اقش پرەزيدەنتى دونالد ترامپتىڭ اكىمشىلىگى يرانعا قارسى اسكەري شابۋىل جاساۋعا كەلىسىم بەرگەن. بۇل تۋرالى تانىمال امەريكالىق جۋرناليست, پۋليتتسەر سىيلىعىنىڭ لاۋرەاتى سەيمۋر حەرش ءوزىنىڭ Substack پلاتفورماسىنداعى ماقالاسىندا مالىمدەدى, دەپ جازادى Egemen.kz.
ءجۋرناليستىڭ ايتۋىنشا, اق ءۇي يران اۋماعىنا كەڭ اۋقىمدى بومبالاۋ وپەراتسياسىن وتكىزۋگە رۇقسات بەرگەن. بۇل اقپارات امەريكالىق جانە يزرايلدىك رەسمي دەرەككوزدەرگە سۇيەنە وتىرىپ جاريالانعان.
The Wall Street Journal باسىلىمى دا وسىعان ۇقساس اقپارات تاراتقان. ونىڭ مالىمەتىنشە, ترامپ اكىمشىلىگى يرانعا قارسى اسكەري سوققى جوسپارىن بەكىتكەن, الايدا شابۋىلدى باستاۋ تۋرالى ناقتى بۇيرىق ءالى بەرىلگەن جوق. باسىلىم دەرەككوزدەرى ترامپ يران بيلىگىنىڭ يادرولىق باعدارلامادان ءوز ەركىمەن باس تارتادى دەپ ۇمىتتەنىپ وتىرعانىن حابارلايدى.
اسكەري ارەكەت باستالعان جاعدايدا, باستى نىسان – فوردوداعى ۋران بايىتۋ زاۋىتى بولۋى مۇمكىن. بۇل ستراتەگيالىق ماڭىزى بار وبەكت تاۋ استىندا ورنالاسقان جانە ونى تەك جوعارى قۋاتتى GBU-57A بومبالارى عانا جويا الادى. اتالعان بومبالاردى تاستاۋ مۇمكىندىگى تەك اقش-تىڭ B-2 Spirit اتتى كورىنبەيتىن ستراتەگيالىق بومبالاۋشى ۇشاعىندا بار.
سونىمەن قاتار Axios باسىلىمى اق ۇيدەگى دەرەككوزدەرگە سىلتەمە جاساپ, ترامپ اكىمشىلىگى نىسانالى سوققىلارمەن شەكتەلىپ, تاياۋ شىعىستا ۇزاققا سوزىلاتىن اسكەري قاقتىعىستان اۋلاق بولۋدى كوزدەگەنىن جازعان.