ءۇش ايعا سوزىلاتىن كانيكۋل كۇندەرىن قىزىقتى دا مازمۇندى وتكىزۋ ءۇشىن وبلىستىق ءبىلىم باسقارماسى ون مەملەكەتتىك مەكەمەمەن بىرلەسە ءىس-شارالار جوسپارىن قۇردى. بىرنەشە باعىتتى قامتيتىن دەمالىس جوسپارىنا قاسيەتتى ورىندار مەن كورىكتى جەرلەرگە ساياحات, اسكەري-پاتريوتتىق تاربيە, ەڭبەك جاساعى دا كىرەدى. وعان وڭىردەگى 1-10 سىنىپ ارالىعىنداعى 175 مىڭ وقۋشىنىڭ باسىم بولىگى قامتىلادى دەپ جوسپارلاندى. بيىل وقۋشىلاردىڭ دەمالىسىنا جەرگىلىكتى بيۋدجەتتەن 228,1 ملن تەڭگە ءبولىندى.
كوپشىلىك اتا-انا بالالارىنا تابيعات اياسىنداعى دەمالىس ورىندارىن قالايدى. بۇل باعىتتا اقتوبە قالاسىنىڭ سىرتىندا ورنالاسقان جەتى لاگەردىڭ ەسىگى تامىز ايىنىڭ سوڭىنا دەيىن اشىق تۇرادى. قالا سىرتىنداعى لاگەرلەردەگى ورتاشا جولداما قۇنى 80-100 مىڭ تەڭگەگە تەڭ. وسى جاعىنان قالاداعى كەي ءوندىرىس ورىندارىنىڭ باستاۋىش كاسىپوداق ۇيىمدارى قىزمەتكەرلەرىنىڭ بالالارىنا جولداما ساتىپ الۋدى داستۇرگە اينالدىرعان.
بيىلعى جازدا «قازاقستان حالقىنا» قوعامدىق قورى كۆوتاسىمەن اقتوبە وبلىسىنىڭ 285 وقۋشىسى ەلىمىزدىڭ كورىكتى جەرلەرىندەگى دەمالىس ورىندارىنا ساياحاتتايدى. ولاردىڭ اراسىندا رەسپۋبليكالىق وليمپيادا جەڭىمپازدارى, كوپبالالى وتباسىلاردىڭ بالالارى بار. ەڭبەككە ارالاسۋدى ۇناتاتىن جەتكىنشەكتەر «جاسىل ەل» جاساعى مەن «سپارتا» شارۋا قوجالىعىنىڭ قاربىز, قۇلپىناي القاپتارىندا جۇمىس ىستەپ, قاراجات تابۋىنا مۇمكىندىك جاسالىندى. جازعى ەڭبەك جاساعىنا تارتىلاتىن 716 وقۋشىنىڭ باسىم كوپشىلىگى ويىل, قوبدا اۋدانىنىڭ بالالارى.
اقتوبە وبلىسى