2025 جىلعى 23 ماۋسىمدا الماتى وبلىسى تالعار قالاسىندا حالىقارالىق تالاپتارعا ساي «KFF Academy by Almaty International Airport» فۋتبول اكادەمياسىنىڭ ىرگەتاسىن قالاۋ ءراسىمى ءوتتى. جوبا قازاقستان فۋتبول فەدەراتسياسىنىڭ باستاماسىمەن جانە الماتى حالىقارالىق اۋەجايىنىڭ قارجىلىق قولداۋىمەن جۇزەگە اسىرىلىپ جاتىر, دەپ حابارلايدى Egemen.kz.
سالتاناتتى شاراعا جوبا سەرىكتەستەرى مەن سپورت سالاسىنىڭ وكىلدەرى قاتىستى. العاشقى ءسوزدى TAV Airports Holding كومپانياسىنىڭ باس ديرەكتورى سەركان كاپتان سويلەدى. ونىڭ ايتۋىنشا, بۇل جوبا تەك الەۋمەتتىك جاۋاپكەرشىلىك ەمەس, سونىمەن قاتار كومپانيانىڭ تۇراقتى دامۋ ستراتەگياسىمەن تىعىز بايلانىستى.
«TAV Airports Holding ءۇشىن تۇراقتى دامۋ قۇندىلىقتارى جاۋاپكەرشىلىككە, قوعاممەن تىعىز بايلانىس ورناتۋعا جانە بيزنەستەن بولەك ماقساتتارعا ۇمتىلۋعا نەگىزدەلگەن. ءبىز ءۇشىن كورپوراتيۆتىك الەۋمەتتىك جاۋاپكەرشىلىك — جاي عانا نارسە ەمەس, ول قىزمەتىمىزدىڭ نەگىزى. جاستاردىڭ دامۋىنا جانە قوعامنىڭ يگىلىگىنە باعىتتالعان باستامالاردى قولداۋ — ءبىزدىڭ ستراتەگيامىز بەن ءىس-ارەكەتىمىزدى ايقىندايتىن قۇندىلىق», دەدى سەركان كاپتان.
قازاقستان فۋتبول فەدەراتسياسىنىڭ پرەزيدەنتى مارات وماروۆ اكادەميا جوباسىنىڭ ەلدەگى بالالار مەن جاسوسپىرىمدەر سپورتىن دامىتۋدا ماڭىزدى ءرول اتقاراتىنىن اتاپ ءوتتى.
«بۇگىن ىرگەتاسى قالانعان فۋتبول اكادەمياسى — قازاقستان فۋتبول فەدەراتسياسىنىڭ اۋقىمدى جانە ستراتەگيالىق ماڭىزى زور العاشقى جوباسى. ول ەلىمىزدەگى جاس فۋتبولشىلاردى دايارلاۋ جۇيەسىن وزگەرتىپ, جاڭا كوزقاراسپەن قاراۋعا مۇمكىندىك بەرەدى», دەدى قفف پرەزيدەنتى مارات وماروۆ.
ىرگەتاسىن قالاۋ ءراسىمى كەزىندە قۇرمەتتى قوناقتار فۋتبول دوبىنا قولتاڭبالارىن قويىپ, ونى جاس سپورتشىلارعا تابىستادى.
جالپى اۋماعى 5 520 شارشى مەتردى قۇرايتىن كەشەن ءۇش نەگىزگى بلوكتان تۇرادى:
سپورتتىق بلوك: جابىق فۋتبول زالى, قالپىنا كەلۋ باسسەيندەرى, جالپى دەنە دايىندىعى زالدارى, كيىم اۋىستىراتىن جانە قىزمەتتىك بولمەلەر; اكىمشىلىك-تۇرمىستىق بلوك: جاتتىقتىرۋشىلار بولمەلەرى, مەديتسينالىق-وڭالتۋ ورتالىقتارى, كونفەرەنتس-زال مەن اسحانا; جاتاقحانا: ءتورت قاباتتى عيمارات, وقۋشىلار مەن قىزمەتكەرلەرگە ارنالعان بولمەلەر مەن دايىندىق ايماقتارى بار.«KFF Academy by Almaty International Airport» — بالالار مەن جاسوسپىرىمدەر فۋتبولىن دامىتۋداعى جۇيەلى جانە ينفراقۇرىلىمدىق قادام. جوبا الداعى ۋاقىتتا ۇلتتىق فۋتبول قاۋىمداستىعى ءۇشىن زاماناۋي ۇلگىگە اينالۋى مۇمكىن.