كەشە ورتالىق كوممۋنيكاتسيالار قىزمەتىندە «بالالارعا قاتىستى زورلىق-زومبىلىق, قاتىگەزدىكتىڭ الدىن الۋ ماسەلەلەرى بويىنشا مەملەكەتتىك ورگاندار مەن ۇكىمەتتىك ەمەس ۇيىمداردىڭ ىنتىماقتاستىعى تۋرالى» تاقىرىبىندا بريفينگ ءوتىپ, وندا بالالارعا كورسەتىلەتىن زابىرلەر مەن زورلىق-زومبىلىقتاردىڭ الدىن الۋ ماسەلەلەرى جان-جاقتى تالقىلاندى.
بۇل جولى بۇقارالىق اقپارات قۇرالدارى وكىلدەرىنىڭ الدىنا «SOS قازاقستاننىڭ بالالار اۋىلى» كورپوراتيۆتىك قورىنىڭ ديرەكتورى باتىرحان جەنالاەۆ, «SOS استانانىڭ بالالار اۋىلى» باعدارلاماسىنىڭ ديرەكتورى زاۋرەش ارىستانوۆا جانە قر بعم بالالار قۇقىعىن قورعاۋ كوميتەتىنىڭ باس ساراپشىسى گۇلميرا قۇلساريەۆا شىقتى. رەتى كەلگەندە ايتا كەتۋ كەرەك, «SOS بالالار اۋىلى» 132 ەلدە بولسا, قازاقستان ونىڭ قۇرامىنا 1993 جىلدان باستاپ كىرگەن. قازىرگى تاڭدا بالالار اۋىلدارى استانا, الماتى جانە تەمىرتاۋ قالالارىندا جۇمىس ىستەۋدە. بالالار قۇقىعىن قورعاۋ كوميتەتىنىڭ باس ساراپشىسىنىڭ سوزىنە قاراعاندا, جالپى ەلىمىزدە بۇگىنگى تاڭدا بالالار ماسەلەلەرىمەن اينالىساتىن 400-گە تارتا ءارتۇرلى قوعامدىق بىرلەستىك تىركەلگەن. بالالار قۇقىعىن قورعاۋ كوميتەتى جانىنان ۇكىمەتتىك ەمەس ۇيىمداردىڭ ۇيلەستىرۋ كەڭەسى دە جۇمىس ىستەيدى. ونىڭ قۇرامىنا 37 ۇەۇ كىرىپ وتىر.
سونداي-اق, بۇل قوعامدىق بىرلەستىكتەر كامەلەت جاسىنا جەتپەگەندەر ىستەرى جانە ولاردىڭ قۇقىعىن قورعاۋ جونىندەگى ۆەدومستۆوارالىق كوميسسيا قۇرامىندا ەكەندىگىن دە ايتا كەتكەن ءجون. اتالعان ورگان ۇكىمەت جانىنان قۇرىلعان, بارلىق ۇكىمەتتىك ەمەس ۇيىمدارمەن مەموراندۋمدارعا قول قويىلعان. «ەۋرازيا – ورتالىق ازيا» قورى ارقىلى بالالار ۇيىنەن شىققانداردىڭ ومىرگە بەيىمدىلىگى جونىندەگى الەۋمەتتىك زەرتتەۋلەر ورىن العاندىعى دا اتالماي قالمادى. سونىمەن قاتار, «زياتكەرلىك ەڭبەك وداعى» قوعامدىق بىرلەستىگى تاراپىنان بالالار ەڭبەگىن قاناۋعا جول بەرمەۋ ماقساتىندا جىل سايىن «بالا ەڭبەگىمەن كۇرەستىڭ 12 كۇنى» ۇلتتىق كامپانياسى جۇرگىزىلىپ كەلەدى. «ايەلدەر ليگاسىنىڭ شىعارماشىلىق باستاماسى» قوعامدىق بىرلەستىگىمەن وتباسىنى قولداۋ باعدارلاماسى دا جۇزەگە اسىرىلۋدا ەكەن. «SOS قازاقستاننىڭ بالالار اۋىلى» كورپوراتيۆتىك قورىنىڭ ديرەكتورى باتىرحان جەنالاەۆتىڭ ايتۋىنشا, بالالارعا قارسى زورلىق-زومبىلىق پەن قاتىگەزدىك ماسەلەسى الەمدە وتكىر تۇر. مۇنداي پروبلەما تەك مەملەكەتكە عانا قاتىستى ەمەس, سونىمەن قاتار, قوعامدى دا تولعاندىرار ماسەلە. سوندىقتان دا ۇكىمەتتىك ەمەس ۇيىمدار مەن كوممەرتسيالىق ەمەس سەكتورعا ۇلكەن ءۇمىت ارتىلىپ وتىر.
ءسوز رەتى كەلگەندە, قور ديرەكتورى ءوزى باسقاراتىن قوردىڭ حالىقارالىق ۇيىم قۇرامىنا كىرگەنىمەن, قازاقستاندىق بالالاردىڭ بولاشاعى ءۇشىن جۇمىس جاساپ جاتقاندىعىن العا تارتتى. ول اتالعان قوردىڭ 1993 جىلى قۇرىلعاندىعىن, ال 1997 جىلدان الماتى قالاسىنداعى العاشقى بالالار اۋىلى اشىلعانىن, بۇگىندە ولارداعى بالالار سانى 67-دەن 1200-گە دەيىن كوبەيگەندىگىن اتاپ ءوتتى. ەندى بۇل بالالار 22 جوبا مەن باعدارلامالار ارقىلى قورعالۋدا ەكەن. ونىڭ سوزىنە قاراعاندا, بالالاردى قورعاۋعا ارنالعان بىرقاتار زاڭدار دا قابىلدانعان. ال «SOS استانانىڭ بالالار اۋىلى» باعدارلاماسىنىڭ ديرەكتورى زاۋرەش ارىستانوۆا ءوز كەزەگىندە بالالار اۋىلى مەن ۇيلەرىندە ورىن الىپ جاتقان جاعدايلاردىڭ بارلىعىنا مونيتورينگ جۇرگىزىلەتىنىن, بالالارعا كورسەتىلگەن زورلىق-زومبىلىقتار مەن قاتىگەزدىكتەرگە قاتىستى مالىمەتتەر بازاسى بار ەكەندىگىن دە ورتاعا سالا كەتتى. ەلورداداعى بالالارعا قاتىستى زورلىق-زومبىلىق ماسەلەسى باسەڭ تارتقانىن جەتكىزگەن ز.ارىستانوۆا مۇنداي كەلەڭسىزدىكتەر تۇرمىسى ناشار وتباسىلاردا ءجيى كورىنىس بەرەتىنىنە نازار اۋداردى. سوندىقتان وسىنداي زورلىق-زومبىلىقتاردىڭ الدىن الۋ ءۇشىن كوپتەگەن شارۋالاردى اتقارۋ ماسەلەسى كۇتىپ تۇر.
اسقار تۇراپباي ۇلى,
«ەگەمەن قازاقستان».