پرەمەر-ءمينيستردىڭ ورىنباسارى ەرمەك كوشەرباەۆتىڭ توراعالىعىمەن دارىلىك قامتاماسىز ەتۋ جۇيەسىن رەفورمالاۋ ماسەلەلەرى بويىنشا جۇمىس كەڭەسى ءوتتى. كۇن تارتىبىندەگى باستى ماسەلە – جوعارى اۋديتورلىق پالاتا (جاپ) جۇرگىزگەن مەملەكەتتىك ءاۋديتتىڭ قورىتىندىسى.
كەڭەسكە دەنساۋلىق ساقتاۋ ءمينيسترى اقمارال ءالنازاروۆا, جوعارى اۋديتورلىق پالاتا, باس پروكۋراتۋرا, قارجىلىق مونيتورينگ اگەنتتىگى جانە سىبايلاس جەمقورلىققا قارسى ءىس-قيمىل اگەنتتىگىنىڭ وكىلدەرى قاتىستى.
اۋديت قورىتىندىسى بويىنشا دارىلىك زاتتارمەن قامتاماسىز ەتۋ تىزبەگىنىڭ بارلىق كەزەڭىندە – تىركەۋدەن باستاپ وندىرىسكە جانە پاتسيەنتتەرگە دەيىن جەتكىزۋدە بىرقاتار زاڭبۇزۋشىلىق انىقتالعان. ەڭ وزەكتى ماسەلەلەردىڭ قاتارىندا باعا قالىپتاستىرۋداعى ولقىلىقتار, ساپانى باقىلاۋدىڭ جەتكىلىكسىزدىگى, كلينيكالىق حاتتامالاردىڭ ۋاقتىلى جاڭارتىلماۋى بار. سونىمەن قاتار فارماكولوگيالىق قاداعالاۋدىڭ السىزدىگى جانە سالالىق عىلىمي ازىرلەمەلەردىڭ تيىمدىلىگى تومەن ەكەندىگىنە نازار اۋدارىلدى.
ۆيتسە-پرەمەر ەرمەك كوشەرباەۆ انىقتالعان جۇيەلى ماسەلەلەرگە جەدەل جانە ناقتى ارەكەت ەتۋ قاجەتتىگىن اتاپ ءوتتى.
«بيۋدجەت قاراجاتىنىڭ ءتيىمسىز جۇمسالۋىنا, جەتكىزۋدەگى ۇزىلىستەرگە جانە ساپاسىز پرەپاراتتاردى قولدانۋ قاۋپىنە جول بەرۋگە بولمايدى. بارلىق بۇزۋشىلىقتار تەك باعالاۋدى ەمەس, سونىمەن قاتار قۇقىقتىق جانە باسقارۋشىلىق شەشىمدەر قابىلداۋدى قاجەت ەتەدى. ازاماتتاردى قاۋىپسىز ءارى قولجەتىمدى دارىلەرمەن قامتاماسىز ەتۋ – ءبىرىنشى كەزەكتەگى مىندەت. بۇل باعىتتا كىدىرىس بولماۋعا ءتيىس», دەدى ە.كوشەرباەۆ.
كەڭەس بارىسىندا دەنساۋلىق ساقتاۋ ءمينيسترى انىقتالعان زاڭبۇزۋشىلىقتاردى جويۋعا باعىتتالعان العاشقى كەزەكتەگى شارالار كەشەنىن تانىستىردى. ونىڭ ايتۋىنشا, جاپ ۇسىنىمدارىنا سايكەس دارىلىك قامتاماسىز ەتۋ سالاسىندا جۇيەلى وزگەرىستەر باستالدى. جاڭا كەشەندى شارالار حالىققا دارىلەردىڭ قولجەتىمدى بولۋىن ارتتىرۋعا باعىتتالعان. مينيستر باعا رەتتەۋ تەتىكتەرىنە جەكە توقتالىپ ءوتتى.
«شەكتى باعالاردى رەتتەۋدىڭ جاڭا ءتارتىبى مەملەكەتتىك تەگىن باعدارلامالار — تمككك جانە ءمامس اياسىنداعى دارىلەرگە دە, كوتەرمە-بولشەك جەلى ارقىلى ساتىلاتىن پرەپاراتتارعا دا قولدانىلادى. امبۋلاتورلىق جانە ستاتسيونارلىق ەمگە ارنالعان تەگىن دارىلەر تىزىمىندە باعانى 19%-عا دەيىن, ال بولشەك ءدارىحانا سەگمەنتىندە 30%-عا دەيىن تومەندەتۋ كوزدەلگەن», دەپ مالىمدەدى ا.ءالنازاروۆا.
باعا قالىپتاستىرۋ تاسىلدەرىن قايتا قاراۋ ءدارى-دارمەكتەردىڭ تەگىن ءتىزىم بويىنشا دا, جالپى نارىقتا دا قولجەتىمدىلىگىن ارتتىرادى.
سونىمەن قاتار دارىلىك زاتتاردى تسيفرلىق تاڭبالاۋ جۇيەسى ەنگىزىلدى. بۇگىندە 366 ملن-نان استام وراما تاڭبالانىپ, 80 ملن-نان استامى اينالىمنان شىعارىلدى. جۇيە فارماتسەۆتيكالىق نارىقتىڭ بارلىق نەگىزگى قاتىسۋشىلارىن قامتىپ, ءاربىر ءدارىنىڭ قوزعالىس جولىن قاداعالاۋعا جانە تۇتىنۋشىلاردى جالعان ونىمنەن قورعاۋعا مۇمكىندىك بەرەدى.
تاعى ءبىر ماڭىزدى باستاما – دەنساۋلىق ساقتاۋ مينيسترلىگىنىڭ تسيفرلاندىرۋ مينيسترلىگىمەن بىرلەسىپ ىسكە اسىرىپ جاتقان دارىلىك زاتتاردى جەدەل تىركەۋ بويىنشا قاناتقاقتى جوبا. جاڭا ءتارتىپ تىركەۋ مەرزىمىن 100 كۇنگە دەيىن قىسقارتۋعا مۇمكىندىك بەرەدى. سونىمەن قاتار ساراپتاما, باعا بەلگىلەۋ جانە ۇلتتىق دارىلىك فورمۋليارعا ەنگىزۋ تالاپتارىنىڭ تولىق ساقتالۋىن قامتاماسىز ەتەدى.
كەڭەس سوڭىندا ەرمەك كوشەرباەۆ پرەزيدەنت تاپسىرماسىن ىسكە اسىرۋدا بارلىق مەملەكەتتىك ورگانداردىڭ ۇيلەسىمدى جۇمىسىنىڭ ماڭىزدىلىعىن اتاپ ءوتتى. ونىڭ ايتۋىنشا, دارىلىك قاۋىپسىزدىك پەن پرەپاراتتاردىڭ قولجەتىمدىلىگى – حالىق دەنساۋلىعىن نىعايتۋعا باعىتتالعان مەملەكەتتىك ساياساتتىڭ نەگىزگى باسىمدىقتارىنىڭ ءبىرى.