اقش-تىڭ بىرقاتار ءىرى قالاسىندا دونالد ترامپ اكىمشىلىگىنىڭ زاڭسىز ميگرانتتارعا قاتىستى ارەكەتتەرىنە قارسى باعىتتالعان جاپپاي نارازىلىق شەرۋلەرى ءوتتى, دەپ جازادى Egemen.kz.
كاليفورنيادا باستاۋ العان دەمونستراتسيالارعا نيۋ-يورك, تەحاس, دجوردجيا جانە كەنتۋككي سياقتى وزگە دە شتاتتاردان تۇرعىندار قوسىلدى. نيۋ-يوركتەگى Trump Tower عيماراتىنىڭ الدىندا وتكەن شاعىن ميتينگ بارىسىندا شەرۋشىلەر «ميگرانتتاردى قايتارىڭدار!» دەپ ۇرانداتتى.
قالادا نارازىلىق شارالارى كەزىندە بىرنەشە ادام تۇتقىندالدى.
نيۋ-يورك اكىمى ەريك ادامس «ح» الەۋمەتتىك جەلىسىندە زورلىق-زومبىلىققا جول بەرمەۋ قاجەتتىگىن ەسكەرتىپ: «نيۋ-يورك – بەيبىت نارازىلىق وتكىزۋگە بولاتىن قالا, بىراق ءبىز تارتىپسىزدىك پەن زاڭسىزدىققا توزبەيمىز», دەدى.
مۇنىمەن قاتار تەحاستىڭ داللاس قالاسىندا 400-گە جۋىق ادام ميتينگكە شىقسا, وستين قالاسىندا دا جۇزدەگەن تۇرعىن شەرۋگە قاتىسقان. كەنتۋككيدىڭ لۋيسۆيلل قالاسىندا «بىرنەشە ءجۇز» ادام ورتالىق الاڭعا جينالىپ, دجوردجيا شتاتىنداعى اتلانتا قالاسىندا اقش-تىڭ كوشى-قون جانە كەدەن قىزمەتى (ICE) كەڭسەسىنىڭ الدىنا ونداعان ادام جينالدى.
ايتا كەتەيىك, كاليفورنياداعى تارتىپسىزدىكتەر ICE مەكەمەسىنىڭ وسى وڭىردە جۇرگىزگەن انتيميگراتسيالىق رەيدتەرىنەن كەيىن ءورشىپ كەتكەن. لوس-اندجەلەس ماڭىندا ءبىر اپتا ىشىندە 118 ادام ميگراتسيالىق زاڭنامانى بۇزدى دەگەن كۇدىكپەن ۇستالعان.
9 ماۋسىم كۇنى سان-فرانتسيسكو قالالىق پوليتسياسى (SFPD) 60-قا جۋىق ادامدى ۇستاعانىن مالىمدەدى. باستاپقىدا بەيبىت سيپاتتا وتكەن نارازىلىق جيىنىنىڭ بارىسىندا شەرۋشىلەردىڭ ارەكەتى اگرەسسياعا ۇلاسقان. قۇقىق قورعاۋ ورگاندارى «قوعامدىق ءتارتىپتى بۇزۋ, شابۋىل جاساۋ, م ۇلىكتى ءبۇلدىرۋ سىندى قۇقىقبۇزۋشىلىقتار» تىركەلگەنىن حابارلادى. وسىدان كەيىن شەرۋدى زاڭسىز دەپ جاريالاعان. سول كۇنى لوس-اندجەلەس پوليتسياسى دا 56 ادامنىڭ تۇتقىندالعانىن راستادى.