قاسىم-جومارت توقاەۆ شەتەلدىك ينۆەستورلار كەڭەسىنىڭ 37-ءشى پلەنارلىق وتىرىسىندا قازاقستاننىڭ شيكىزاتتى تەرەڭ وڭدەۋ جانە جاڭا بۋىنداعى ونەركاسىپتىك ءوندىرىس قۇرۋ جولىندا باتىل قادام جاساعانىنا نازار اۋداردى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
مەملەكەت باسشىسى قازاقستان تەمىرجول سالاسىنا ارنالعان ماشينا جاساۋ بويىنشا Wabtec, Alstom جانە Stadler كومپانيالارىمەن تابىستى ىنتىماقتاستىق ورناتقانىن جەتكىزدى. اتاپ ايتقاندا, Alstom كومپانياسى ەلىمىزدە سەرۆيستىك ورتالىقتار سالىپ, 2028 جىلدان باستاپ لوكوموتيۆتەردىڭ جاڭا بۋىنىن شىعارۋدى جوسپارلاپ وتىر. Wabtec كومپانياسى بالاما وتىنمەن جۇرەتىن جىلجىمالى قۇرامعا 200 ميلليون دوللار ينۆەستيتسيا قۇيدى. ال Stadler Rail كاسىپورنى وندىرىستىك قۋاتى جىلىنا 100 ۆاگون شىعاراتىن زاۋىت سالدى.
قاسىم-جومارت توقاەۆ قازاقستاننىڭ اگروونەركاسىپ كەشەنىنىڭ جوعارى الەۋەتىنە توقتالدى. ەلىمىز ەگىستىككە جانە جايىلىمعا جارامدى جەر كولەمى جاعىنان الەمدە التىنشى ورىندى يەلەنەدى, سونداي-اق استىق ەكسپورتى بويىنشا جەتەكشى ون مەملەكەتتىڭ قاتارىنا كىرەدى. مەملەكەت باسشىسى PepsiCo, Fufeng Group جانە Dalian Hesheng سياقتى شەتەلدىك ينۆەستورلاردىڭ تابىستى قىزمەتىن مىسالعا كەلتىرىپ, ولاردىڭ جەرگىلىكتى ونىمگە تۇراقتى سۇرانىس قالىپتاستىرىپ, وزىق تەحنولوگيالاردى ەنگىزىپ جاتقانىن ايتتى.