29 LRT وپەراتورى تيانتسزين قالاسىندا (قحر) وقۋدىڭ ەكىنشى كەزەڭىنەن ءوتىپ جاتىر. كۋرس تەوريالىق, ترەناجەرلىق وقىتۋ جانە جىلجىمالى قۇرام بويىنشا تاجىريبەلىك ساباقتاردى قامتيدى, دەپ حابارلايدى Egemen.kz CTS-كە سىلتەمە جاساپ.
ءبىرىنشى كەزەڭ – بازالىق تەوريالىق كۋرس – استانادا وتكىزىلدى. قازىرگى تاڭدا تيانتسزيندە وقىتۋ جالعاسىپ جاتىر: مۇندا تەرەڭدەتىلگەن تەوريا, تاجىريبە جانە وندىرىستىك تاجىريبەدەن ءوتۋ كوزدەلگەن. كەيىن استانادا قورىتىندى كەزەڭ – LRT ۆاگوندارىندا تاجىريبەدەن ءوتۋ جانە تىكەلەي جۇمىسقا كوشۋ جوسپارلانىپ جاتىر.
باعدارلامانىڭ ماقساتى – LRT جۇيەسىندە ۆاگونداردى قاۋىپسىز, ءتيىمدى جانە دەربەس جۇرگىزە الاتىن, تەحنيكالىق قىزمەت كورسەتە الاتىن جانە قاجەت بولعان جاعدايدا اقاۋلاردى جويا الاتىن مامانداردى دايىنداۋ.
استاناداعى الدىڭعى وقىتۋ كەزەڭدەرىندە تەوريالىق ساباقتاردى تيانتسزين مەتروپوليتەنى مەن چجەنچجوۋ تەمىرجول كاسىبي-تەحنيكالىق ينستيتۋتىنىڭ (قىتاي حالىق رەسپۋبليكاسى) وقىتۋشىلارى جۇرگىزدى. ال تيانتسزيندە ساباقتاردى تيانتسزين مەتروسىنىڭ ماماندارى جۇرگىزىپ جاتىر.
وقىتۋ باعدارلاماسى 10 قىركۇيەككە دەيىن جالعاسادى. باعدارلاما اياقتالعان سوڭ قاتىسۋشىلارعا بىلىكتىلىگىن راستايتىن سەرتيفيكاتتار تابىستالادى.
اپاتتىق جاعدايلاردى ۇلگىلەۋ ءۇشىن قىتايلىق تاراپ استانا قالاسىنىڭ كليماتتىق جانە پايدالانۋ جاعدايلارىنا بەيىمدەلگەن جاڭا سيمۋلياتسيالىق باعدارلامالار ازىرلەگەن. تاجىريبە ارنايى وقۋ الاڭىندا ءوتىپ جاتىر, وندا توتەنشە جاعدايلارداعى ارەكەتتەردى پىسىقتاۋعا جانە پراكتيكالىق داعدىلاردى بەكىتۋگە ەرەكشە كوڭىل بولىنەدى. قورىتىندى كەزەڭ ناقتى جەلىلەردە جۇمىس ىستەۋدى, كولىك جۇيەسىن سىناقتان وتكىزۋدى جانە شىنايى پايدالانۋعا بارىنشا جاقىن جاتتىعۋلاردى قامتيدى.
«وپەراتورلاردى وقىتۋ – استاناداعى LRT جوباسىن ىسكە قوسۋعا باعىتتالعان ماڭىزدى قادام. ءبىز تەك وزىق تەحنولوگيالاردى ەنگىزۋدى عانا ەمەس, ولاردى بىلىكتى مامانداردىڭ ءتيىمدى پايدالانۋىن قامتاماسىز ەتۋگە دە ۇمتىلامىز. زاماناۋي وقۋ قۇرالدارىن پايدالانۋ, ءتۇرلى ستسەناريلەردى مودەلدەۋ جانە توتەنشە جاعدايلاردا ارەكەت ەتۋدى پىسىقتاۋ – بولاشاق وپەراتورلارعا قاجەتتى داعدىلاردى مەڭگەرۋگە مۇمكىندىك بەرەدى», دەپ اتاپ ءوتتى «City Transportation Systems» جشس باسقارۋشى ديرەكتورى باۋىرجان ايتحوجين.
وقىتۋ LRT قۇرىلىسى بويىنشا كەلىسىمشارت اياسىندا جانە باس مەردىگەر – «China Railway Asia-Europe Construction Investment» كومپانياسى تاراپىنان جۇزەگە اسىرىلادى.