قوستاناي. 04 تامىز. رەسەيدىڭ چەليابى وبلىسىنداعى ناعايباق اۋدانىندا «ماحاللا» مەشىتىنىڭ 20 جىلدىعى اتالىپ ءوتتى. بۇل تۋرالى egemen.kz ءتىلشىسى حابارلادى.
قوستانايمەن كورشى چەليابى وبلىسىندا 36 مىڭنان اسا قانداستارىمىز تۇرادى. ناعايباق اۋدانىنداعى ارسلانباي اۋىلىن تۇتاس قانداستارىمىز جايلاپ وتىر. مۇندا 1995 جىلى مۇسىلمان مەشىتى سالىنعان بولاتىن. وتكەن جىلدان باستاپ, وسى مەشىت قايتا جوندەلگەن بولاتىن. يماندىلىق ءۇيىنىڭ 20 جىلدىق مەرەكەسى اتالىپ ءوتتى. وعان قازان قالاسىنان, ومبىدان, چەليابى وبلىسىنىڭ اۋداندارىنان قوناقتار كەلدى.
مەرەكەدە ۋرال ءوڭىرىنىڭ ءمۋفتيى, چەليابى جانە قورعان وبلىستارى مۇسىلماندار ايماقتىق ءدىني باسقارماسىنىڭ توراعاسى رينات قاجى رايف جانە باسقا دا ءدىن وكىلدەرى, قۇرمەتتى قوناقتار يماندىلىق ءۇيىنىڭ مەركەسىمەن اۋىل, اۋدان جۇرتشىلىعىن قۇتتىقتادى.
رينات قاجى حازرات رايف: «ناعايباق اۋدانىنداعى جالعىز مەشىتتىڭ جوندەلىپ, قايتا جاڭعىرتىلعانىنا ءبىز قۋانىشتىمىز. بۇل مۇسىلمان جۇرتىنا قىزمەت ەتە بەرەدى. اۋداندا تاعى دا مەشىت سالىناتىنىنا سەنىم بىلدىرەمىز», – دەدى. مۇنان كەيىن ناعايباق اۋدانىنىڭ باسشىسى قايىربەك سەيىلوۆ اۋدان جۇرتشىلىعىن, كەلگەن قوناقتاردى مەرەكەمەن قۇتتىقتادى. سوناۋ 90-شى جىلدارداعى اۋىر كەزەڭدە وسى اۋداندا مەشىتتىڭ سالىنۋىنا ءوزىنىڭ مۇرىندىق بولعانىن ايتا كەلىپ, اۋدان باسشىسى جۇرتتى وسى ىسكە ۇيىتۋ, ونىڭ قارجىسىن تابۋ, قۇرىلىسىن جۇرگىزۋ وڭايعا سوقپاعانىن دا تىلگە تيەك ەتتى. سول كەزدە كومەك قولىن سوزعاندارعا راحمەتىن ايتتى.
مەشىتتىڭ مەرەكەسىنە دۇنيەجۇزى قازاقتارى قاۋىمداستىعى قوستاناي وبلىستىق فيليالىنىڭ دەلەگاتسياسى دا قاتىستى. مەرەكە كونتسەرتپەن جالعاستى. مەشىت مەرەكەسىنە ارنالىپ اس بەرىلدى.
ءنازيرا جارىمبەتوۆا.
دەرەك, سۋرەت: egemen.kz.