20 ماۋسىمدا اتىراۋ وبلىسىنىڭ اكىمى سەرىك شاپكەنوۆ «اقجايىق» مەملەكەتتىك تابيعي رەزەرۆاتى اۋماعىنداعى ءورت سالدارىن جويۋعا ارنالعان جەدەل شتابتىڭ كوشپەلى وتىرىسىن وتكىزدى, دەپ حابارلايدى Egemen.kz.
ءتىلسىز جاۋ تولىقتاي وقشاۋلاندى, بىراق تورف قاباتتارى مەن قامىستاردىڭ ءتۇتىنى ءسوندىرىلىپ جاتىر.
اپات ورنىندا اشىق وت وشاقتارى تىركەلمەگەنىمەن, تورف پەن قامىس قاباتتارىنىڭ ءتۇتىنى تولىق سونگەن جوق. قۇتقارۋشىلار تاۋلىك بويى جۇمىس ىستەۋدە. قايتا تۇتانۋدىڭ الدىن الۋ ءۇشىن ورتەنگەن اۋماقتار سۋ قۇيىلىپ, توپىراقپەن جابىلىپ جاتىر.
قۇتقارۋ جۇمىستارىنا 150-گە جۋىق ادام, 40 تەحنيكا جانە 2 تىكۇشاق تارتىلعان. جيىن بارىسىندا توتەنشە جاعدايلار دەپارتامەنتىنىڭ باستىعى نۇرلان جاناباەۆ پەن وبلىس اكىمىنىڭ ورىنباسارى قايرات نۇرتاەۆتىڭ باياندامالارى تىڭدالدى.
وبلىس اكىمى ءورت وشاقتارى تولىق جويىلعانشا جۇمىستى باسەڭدەتپەۋدى, جاعدايدى ۇنەمى باقىلاۋدا ۇستاۋدى جانە بارلىق قىزمەتتەردىڭ ۇيلەسىمدى جۇمىس ىستەۋىن تاپسىردى.
جاسىرىن وشاقتاردى انىقتاۋ ءۇشىن جىلۋ ءتۇسىرىلىم جاسايتىن درون قولدانىلۋدا
ءتۇتىن مەن وت وشاقتارىن ءدال انىقتاۋ ماقساتىندا جىلۋ تۇسىرەتىن تەپلوۆيزورلى درون پايدالانىلىپ جاتىر. بۇل قۇرىلعى جەر استىنداعى تلەۋ وشاقتارىن انىقتاۋعا, نەگىزگى قاۋىپ ايماقتارىن بەلگىلەۋگە جانە كۇشتى ءدال باعىتتاۋعا مۇمكىندىك بەرەدى.
ءورتتىڭ شىعۋ سەبەپتەرى تەكسەرىلىپ جاتىر
جيىندا سەرىك شاپكەنوۆ ءورتتىڭ شىعۋ سەبەپتەرىنە قاتىستى ءتۇرلى بولجامدارعا توقتالىپ, ارنايى ورگانداردىڭ بارلىق نۇسقالاردى تەكسەرىپ جاتقانىن مالىمدەدى.
– الەۋمەتتىك جەلىلەردە ءتۇرلى پىكىرلەر ايتىلۋدا. مەنىڭ تاپسىرماممەن بۇل جاعداي جان-جاقتى زەرتتەلىپ جاتىر. ەگەر ءورت ادامنىڭ ارەكەتىنەن, اسىرەسە ادەيى شىققانى انىقتالسا, كىنالىلەر زاڭ اياسىندا جاۋاپقا تارتىلادى, – دەدى اكىم.
تەكسەرۋ بارىسى تۋرالى حالىق پەن باق وكىلدەرىنە قوسىمشا اقپارات بەرىلەتىنى ايتىلدى.
جۇيەلى شەشىمدەر قابىلدانادى
اكىم ءورتتىڭ ۇزاققا سوزىلعانىن ايتىپ, بۇل جاعدايدىڭ قورشاعان ورتاداعى جۇيەلى پروبلەمالاردى اشىپ كورسەتكەنىن جەتكىزدى.
– كاسپيدىڭ تايازدانۋى مەن قامىستىڭ شەكتەن تىس ءوسۋى – بولاشاقتا ءوڭىر ءۇشىن ۇلكەن قاۋىپ. وسىعان بايلانىستى توتەنشە جاعدايلار جانە ەكولوگيا مينيسترلىكتەرىمەن بىرلەسىپ, مۇنداي وقيعالاردىڭ الدىن الۋعا باعىتتالعان كەشەندى جوسپار قابىلدايمىز, – دەدى سەرىك شاپكەنوۆ.
العىس پەن قولداۋ
اتىراۋ وبلىسىنىڭ اكىمى ورتپەن كۇرەسكە اتسالىسىپ جاتقان قىزمەتكەرلەرگە العىس ءبىلدىرىپ, ولاردىڭ جانكەشتى ەڭبەگىن ەرەكشە اتاپ ءوتتى.
– قۇرمەتتى جەرلەستەر, قيىن ساتتە سابىرلىلىق تانىتىپ, تۇسىنىستىكپەن قاراعاندارىڭىز ءۇشىن سىزدەرگە العىس ايتامىن. ال ءتىلسىز جاۋمەن كۇرەسىپ جاتقان مامانداردىڭ قاجىرلى ەڭبەگى – شىنايى كاسىبي ەرلىك, – دەدى وبلىس اكىمى.