كوكشەتاۋدا اقمولا وبلىسىنىڭ XII ازاماتتىق فورۋمى ءوتتى. بۇل جيىن تەك وڭىرلىك دەڭگەيدەگى جيىن عانا ەمەس, بۇكىل ەل ءۇشىن ستراتەگيالىق ماڭىزى بار وقيعا رەتىندە قالىپتاسىپ كەلەدى.
فورۋمعا مەملەكەتتىك ورگاندار, ۇكىمەتتىك ەمەس ۇيىمدار, قوعامدىق كەڭەستەر, قازاقستان حالقى اسسامبلەياسى, جاستار ۇيىمدارى مەن مەديا وكىلدەرى قاتىسىپ, ازاماتتىق مادەنيەتتىڭ كۇندەلىكتى ءومىر ساپاسىنا قالاي اسەر ەتەتىندىگى تۋرالى كەلەلى پىكىر ايتىپ, اقىل تارازىسىنا سالدى. فورۋمعا قاتىسۋشىلار قۇقىقتىق ساۋاتتىلىق پەن قوعامدىق باقىلاۋ, ينكليۋزيا, جەرگىلىكتى ءوزىن-ءوزى باسقارۋ, ەكولوگيا, تسيفرلاندىرۋ ءتارىزدى اۋقىمدى تاقىرىپتاردى جان-جاقتى جىكتەپ, دامىتۋ جولدارىن قاراستىردى. سايىپ كەلگەندە بۇل تاجىريبە تالدامالىق, ۇتىمدى ۇسىنىستاردى, وڭتايلى ءادىس-تاسىلدەردى قولدانا بىلۋگە جول سىلتەيتىن تىڭ ويلار تەربەتىلگەن بەسىك ىسپەتتى.
فورۋم بەس باعىت بويىنشا تىڭعىلىقتى جۇمىس ىستەدى. زاڭناما مەن ينستيتۋتسيونالدىق ديالوگتەن باستاپ, جاساندى ينتەللەكت, كرەاتيۆتى ەكونوميكا جاعدايىندا ءۇشىنشى سەكتوردىڭ بەيىمدەلۋىنە دەيىن ماڭىزدى تاقىرىپتار قوزعالدى. مەملەكەتتىڭ ازاماتتىق قوعامدى دامىتۋ تۇجىرىمداماسىن ىسكە اسىرۋعا ارنالعان سەكتسيادا مەيلىنشە مازمۇندى ديالوگ ءوربىدى. 2020–2025 جىلدارعا ارنالعان تۇجىرىمدامانىڭ العاشقى كەزەڭىنىڭ ناتيجەلەرى ناقتى كورسەتكىشتەر ارقىلى ۇسىنىلدى:
– ءبىز جۇيەلى رەفورمالار جۇرگىزدىك. «قوعامدىق باقىلاۋ تۋرالى» زاڭ قابىلداندى, توعىز زاڭنامالىق اكتىگە وزگەرىستەر ەنگىزىلدى, بىرلەستىكتەردى تىركەۋ جەڭىلدەدى, ەندى ءۇش ادامنىڭ ءوزى جەتكىلىكتى. ونلاين-پەتيتسيالار, جاڭا گرانتتار مەن سىياقى فورماتتارى پايدا بولدى. ەڭ باستىسى, ۇەۇ-عا دەگەن سەنىم نىعايىپ, ولار الەۋمەتتىك سەرىكتەس رەتىندە قابىلدانا باستادى, – دەدى مادەنيەت جانە اقپارات مينيسترلىگى ازاماتتىق قوعام ىستەرى كوميتەتىنىڭ توراعاسى گۇلبارا سۇلتانوۆا.
مەملەكەت پەن قوعام اراسىنداعى ساپالى ارىپتەستىك, بارلىق راسىمدەردى تسيفرلاندىرۋ, ستراتەگيالىق سەرىكتەستىكتى دامىتۋ, جەرگىلىكتى باستامالاردى قولداۋ باستى باسىمدىق بولماق.
– بۇگىنگى مىندەت – ساندىق جەتىستىكتەردەن ساپالى, ءوزارا ءتيىمدى ارىپتەستىككە كوشۋ. ۇەۇ جاي عانا جوبالاردى ورىنداۋشى ەمەس, ولار – ءبىلىم, موتيۆاتسيا مەن سەنىم تاراتۋشى ورتا, – دەدى قازاقستان ازاماتتىق اليانسىنىڭ پرەزيدەنتى بانۋ نۇرعازيەۆا.
قۇقىقتىق مادەنيەتكە ارنالعان سەكتسيادا اقپاراتقا قولجەتىمدىلىك, قۇقىقتاردى قورعاۋ, ەكولوگيا, زورلىق-زومبىلىقتىڭ الدىن الۋ تاقىرىپتارى تالقىلاندى. سەناتور جاننا اسانوۆانىڭ پىكىرىنشە, قۇقىقتىق مادەنيەت – فاكۋلتاتيۆ ەمەس, قاجەتتىلىك.
ينكليۋزيا ماسەلەلەرى جەكە باعىت رەتىندە قارالدى. «قازاقستان حالقىنا», بولات وتەمۇراتوۆ قورلارىنىڭ وكىلدەرى ەرەكشە ءبىلىم بەرۋ قاجەتتىلىگى بار بالالاردى قولداۋ, مامانداردى وقىتۋ, بىلىمگە تەڭ قولجەتىمدىلىكتى قامتاماسىز ەتۋ جونىندە وڭىرلەردە جۇزەگە اسىرىلىپ جاتقان جوبالارمەن تانىستىردى.
«اشىق جۇرەك – وتكرىتوە سەردتسە» قورىنىڭ جەتەكشىسى ازاماتتىق سەكتور تۋرالى كوزقاراستىڭ كەيىنگى جىلدارى قالاي وزگەرگەنىن ايتتى:
– بۇگىندە ۇكىمەتتىك ەمەس ۇيىمدار ۇعىمى ءاربىر ادامعا تۇسىنىكتى. ادامدار كورىپ وتىر: مەملەكەت ۇلگەرمەي جاتقان جەرلەردە ءبىز كومەككە كەلەمىز. بۇل – بيزنەس تە, ساياسات تا ەمەس, ادامگەرشىلىك پەن وزگەرىسكە ۇمتىلۋ, – دەدى ولەسيا جاگپاروۆا.
فورۋمنىڭ پلەنارلىق وتىرىسى ونىڭ لوگيكالىق قورىتىندىسى بولدى. اقمولا وبلىسى اكىمىنىڭ ورىنباسارى دوسۇلان ايتباەۆ قۇتتىقتاۋ ءسوز سويلەدى. فورۋم قورىتىندىسى بويىنشا وڭىرلەردە ۇكىمەتتىك ەمەس ۇيىمداردى قولداۋ ينفراقۇرىلىمىن دامىتۋ, مەملەكەتتىك تاپسىرىس تەتىكتەرىن جەتىلدىرۋ, جاڭا تسيفرلىق سەرۆيستەردى ەنگىزۋ, شەشىم قابىلداۋ ۇدەرىستەرىنە قوعامدىق ۇيىمداردىڭ جۇيەلى قاتىسۋىن قامتاماسىز ەتۋ جونىندە ناقتى ۇسىنىستار ەنگىزىلگەن قارار قابىلداندى. ەڭ بەلسەندى قاتىسۋشىلار وبلىس اكىمى مەن ازاماتتىق اليانس اتىنان العىسحاتتارمەن ماراپاتتالدى.
كوكشەتاۋ