ءماجىلىستىڭ ءۇشىنشى سەسسياسى ءوز جۇمىسىن اياقتادى

سەسسيانىڭ باسىندا مەملەكەت باسشىسى قاسىم-جومارت توقاەۆ دەپۋتاتتاردىڭ جۇمىسىنا سەرپىن بەرگەن بولاتىن. جولداۋلارىندا, سايلاۋالدى باعدارلاماسىندا جانە ۇلتتىق قۇرىلتاي وتىرىستارىندا ايتىلعان باستامالاردى ىسكە اسىرۋ – دەپۋتاتتار ءۇشىن باستى مىندەتتەردىڭ ءبىرى بولدى.

الەۋمەتتىك باعىتتاعى باستامالار

مىندەتتى الەۋمەتتىك مەديتسينالىق ساقتاندىرۋ جۇيەسىنە قاتىستى تاسىلدەر قايتا قارالىپ, ساقتاندىرىلماعان ازاماتتارعا دا العاش جۇگىنگەندە تەگىن بازالىق مەديتسينالىق كومەك الۋ مۇمكىندىگى ساقتالدى. ونكولوگيالىق سكرينينگتەر تەگىن مەديتسينالىق كومەكتىڭ كەپىلدىك بەرىلگەن كولەمىنە ەنگىزىلدى. سونىمەن قاتار, ەستۋ قابىلەتى ناشار جاندار, اسىرەسە بالالار, جەرگىلىكتى بيۋدجەت ەسەبىنەن ەستۋ اپپاراتىمەن قامتاماسىز ەتىلەدى.

بالالار قۇقىعىن قورعاۋ باعىتىندا كاسىبي وتباسى ينستيتۋتى ەنگىزىلدى. بۇل قيىن جاعدايعا تاپ بولعان بالالاردىڭ بالالار ۇيىنە تۇسپەي, وتباسىندا تاربيەلەنۋىنە مۇمكىندىك بەرەدى. سونىمەن قاتار, جەكەمەنشىك مەكتەپتەردە دە ىستىق تاماقپەن قامتۋ ماسەلەسى شەشىمىن تاپتى.

«كەلەشەك» ەرىكتى جيناقتاۋ جۇيەسى ارقىلى بالالاردىڭ ساپالى ءبىلىم الۋ مۇمكىندىكتەرى كەڭەيەدى. حالىقارالىق عىلىمي جارىستاردىڭ جەڭىمپازدارىنا «بولاشاق» باعدارلاماسى اياسىندا كونكۋرسسىز گرانتتار الۋ مۇمكىندىگى بەرىلدى.

قۇقىقتىق سالا مەن ىشكى قاۋىپسىزدىك

قىزمەتتىك مىندەتىن اتقارۋ كەزىندە قازا بولعان 530 پوليتسيا قىزمەتكەرىنىڭ وتباسىنا اي سايىن جاردەماقى تولەۋ ماسەلەسى شەشىلدى. قۇقىق قورعاۋ ورگاندارى قىزمەتكەرلەرىنە تۇرعىن ءۇي تولەمدەرى قاراستىرىلدى.

زاڭنامالىق دەڭگەيدە ينتەرنەت-الاياقتىق, دروپپەرلىك ارەكەتتەر ءۇشىن جازا كۇشەيتىلدى. نەكەگە ماجبۇرلەۋ مەن ادامنىڭ بەت-الپەتىن تانۋعا كەدەرگى كەلتىرەتىن كيىم كيۋگە تىيىم سالىندى. ەسىرتكى تاراتۋشىلار مەن العاش رەت سۇرىنگەن جاستار اراسىنداعى ايىرماشىلىق ناقتى بەلگىلەنىپ, 3 مىڭنان استام ءىس قايتا قارالدى.

سونىمەن قاتار كونستيتۋتسيانىڭ 30 جىلدىعىنا وراي راقىمشىلىق جاساۋ تۋرالى زاڭ قابىلدانىپ, مەملەكەت باسشىسى وعان قول قويدى. بۇل زاڭ 15 مىڭ ازاماتتىڭ جازا مەرزىمىن قىسقارتۋعا, 2 مىڭعا جۋىق ادامنىڭ بوستاندىققا شىعۋىنا مۇمكىندىك بەرەدى.

ەكونوميكا جانە سالىق ساياساتى

سەسسيا بارىسىندا جاڭا بيۋدجەت كودەكسى قابىلدانىپ, بيۋدجەت پروتسەسى جەڭىلدەتىلدى. ۇلتتىق قور اكتيۆتەرىن باسقارۋ تاسىلدەرى قايتا قارالدى. وڭىرلەردىڭ قارجىلىق دەربەستىگى ارتىپ كەلەدى.

ەڭ قىزۋ تالقىلانعان قۇجات – سالىق كودەكسى. قۇجات ازاماتتار مەن كاسىپكەرلەردىڭ مۇددەسىن ەسكەرە وتىرىپ قابىلداندى. بۇل رەتتە سالىق اۋىرتپالىعىن ارتتىرۋ ەسەبىنەن بيۋدجەت كىرىسىن ۇلعايتپاۋ ءپرينتسيپى ساقتالدى.

سۋ جانە حالىقارالىق ساياسات

سۋ رەسۋرستارىن باسقارۋعا قاتىستى جاڭا سۋ كودەكسى قابىلدانىپ, سۋ ۇنەمدەۋ مادەنيەتىن قالىپتاستىرۋ كوزدەلدى. سونىمەن قاتار, 36 حالىقارالىق شارت پەن كەلىسىم راتيفيكاتسيالاندى. تۇركىتىلدەس مەملەكەتتەر پارلامەنتتىك اسسامبلەياسىنا توراعالىق ەتۋ كەزەگى قازاقستانعا ءوتتى.

پارلامەنتتىك باقىلاۋ مەن قوعامدىق قاتىسۋ

سەسسيا بارىسىندا جوعارى اۋديتورلىق پالاتا توراعاسىنىڭ ەكى ەسەبى تىڭدالدى. اۋىل شارۋاشىلىعى مەن ءدارى-دارمەكپەن قامتاماسىز ەتۋ سالالارىنداعى سۋبسيديالار ماسەلەسى كوتەرىلدى. سونىمەن قاتار, 461 دەپۋتاتتىق ساۋال جولداندى. ءماجىلىس دەپۋتاتتارى وڭىرلەردە 2 مىڭعا جۋىق ازاماتتى قابىلدادى.

اەس سالۋ بويىنشا رەسپۋبليكالىق رەفەرەندۋمعا دايىندىق, پرەزيدەنتتىڭ ساياسي رەفورمالارىن جۇزەگە اسىرۋ, ۇلى جەڭىس ارداگەرلەرىنە تاعزىم – بۇل سەسسيانىڭ ەلەۋلى كەزەڭدەرى بولدى.

كەلەسى سەسسيا مىندەتتەرى

كەلەسى سەسسيادا ءماجىلىس قۇرىلىس كودەكسى, قۇقىق بۇزۋدىڭ الدىن الۋ, تۇتىنۋشىلاردىڭ قۇقىقتارىن قورعاۋ, بانك قىزمەتى جانە باسقا دا ماڭىزدى زاڭداردى قابىلداۋدى جوسپارلاپ وتىر.

ءسوز سوڭىندا ءماجىلىس دەپۋتاتتارى وڭىرلەرگە بارىپ, سايلاۋشىلارمەن كەزدەسىپ, ناقتى ماسەلەلەردى تالقىلاۋعا كىرىسەدى پالاتا توراعاسى ارىپتەستەرىنە اتقارعان ەڭبەكتەرى ءۇشىن العىس ايتىپ, باق وكىلدەرىنە وبەكتيۆتى جۇمىس ءۇشىن ريزاشىلىعىن ءبىلدىردى.

«بارشاڭىزعا ەل يگىلىگى جولىنداعى جاۋاپتى ىستە مىقتى دەنساۋلىق, تولايىم تابىس تىلەيمىن», دەدى ول.