استانا. 4 شىلدە. اقمولا وبلىسىندا پوليتسەي ايەلى مەن ءوزىن اتىپ ءولتىردى. وسىعان بايلانىستى قىلمىستىق ءىس قوزعالدى. بۇل تۋرالى ras.kz حابارلادى.
اقمولا وبلىستىق ىشكى ىستەر دەپارتامەنتى ءباسپاسوز قىزمەتىنىڭ جەتەكشىسى گۇلنار پينچۋكتىڭ باسىلىمعا بەرگەن دەرەگىنە قاراعاندا, بۇلاندى اۋداندىق ىشكى ىستەر ءبولىمىنىڭ قىزمەتكەرى اۋەلى ايەلىن, سودان سوڭ ءوزىن اتىپ ولتىرگەن.
«توتەنشە جاعداي ماكينسك قالاسىندا ورىن الدى. ول جونىندەگى اقپار اۋداندىق ءبولىمنىڭ كەزەكشى بولىمىنە كەلىپ تۇسكەن», – دەدى گۇلنار پينچۋك. ايەلى مەن ءوزىن اتىپ ولتىرگەن پوليتسيا قىزمەتكەرىنىڭ جاسى 31-دە بولعان, پوليتسيا كاپيتانى شەنىندەگى ول ۋچاسكەلىك ينسپەكتوردىڭ كومەكشىسى بولىپ قىزمەت ىستەگەن. قازا تاپقان جۇبايلاردىڭ ارتىندا ءۇش جاسار بالالارى قالعان.
«وقيعا ورنىنا تەرگەۋ-جەدەل توبى, سونداي-اق وزىندىك قاۋىپسىزدىك باسقارماسى مەن اقمولا وبلىستىق ىشكى ىستەر دەپارتمەنتىنىڭ باسشىلىعى شۇعىل اتتاندى. قىلمىستىق كودەكستىڭ 99-بابى, 1-بولىگى بويىنشا قىلمىستىق ءىس قوزعالدى», – دەگەندى قوستى گۇلنار پينچۋك.
ءباسپاسوز قىزمەتىنىڭ باسشىسى سونىمەن بىرگە تەرگەۋ تولىق اياقتالعانعا دەيىن «اتالمىش توتەنشە جاعدايدىڭ جايى مەن سەبەپتەرى تۋرالى ءبىر نارسە ايتا قويۋ قيىن» ەكەنىن ەسكەرتىپ ءوتتى. «تەرگەۋ ناتيجەلەرى تۋرالى باق-تارعا قوسىمشا حابارلايمىز», – دەدى ول.
ايتا كەتۋىمىز كەرەك, اقمولا وبلىسىندا وسىعان ۇقساس وقيعا بيىلعى كوكتەمدە دە ورىن العان بولاتىن. تسەلينوگراد اۋداندىق ىشكى ىستەر ءبولىمىنىڭ 24 جاستاعى تەرگەۋشى كەلىنشەگى 25 ناۋرىزدا ءوزىن ءوزى ءولتىردى. اعا لەيتەنانت جۇمىس كابينەتىندە تابەلدىك قارۋمەن ءوزىن ءوزى اتقان. انىقتالماعان رەسمي دەرەكتەر بويىنشا, پوليتسيا قىزمەتكەرىنىڭ سۋيتسيد جاساۋىنا وتباسىلىق كيكىلجىڭ اسەر ەتكەن.
تالعات رايىمبەك.
دەرەك, سۋرەت: ras.kz.