مەملەكەت باسشىسى قاسىم-جومارت توقاەۆ باق سالاسى قىزمەتكەرلەرىن ماراپاتتادى. پرەزيدەنت جۋرناليستەر قاۋىمىن الداعى بۇقارالىق اقپارات قۇرالدارىنىڭ قىزمەتكەرلەرى كۇنىمەن قۇتتىقتاپ, ۇلتتىق مەديا حالىقتىڭ ءۇنى, ال جۋرناليست جاسامپازدىق جارشىسى ەكەنىن اتاپ ءوتتى.
– سىزدەر مەملەكەت ساياساتىن ەلگە ءتۇسىندىرىپ, قوعام مەن بيلىكتىڭ اراسىندا كوپىر بولىپ كەلەسىزدەر. ەلىمىزدە جاسالىپ جاتقان رەفورمالاردىڭ ءمان-ماعىناسىن جۇرتشىلىققا جەتكىزىپ جۇرسىزدەر. بۇل – وتە ماڭىزدى, كۇردەلى, ەرەكشە جۇمىس. ءاربىر ادامنىڭ قولىنان كەلمەيدى. مەن بۇگىن بارىڭىزگە شىنايى ريزاشىلىعىمدى بىلدىرەمىن. وزدەرىڭىز بىلەسىزدەر, كەيىنگى جىلدارى مەملەكەتىمىزدە اۋقىمدى وزگەرىستەر جاسالۋدا, ماڭىزدى باستامالار جۇزەگە اسىرىلىپ جاتىر. وسىدان 3 جىل بۇرىن جالپىۇلتتىق رەفەرەندۋم ارقىلى كونستيتۋتسيامىزدى جاڭعىرتتىق. مەملەكەتتىڭ بۇكىل ساياسي جۇيەسىن وزگەرتەتىن تاريحي قادامدار جاسادىق. ەلىمىزدە «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» قاعيداتى ورنىعا ءتۇستى. وكىلدى بيلىكتىڭ قۇزىرەتى كۇشەيدى, اتقارۋشى بيلىكتىڭ جاۋاپكەرشىلىگى ارتتى. كونستيتۋتسياعا سايكەس بيلىك تارماقتارى تۇگەل جاڭعىرتىلدى. اۋىل جانە اۋدان اكىمدەرى تىكەلەي سايلانا باستادى. بيلىككە ساياساتكەرلەردىڭ جاڭا بۋىنى كەلىپ جاتىر. ازاماتتارىمىز مەملەكەتتىك ماڭىزى بار شەشىمدەر قابىلداۋ ىسىنە بەلسەنە ارالاساتىن بولدى. قوعامدا پىكىر الۋاندىعى ورنىقتى, ياعني, ءوز ويىن زاڭعا سايكەس ايتا الاتىن, كوكىرەگى وياۋ, وركەنيەتتى قوعام ورنىعۋدا. حالقىمىزدىڭ مۇلدە جاڭا ساياسي بولمىسى قالىپتاستى. زاڭ مەن ءتارتىپ تۇجىرىمداماسى قوعامىمىزدىڭ سانا-سەزىمىنىڭ اجىراماس بولىگىنە اينالىپ جاتىر, – دەدى مەملەكەت باسشىسى.
قاسىم-جومارت توقاەۆ جۇرگىزىلگەن رەفورمالار ەكونوميكا سالاسىندا دا ءوز جەمىسىن بەرىپ جاتقانىن اتاپ ءوتتى.
– بىلتىرعى وسى ۋاقىتپەن سالىستىرعاندا, وتكەن 5 ايدا ۇلتتىق ەكونوميكامىز 6 پايىزعا ءوستى. وڭدەۋ ونەركاسىبىنىڭ ءوسىمى دە 6 پايىزعا جۋىقتادى. جالپى, سوڭعى بەس جىلدا ەلىمىزدىڭ ىشكى جالپى ءونىمى 182-دەن 286 ملرد دوللارعا جەتتى. ءبىز بۇعان ەكونوميكانى ءارتاراپتاندىرۋ ارقىلى قول جەتكىزىپ كەلەمىز. بۇگىندە ءتۇرلى سالادا وسىنداي وڭ وزگەرىستەر بولىپ جاتىر. ەڭ باستىسى, ۇلتتىڭ بولمىسى وزگەرە باستادى. ەلدە جاڭا ازاماتتىق, ساياسي مادەنيەت قالىپتاسىپ, جاڭا قۇندىلىقتار ورنىعۋدا. جاس ۇرپاق «ادال ازاماتقا» ءتان قاسيەتتەردى بويىنا ءسىڭىرىپ ءوسىپ جاتىر. زاڭ ۇستەمدىك قۇرۋى ءۇشىن ناقتى شارالار قولعا الىنىپ جاتىر. «تازا قازاقستان» جالپىۇلتتىق اكتسياسى ناعىز حالىقتىق جوباعا اينالدى. ازاماتتارىمىز تابيعاتى تازا ەلدىڭ نيەتى دە تازا دەگەن ۇستانىمدى جان-جاقتى ناسيحاتتاپ, ورتاق ىسكە بەلسەنە اتسالىسۋدا. وسىلايشا, قازاقستان جاڭا تۇرپاتتى ەلگە اينالا باستادى. ويتكەنى تازا بولۋ, بۇل – نيەتى دە, ءىسى دە تازا بولۋ دەگەن ءسوز. ءبىز وزىق ويلى ۇلت بولۋىمىز قاجەت. كوش باستايتىن ەلدەردىڭ قاتارىنا قوسىلۋىمىز كەرەك. ءبىر ەل بولىپ, جۇدىرىقتاي جۇمىلساق, بۇل ماقساتىمىزعا مىندەتتى تۇردە جەتەمىز. وسى ورتاق جۇمىسقا جۋرناليستەر قاۋىمى دا زور ۇلەس قوسىپ ءجۇر. سىزدەردى رەفورمانىڭ قوزعاۋشى كۇشى دەپ ايتۋعا بولادى. تۇپتەپ كەلگەندە, بيلىك تە, ءباسپاسوز دە ەل يگىلىگىنە قىزمەت ەتەدى. ەلىمىزدىڭ ماقساتى – بيىك, باعدارى – ايقىن. بۇل – ادىلەتتى, قاۋىپسىز, وركەنيەتتى جانە تازا قازاقستاندى قۇرۋ, – دەدى پرەزيدەنت.
مەملەكەت باسشىسى قازىر ارقانى كەڭگە سالاتىن ۋاقىت ەمەس ەكەنىن ايتا كەلە, الەمدەگى گەوساياسي, گەوەكونوميكالىق احۋال شيەلەنىسە تۇسكەنىنە توقتالدى.
– جاھاندىق قاۋىپسىزدىك جۇيەسى تۇبەگەيلى وزگەرىپ جاتىر. الپاۋىت ەلدەردىڭ تەكەتىرەسى ۋشىعىپ, كەيبىر ايماقتا قارۋلى قاقتىعىستار ءورشىپ بارادى. الەمدىك ارەنادا كۇردەلى, بىزگە بەيمالىم, تەرەڭ ءتۇسىنۋدى قاجەت ەتەتىن ۇدەرىستەر ورىن الۋدا. نەگىزىندە, حالىقارالىق قۇقىققا قاتىستى ۇعىمدار ارالاسىپ كەتتى. كۇشتىنىڭ قۇقى دارىپتەلە باستادى. عالامدىق تسيفرلىق ترانسفورماتسيا بۇكىل ادامزاتقا بۇرىن-سوڭدى بولماعان قيىندىقتار اكەلەدى. الەم جاڭا داۋىرگە قادام باستى. مۇندا جاساندى ينتەللەكت تەحنولوگيالارى مەملەكەتتىڭ تابىستى دامۋىنىڭ باستى فاكتورىنا اينالادى. الداعى ىرگەلى وزگەرىستەردىڭ اۋقىمىن بىلگەن ءجون. وركەنيەت كوشىنەن قالماۋ ءۇشىن يننوۆاتسيانى بارلىق سالاعا قارقىندى تۇردە ەنگىزۋ قاجەت. مەملەكەت باسشىسى رەتىندە وسى ىسكە باسا ءمان بەرەمىن. جاساندى ينتەللەكتىنىڭ كەڭىنەن تارالۋى كەز كەلگەن ماماندىققا, سونىڭ ىشىندە سىزدەردىڭ كاسىپتەرىڭىزگە دە مۇلدەم جاڭا تالاپتار قويادى. كوپتەگەن ساراپشى كەلەشەكتە ادام ەڭبەگىن الگوريتمدەر الماستىراتىنىن ايتىپ ءجۇر. الايدا بۇل وزگەرىستەر جۋرناليستيكانىڭ جاڭا مۇمكىندىكتەرىن, شىن مانىندە ەكىنشى تىنىسىن اشۋى ابدەن مۇمكىن. قازىردىڭ وزىندە جاڭا نەيروجەلىلەر سۇرانىسقا يە بىرەگەي كونتەنت ءوندىرۋ ءۇشىن قاجەت اقپاراتتى ىزدەپ, تالداي الاتىن پايدالى قۇرالعا اينالدى. وتاندىق جۋرناليستەر ءاردايىم شىعارماشىل, جاڭاشىل ءارى دامۋعا قۇشتار. سىزدەردىڭ جاڭا تەحنولوگيا مۇمكىندىكتەرىن تولىعىمەن پايدالاناتىندارىڭىزعا سەنىمدىمىن. بۇگىندە ەلىمىزدە مەدياسالانىڭ, سونىڭ ىشىندە بلوگوسفەرانىڭ قانات جايۋىنا بارلىق جاعداي جاسالعان. وقيعا ورتاسىنان شىنايى اقپارات تاراتۋدا وزدەرىڭىزگە مول جاۋاپكەرشىلىك جۇكتەلگەن. مۇنى سەزىنە ءبىلۋ وتە ماڭىزدى, – دەدى قاسىم-جومارت توقاەۆ.
پرەزيدەنتتىڭ ايتۋىنشا, الماعايىپ, ب ۇلىڭعىر زاماندا, ەڭ الدىمەن, ەل بىرلىگىن ساقتاپ, باستى بايلىعىمىز – تۇراقتىلىق پەن تىنىشتىقتى باعالاۋ قاجەت.
– وسى ورايدا, جۋرناليستەرگە ايرىقشا سەنىم مەن زور جاۋاپكەرشىلىك جۇكتەلەدى. مىرجاقىپ دۋلاتوۆ «قاي جۇرتتىڭ ءباسپاسوزى كۇشتى بولسا, سول جۇرتتىڭ ءوزى دە كۇشتى» دەگەن. شىن مانىندە, ءسوز – اسا قۋاتتى قارۋ. ءبىراۋىز ءسوز اراز ەلدى تاتۋ قىلادى, تاتۋ ەلدى اراز ەتەدى. سوندىقتان ءسوز قۇدىرەتىن تەرەڭ ءتۇسىنىپ, ونىڭ سالماعىن سەزىنە ءبىلۋ قاجەت. قازىرگى اقپارات تاسقىنىندا سەنىمدى دەرەك, دايەكتى تالداۋ ۇسىنۋدىڭ ءمان-ماعىناسى ارتا ءتۇستى. ءجۋرناليستىڭ اعارتۋشىلىق ميسسياسى الدىڭعى قاتارعا شىقتى. كەز كەلگەن اقپاراتتى مۇقيات ەلەپ-ەكشەپ, جۇرتقا دۇرىس جول كورسەتۋ وتە ماڭىزدى. بۇل رەتتە, سىزدەردى اقپارات الەمىنىڭ تەمىرقازىعى دەۋگە بولادى. مەن جۋرناليستەرىمىزدىڭ ءار مالىمەتتى ۇلت مۇددەسى تۇرعىسىنان سارالاي الارىنا سەنەمىن. ويتكەنى ءوزىم كوپ وقيمىن, سىزدەر جازعان ماقالالارمەن, وي-پىكىرلەرمەن تانىسپىن. قازىر جۋرناليستەرىمىز ءتۇرلى سالادا جۇمىس ىستەپ ءجۇر. قالامگەر ءارى قايراتكەر ازاماتتارىمىز از ەمەس. اقپارات سالاسىنىڭ وكىلدەرى پارلامەنت پەن ءماسليحاتتاردا تابىستى ەڭبەك ەتۋدە. سونداي-اق جەرگىلىكتى جانە ورتالىق اتقارۋ ورگاندارىندا قىزمەت ەتىپ جۇرگەن ازاماتتار بار. بۇل ءجۋرناليستىڭ بەساسپاپ ماماندىق يەسى ەكەنىن انىق كورسەتەدى, – دەدى مەملەكەت باسشىسى.
قاسىم-جومارت توقاەۆ بۇگىنگى جيىنعا اقپارات سالاسىنىڭ ارداگەرلەرى ارنايى شاقىرىلعانىنا نازار اۋداردى.
– ساۋىق جاقانوۆا, جارىلقاپ بەيسەنباي ۇلى, شارحان قازىعۇل سياقتى جۋرناليستيكا مايتالماندارى ورتامىزدا وتىر. سىزدەر ۇلتتىق اقپارات سالاسىن دامىتۋعا زور ۇلەس قوستىڭىزدار. تىلشىلەردىڭ تۇتاس بۋىنى وزدەرىڭىزگە قاراپ ءوستى. سىزدەرگە زور ريزاشىلىعىمدى بىلدىرەمىن. قاي سالادا بولسىن, ادال ەڭبەك لايىقتى باعالانۋعا ءتيىس. بۇل – ءبارىمىز بىرگە قۇرىپ جاتقان ادىلەتتى قوعامنىڭ مىزعىماس ۇستانىمى, – دەدى پرەزيدەنت.
مەملەكەت باسشىسى جىل سايىنعى داستۇرگە ساي جۋرناليستەرگە پرەزيدەنت سىيلىعى مەن گرانتتارىن تاپسىرىپ, العىسىن جاريالادى. سونىمەن قاتار مەديا سالاسىنىڭ وكىلدەرىن مەملەكەتتىك ناگرادامەن ماراپاتتادى.
ءىس-شارادا جۋرناليستيكا سالاسىنىڭ ارداگەرى شارحان قازىعۇل, «كازاحستانسكايا پراۆدا» گازەتىنىڭ ءبولىم مەڭگەرۋشىسى يۋليا ماگەر جانە «حابار» تەلەارناسىنىڭ جۇرگىزۋشىسى گۇلنازيا زاريپوۆا ءسوز سويلەدى.
ايتا كەتكەن ءجون, وسى كۇنى ماراپاتتالعاندار قاتارىنان «قازاق گازەتتەرى» سەرىكتەستىگىنە قاراستى باسىلىمداردا قىزمەت ەتەتىن ارىپتەستەرىمىز دە كورىندى. اتاپ ايتساق, پرەزيدەنتتىڭ باق سالاسىنداعى سىيلىعى «Egemen Qazaqstan» گازەتى باس رەداكتورىنىڭ ورىنباسارى تالعات باتىرحانعا جانە «كازاحستانسكايا پراۆدا» گازەتىنىڭ ءبولىم رەداكتورى يۋليا ماگەرگە بەرىلدى. ال «Ana tili» گازەتىنىڭ شىعارماشىلىق ۇجىمىنا پرەزيدەنتتىڭ العىسى جاريالاندى. سونىمەن قاتار «ۇيعىر اۆازي» گازەتىنىڭ باس رەداكتورى ەرشات ءاسماتوۆ «قۇرمەت» وردەنىمەن, «ۇلان» گازەتىنىڭ باس رەداكتورى جادىرا نارماحان «ەرەن ەڭبەگى ءۇشىن» مەدالىمەن ماراپاتتالدى.