ەلىمىز مۇناي مەن گازدىڭ ءىرى ءوندىرۋشىسى, الايدا وڭدەۋ الەۋەتى ءالى دە تومەن. ەستە بولسا 2007 جىلى مۇناي-گاز حيمياسى سالاسىن دامىتۋ ماقساتىندا ارنايى ەكونوميكالىق ايماق (اەا) قۇرىلدى. اۋماعى 3 615 گەكتار جەردى الىپ جاتقان اەا-دا 3 نەگىزگى الاڭ بار – قاراباتان, تەڭىز جانە تەحنوپارك.
«قاراباتاندا كىرمە اۆتوموبيل جولدارى, تەمىرجول ۆوكزالى, 310 مۆت بۋ-گاز ەلەكتر ستانساسى, سۋ دايىنداۋ مەن جالپى زاۋىتتىق ينفراقۇرىلىم نىساندارى سالىندى. بۇگىندە ايماقتا 18 قاتىسۋشى تىركەلگەن. ولاردىڭ قاتارىندا پوليپروپيلەن سينتەتيكالىق كاۋچۋك جانە بۋتاديەن, سونداي-اق پلاستيكالىق بۇيىمدار مەن گەوسينتەتيكالىق ماتەريالدار وندىرەتىن كاسىپورىندار شىعارۋ جونىندەگى ءىرى جوبالار بار», دەيدى ەنەرگەتيكا ءمينيسترى ەرلان اقكەنجەنوۆ.
تەحنوپارك الاڭى مۇناي حيمياسى شيكىزاتى, ونىڭ ىشىندە پوليەتيلەنتەرەفتالات جانە تەرەفتال قىشقىلى نەگىزىندە ءونىم شىعاراتىن شاعىن جانە ورتا كاسىپورىنداردى ورنالاستىرۋعا ارنالعان. تەڭىز الاڭى پوليەتيلەن جوباسىن شيكىزاتپەن قامتاماسىز ەتەتىن گاز ءبولۋ كەشەنىن ورنالاستىرۋعا باعدارلانعان.
2022 جىلى قاراشادا جىلىنا 500 مىڭ توننا پوليپروپيلەن وندىرەتىن KPI زاۋىتى ىسكە قوسىلدى. 2024 جىلدىڭ قورىتىندىسىندا زاۋىت 250 مىڭ توننا ءونىم ءوندىردى. قازىر زاۋىت قاپشىق, تۇتىنۋشىلىق ورامال, كىلەم بۇيىمى, ءبىر رەت قولدانىلاتىن ىدىستار جانە باسقا دا ونىمدەردى وندىرۋگە ارنالعان پوليپروپيلەننىڭ 12 ماركاسىن شىعارادى.
ەندى جىلىنا 1,25 ملن توننا پوليەتيلەن وندىرەتىن زاۋىتتىڭ قۇرىلىسىن جۇزەگە اسىرۋ جۇمىستارى جالعاسىپ جاتىر. زاۋىتتىڭ ىسكە قوسىلۋى 2029 جىلعا جوسپارلانعان.
«سونداي-اق اقتوبە وبلىسىندا كارباميد ءوندىرىسى قولعا الىندى. ول 2029 جىلى ىسكە قوسىلادى. اقتاۋداعى اممياك-كارباميد كەشەنى دە سول جىلى جۇمىسىن باستايدى. الكيلات ءوندىرىسى – 2027, پوليەتيلەنتەرەفتالات (پەتف) ءوندىرىسى – 2029, بۋتاديەن ءوندىرىسى 2028 جىلى باستالادى. جوبالار بازالىق جوبالاۋ قۇجاتتاماسىن ازىرلەۋدەن باستاپ قارجىلاندىرۋ تەتىكتەرىن پىسىقتاۋعا دەيىنگى ءارتۇرلى ساتىدا تۇر», دەدى مينيستر.