ءباسپاسوز كۇنى قارساڭىندا باتىس قازاقستان وبلىسىنىڭ قازتالوۆ اۋىلىندا جەرلەستەرى تانىمال ءتىلشى, «ەگەمەن قازاقستان» گازەتىنىڭ ارداگەرى تەمىر قۇسايىندى ەسكە الدى. الما ورازباەۆا اتىنداعى مەكتەپ عيماراتىندا وتكەن كەزدەسۋگە قازتالوۆ اۋدانىنىڭ اكىمى اسلانبەك سارقۇلوۆ, اۋداندىق ءماسليحات توراعاسى سارسەنباي مولداشەۆ, اۋدان اكىمىنىڭ ورىنباسارى سەرىك قايىرليەۆ, تەمىر قۇسايىننىڭ باۋىرلارى ميرلان ناعىم ۇلى, نۇرلان ناعىم ۇلى, ۇلى قۋانىش, جەرگىلىكتى زيالى قاۋىم وكىلدەرى, مەكەمە باسشىلارى قاتىستى, دەپ حابارلايدى Egemen.kz.
تەمىر ناعىم ۇلى 40 جىل جۋرناليستىك قىزمەتىنىڭ باسىم بولىگىندە «ەگەمەن قازاقستان» گازەتىنىڭ باتىس قازاقستان وبلىسىنداعى ءتىلشىسى بولىپ ەڭبەك ەتتى. وسى كەزەڭدە «ەرەن ەڭبەگى ءۇشىن» مەدالىمەن, «قۇرمەت» وردەنىمەن ماراپاتتالدى, «اقپارات سالاسىنىڭ ۇزدىگى» بولدى, قازاقستان جۋرناليستەر وداعى سىيلىعىنىڭ جانە «پارلامەنت ءسوزى» ارنايى سىيلىعىنىڭ لاۋرەاتى, قازتالوۆ اۋدانىنىڭ قۇرمەتتى ازاماتى اتاندى.
تانىمال ءتىلشىنىڭ تۋعان جەرىندە وتكەن كەشتە اۋدان اكىمى اسلانبەك احمەتوللا ۇلى, ەڭبەك ارداگەرى ءۋاليوللا ابىشەۆ, باۋىرى ميرلان ناعىم ۇلى, اۋداندىق ءماسليحات توراعاسى سارسەنباي مولداشەۆ, اۋداندىق «اۋىل ايناسى» گازەتىنىڭ ءتىلشىسى قىدىر حارەس ۇلى تەمىر اعا جايلى ەستەلىكتەرىن ورتاعا سالدى. ءجۋرناليستىڭ ءومىر جولى مەن شىعارماشىلىعى جايلى اسەرلى اڭگىمەلەر ايتىلدى. شارا اياسىندا جاقىندا باسپادان شىققان «ەگەمەننىڭ تەمىرى» اتتى كىتاپتىڭ ءبىر بولىگى اۋدان كىتاپحانالارىنا سىيعا تارتىلدى.
قازتالوۆ اۋدانى – «ەگەمەن قازاقستان» گازەتىنىڭ تاريحىندا ەرەكشە ورنى بار ءوڭىر. ويتكەنى 1919 جىلى ورىنبوردا جارىق كورگەن «ۇشقىن» گازەتىنىڭ العاشقى رەداكتورلارى حالەل ەسەنباەۆ پەن تاميمدار سافيەۆ ءدال وسى ءوڭىردىڭ تۋماسى ەدى. تاريحي توپىراق پەن باسىلىم اراسىندا قارىم-قاتىناس ءالى دە كۇشتى. گازەتتىڭ باتىس قازاقستان وبلىسىنداعى ەڭ كوپ وقىرمانى دا وسى اۋداندا. سوندىقتان دا وسى جيىندا «قازاق گازەتتەرى» جشس باس ديرەكتورى ديحان قامزابەك ۇلىنىڭ ارنايى العىس حاتى اۋدان اكىمى اسلانبەك سارقۇلوۆقا تابىستالدى.
كەش بارىسىندا جەرگىلىكتى ونەرپازدار مۇرات احمەتوۆ, بوتاكوز ماقاتوۆ, ورالحان ەرعاليەۆ ورىنداعان اسەم اندەر ەسكە الۋ شاراسىنىڭ مازمۇنىن بايىتا ءتۇستى.
باتىس قازاقستان وبلىسى