ەل ازاماتتارى ەندى جەكە كۋالىگىن تولىقتاي ونلاين اۋىستىرا الادى. ول ءۇشىن «eGov.kz» پورتالى مەن «eGov Mobile» ءموبيلدى قوسىمشاسىندا قۇجاتتى قاشىقتان قايتا راسىمدەيتىن قاناتقاقتى جوبا ىسكە قوسىلدى. ونى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى مەن ىشكى ىستەر مينيسترلىگى بىرلەسىپ, جۇزەگە اسىرىپ وتىر.
بىراق بۇل قىزمەتتى جەكە كۋالىك يەسى عانا پايدالانادى. بۇعان باسقانىڭ اتىنان نەمەسە سەنىمحات پەن قامقورشىلىق نەگىزىندە ءوتىنىم بەرە المايسىز. بۇل ادامداردىڭ ۋاقىتىن ۇنەمدەپ, كوشى-قون قىزمەتىندەگى جۇكتەمەنى ازايتۋعا باعىتتالعان. سونداي-اق ازاماتتىڭ جەكە كۋالىگىندەگى سۋرەتى مەن قولتاڭباسى قىزمەتتە كورسەتىلگەن تالاپقا ساي بولۋى قاجەت.
ايتا كەتەيىك, جەكە كۋالىكتى ونلاين تۇردە تەك ونىڭ قولدانىلۋ مەرزىمى اياقتالعاندا اۋىستىرۋعا بولادى. ماسەلەن, ول قۇجات مەرزىمى اياقتالعانعا دەيىن 30 كۇن بۇرىن نەمەسە مەرزىمى وتكەننەن كەيىنگى 10 كۇن ىشىندە عانا قولجەتىمدى.