيجەسىندە, ماراپاتتار بىلاي ءبولىندى:

– «ۇزدىك باسپا جاريالانىمى ءۇشىن» – زەيىن ەرعاليەۆا («Egemen Qazaqstan» گازەتى), ۆلاديسلاۆ شپاكوۆ («ۆرەميا» گازەتى);

– «ۇزدىك تەلەۆيزيالىق سيۋجەت ءۇشىن» – اسىلبەك تويبەكوۆ («جىبەك جولى» تەلەارناسى), مەيرامگۇل ءمادالى («Atameken Business» تەلەارناسى), الىبەك رزاباەۆ (ەۋرازيا ءبىرىنشى ارناسى, «پارلامەنت Online» باعدارلاماسى);

– «ۇزدىك بەينە-سۋرەت ماتەريالى ءۇشىن» – الماس جۋلۋباەۆ («استانا» تەلەارناسى);

– «ۇزدىك ينتەرنەت جانە راديو ماتەريالى ءۇشىن» – ايگەرىم باقپاەۆا («Baigenews.kz» ينتەرنەت پورتالى), ازامات تلەپوۆ (قازاق راديوسى), ايگەرىم تۋكۋشەۆا («Kursiv.kz» سايتى), تامارا ۆاال ( «Vlast.kz» سايتى);

– «ارنايى رەپورتاج» – يرينا ءالىمجانوۆا (Qazaqstan ۇلتتىق ارناسى, «قوس پالاتا» باعدارلاماسى), الينا شاشكينا («Tengrinews.kz» ينتەرنەت پورتالى), داۋرەن وماروۆ («ادال ادام» YouTube ارناسى);

– «پارلامەنتتىك جۋرناليستيكانى دامىتۋعا قوسقان ۇلەسى ءۇشىن» – ەركىن جۇماتاەۆ («حابار» اگەنتتىگى), الەك­ساندر ترۋحاچەۆ («كتك» تەلەارناسى);

– «پارلامەنت ءسوزى» ارنايى اتالىمى – «ازاتتىق رۋحى» سايتىنىڭ جانە «24KZ» تەلەارناسىنىڭ ۇجىمدارى.