وتكەن ايدا Enbek.kz ەلەكتروندى ەڭبەك بيرجاسىندا 86 مىڭ بوس جۇمىس ورنى مەن 110 مىڭ تۇيىندەمە ورنالاستىرىلىپتى. الدىڭعى ايمەن سالىستىرعاندا سۇرانىس پەن ۇسىنىستىڭ ازايعانى بايقالادى.
ماماندارعا ەڭ كوپ سۇرانىس ادەتتەگىدەي ءبىلىم بەرۋ سالاسىنا تيەسىلى. مۇندا 15 مىڭنان استام بوس جۇمىس ورنى ۇسىنىلعان. سونداي-اق قىزمەت كورسەتۋدىڭ باسقا تۇرلەرىنە 10,7 مىڭ, قۇرىلىس سالاسىنا 8,5 مىڭ جۇمىسشى ىزدەگەن. سۇرانىس نەگىزىنەن ءىرى قالالار مەن اگروونەركاسىپتىك ايماقتاردا شوعىرلانعان. وتكەن ايدا ورتا بىلىكتى مامانداردىڭ تاپشىلىعى بايقالعان. سۇرانىس ۇسىنىستان 16%-عا اسىپ تۇسكەن. سونىمەن قاتار جوعارى بىلىكتى لاۋازىمدارعا جۇمىس ىزدەۋشىلەر تاراپىنان باسەكەلەستىك كۇشەيدى.
جۇمىس بەرۋشىلەردىڭ كوپتىگى جونىنەن استانا قالاسى الدا تۇر. ەلوردا جىل سايىن كەڭەيىپ, كوركەيىپ, ءزاۋلىم عيماراتتار سالىنىپ جاتقانىن, حالىق سانى كوبەيگەنىن ەسكەرسەك, جۇمىسشىلارعا سۇرانىستىڭ كوپ بولۋى زاڭدىلىق. ەلەكتروندى ەڭبەك بيرجاسىندا تىركەلگەن بارلىق بوس جۇمىس ورىندارىنىڭ 11,5%-ى وسى قالاعا تيەسىلى. استانادان كەيىن تۇركىستان (7,5%), پاۆلودار (7,1%) وبلىستارى تۇر. بىرقاتار وڭىردە بوس جۇمىس ورىندار سانىنىڭ تورتتەن ءبىرى قىسقارعان. مىسالى, باتىس قازاقستان وبلىسىندا – 36%, الماتىدا – 35%, ماڭعىستاۋدا – 34%, ۇلىتاۋدا 25% ازايعان.
جۇمىس ىزدەۋشىلەردىڭ ەڭ بەلسەندى ساناتى بۇرىنعىشا 34 جاسقا دەيىنگى ازاماتتار. ولار بارلىق تۇيىندەمەنىڭ 44%-ىن قۇرايدى. ورتا جاستاعى ۇمىتكەرلەردىڭ تۇيىندەمەلەرى – 37%. جۇمىس ىزدەۋشىلەردىڭ 52,8%-ىن ايەلدەر, 47,2%-ىن ەرلەر قۇرايدى. جۇمىس ىزدەۋشىلەر بەلسەندىلىگىنىڭ تومەندەۋى الماتى قالاسىندا (-28%) بايقالدى.
سۇرانىسقا يە ماماندىقتاردىڭ ىشىندە ءتارتىپ ساقشىلارىنا 1,8 مىڭ بوس ورنى ۇسىنىلعان. سول سەكىلدى مەيىرگەرلەرگە 1,7 مىڭ ورىن, جۇرگىزۋشىلەرگە 1,5 مىڭ جۇمىس ورنى تىركەلگەن. جالاقى جونىندەگى ەڭ كوپ ۇسىنىس تاۋ-كەن ونەركاسىبىندەگى باسشىنىڭ ورىنباسارىنا تۇسكەن. مۇندا جالاقى ورتا ەسەپپەن 788 مىڭ تەڭگەدەن باستالادى. سول سەكىلدى باس قۇرىلىسشىعا 662 مىڭ, بۇرعىلاۋشى-ينجەنەرلەرگە 605 مىڭ تەڭگە تولەيمىن دەگەن جۇمىس بەرۋشىلەر بولعان. جۇمىس ىزدەۋشىلەر اراسىندا ەڭ جوعارى جالاقى كۇتەتىن ۇشقىشتار ەكەن. ولار ورتا ەسەپپەن 2,3 ملن تەڭگەدەن جوعارى جالاقى سۇرايدى. IT جوبالاردى ازىرلەۋ ءبولىمىنىڭ باسشىلىعىنا 1,2 ملن تەڭگە, ءوندىرۋشى سالاداعى ۋچاسكە باسشىلىعىندا 1,1 ملن تەڭگە جالاقىعا جۇمىس ىستەۋگە دايىن ازاماتتار بار.
جالپى, كەيىنگى كەزدە جۇمىس بەرۋشىلەردىڭ عانا ەمەس, جۇمىس ىزدەۋشىلەردىڭ بەلسەندىلىگى تومەندەگەنى بايقالادى. بۇرىنعىشا جۇمىسشى ماماندىق يەلەرى, جۇرگىزۋشىلەر, كۇزەتشىلەر, مەديتسينا قىزمەتكەرلەرى سۇرانىسقا يە مامانداردىڭ الدىڭعى شەبىندە قالا بەرەدى.