جىل باسىنان بەرى 247,6 مىڭ ازامات, ونىڭ ىشىندە 39,4 مىڭعا جۋىق جۇمىسسىز Skills Enbek كاسىپتىك وقىتۋ پلاتفورماسىندا ونلاين-كۋرستاردان ءوتىپ, وقىعانىن راستايتىن سەرتيفيكات العان. وسى كۇنگە دەيىن پلاتفورماعا 791,3 مىڭ ادام, ونىڭ ىشىندە جىل باسىنان بەرى 292,6 مىڭ ادام تىركەلگەن.
وقۋدان وتكەن 39,4 مىڭ جۇمىسسىز ازاماتتىڭ 10,4 مىڭعا جۋىعى نەگىزىنەن تۇركىستان, الماتى, قوستاناي وبلىستارى مەن شىمكەنت قالاسىنىڭ جاستارى. پلاتفورما ىسكە قوسىلعاننان باستاپ اۆتورلار ءتۇرلى باعىت بويىنشا مىڭنان استام كۋرس جاريالاعان. ونىڭ 332-ءسى تەگىن. بۇدان وزگە Courstore, Fluent Education جانە ياندەكس قازاقستان سەرىكتەستەرىنىڭ كۋرستارى بار. پلاتفورماداعى كەز كەلگەن كۋرستىڭ ۇزاقتىعى 1-دەن 72 ساعاتقا دەيىن بولۋى مۇمكىن. مامىر ايىندا ءجيى سۇرانىستا بولعان كۋرستاردىڭ ىشىندە «سەنىڭ مانسابىڭداعى قادام: «ەلەكتروندىق ەڭبەك بيرجاسىن قالاي پايدالانامىز», «Motion design», «ساقتاندىرۋ اگەنتى» سىندى ساباقتار بار. پلاتفورمادا ءبىلىم بەرۋ, تاربيەلەۋ, الەۋمەتتىك قىزمەت كورسەتۋ تاعىسىن-تاعى سالاداعى ءتۇرلى ماماندىقتار بويىنشا تەگىن كۋرستار سانى ۇنەمى ارتىپ وتىرادى.
Skills Enbek قوسىمشاسى حالىقتىڭ ءبىلىم دەڭگەيى مەن كاسىبيلىگىن ارتتىرۋعا, مانساپتىق دامۋدى ىنتالاندىرۋعا, ء«ومىر بويى وقىتۋ» تۇجىرىمداماسىن ىلگەرىلەتۋگە باعىتتالعان. ماركەتپلەيس قىزمەتتەر نارىعى قاعيداتى بويىنشا ونلاين كۋرستارعا قول جەتكىزۋدى ۇسىناتىن حالىقارالىق وقىتۋ الاڭدارىنا ۇقساس قۇرىلعان. كۋرستار ەلەكتروندىق ەڭبەك بيرجاسىندا (enbek.kz) قولجەتىمدى. پلاتفورمادا ءبىلىم الۋشى وقۋدى وزىنە ىڭعايلاي الادى. ەل ازاماتتارى كوپ كۋرستىڭ ىشىنەن وزىنە كەرەگىن تاڭداعان سوڭ, وقۋ ۇدەرىسىن باقىلاپ, ءتىپتى كۋرس اۆتورلارىمەن جىلدام بايلانىسا الادى. پايدالانۋشىلارعا جاساندى ينتەللەكت كومەگىمەن چات-بوت قولجەتىمدى. وقۋ اياقتالعان سوڭ ءبىلىم الۋشى 70% شەكتى دەڭگەيمەن تەست تاپسىرۋعا ءتيىس. ونلاين كۋرستى ءساتتى اياقتاعاندار عانا داعدىلاردى يگەرگەنىن راستايتىن سەرتيفيكات الادى.