پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين مۇنداي باستامالاردى ىسكە اسىرۋ كەزىندە ينفلياتسياعا اسەرىن ەسكەرگەن ءجون ەكەنىن ايتتى, دەپ حابارلايدى Egemen.kz.
«ەڭ تومەنگى جالاقىنى كوتەرۋ ءبىر جاعىنان وندىرىستىك شىعىنداردىڭ كوبەيۋىنە, ەكىنشى جاعىنان تۇتىنۋ سەكتورىنىڭ بەلسەندىلىگىنىڭ ارتۋىنا الىپ كەلەدى. ەرتەڭ بۇل سۇرانىسقا تىكەلەي ىقپال ەتۋى مۇمكىن. سوندىقتان مۇنداي شەشىمدەرگە وتە مۇقيات قاراۋ كەرەك», دەدى سەرىك جۇمانعارين.
ونىڭ ايتۋىنشا, ەڭ تومەنگى جالاقىنى كوتەرۋ مەن ينفلياتسيا اراسىندا تىكەلەي, ۇزاق مەرزىمدى بايلانىس بولماۋى مۇمكىن, بىراق ساراپشىلار اراسىندا بۇل ماسەلەگە قاتىستى ءتۇرلى كوزقاراستار بار. سول سەبەپتى, جالاقىنى ارتتىرۋ بىرتىندەپ, كەزەڭ-كەزەڭىمەن جۇزەگە اسىرىلۋى ءتيىس پروتسەسس.
ەستەرىڭىزگە سالا كەتەيىك, قازىرگى ۋاقىتتا ەلىمىزدە ەڭ تومەنگى جالاقى مولشەرى – 85 000 تەڭگە. بۇعان دەيىن ءماجىلىس دەپۋتاتى قوسالقى قىزمەتكەرلەر, تازالىقشىلار جانە تەحنيكالىق پەرسونالدىڭ جالاقىسى جايلى ماسەلە كوتەرىپ, ونى 174 000 تەڭگەگە دەيىن كوتەرۋدى ۇسىنعان ەدى.