بيدايىق اۋىلىنىڭ تۇرعىنى عاليا وتارباەۆا ءبىراز ۋاقىت بۇرىن «اۋىل اماناتى» باعدارلاماسى اياسىندا 9 300 000 تەڭگە جەڭىلدەتىلگەن نەسيە راسىمدەپ, وعان 30 باس ءىرى قارا مال مەن 10 توننا ءشوپ ازىعىن ساتىپ الدى. سيىر ساۋعا ارنالعان اپپاراتتى الۋعا جەكە قارجىسىن جۇمساعان. وسىلايشا, ءتيىمدى مەملەكەتتىك قولداۋ ناتيجەسىندە بەرەكەلى كاسىپكە بەلسەنە كىرىسكەن ەدى.
ساتىپ العان ءىرى قارا بيىل ەكىنشى جىل بۇزاۋلادى. تاڭعى جانە كەشكى التىدا 30 سيىردى ساۋىپ, ءسۇت ونىمدەرىن دايىندايدى. ءسۇتىن تارتىپ, قايماعىن الىپ, مايىن شايقاپ, ساۋداعا شىعارادى. شىققان كوك سۇتىنەن اق ىرىمشىك, سارى ىرىمشىك جاساپ, قۇرت قايناتادى. سارىمايدىڭ كيلوسى 6–6,5 مىڭ تەڭگە بولسا, ءسۇتتىڭ ءبىر ءليترىنىڭ باعاسى 180–200 تەڭگە ارالىعىندا.
عاليانىڭ ءۇيى قىزىلوردا – پاۆلودار تاسجولىنىڭ ىرگەسىندە ورنالاسقان. بۇل دا ساۋدانىڭ ءساتتى جۇرۋىنە سەبەپشى. ءدامىن تاتىپ, قىزىعۋشىلىعى ارتىپ, تۇراقتى كليەنتىنە اينالعان تۇتىنۋشىلار قانشاما.
وتباسىنىڭ ۇيىتقىسى بولىپ وتىرعان عاليا امانتايقىزى بىزبەن اڭگىمەسىندە «ەرىنبەي ەڭبەك ەتكەن ادامعا عانا قۇت قونىپ, ىرىسى ارتادى» دەدى. ءتورت بالا وسىرگەن انا ۇلىن ۇياعا, قىزىن قياعا قوندىرعان. ولاردان تاراعان سەگىز نەمەرەسى بار. قولىنداعى ۇلى مەن كەلىنى كاسىبىنە قولعابىس ەتەدى. كاسىپ يەسىنىڭ جوسپارى دا اۋقىمدى. الداعى ۋاقىتتا مال باسىن ارتتىرىپ, شارۋاشىلىق اياسىن كەڭەيتسەم دەگەن نيەتى بار.
ۇلىتاۋ وبلىسى,
جاڭاارقا اۋدانى