ماڭعىستاۋ وبلىسىندا قازاقستان رەسپۋبليكاسى پرەزيدەنتى جانىنداعى ورتالىق كوممۋنيكاتسيالار قىزمەتىنىڭ فيليالى اشىلىپ, العاشقى جۇمىس كۇنىن باستادى. بۇعان دەيىن ەلىمىزدىڭ بەس وڭىرىندە ىسكە قوسىلعان مۇنداي ورتالىقتار جىل سوڭىنا دەيىن بارلىق وبلىستارىندا اشىلادى دەپ كۇتىلۋدە.
مۇنايلى ايماقتاعى ورتالىقتىڭ تۇساۋكەسەرىنە «100 ناقتى قادام» ۇلت جوسپارى باعدارلاماسىن جۇزەگە اسىرۋ اياسىنداعى ماڭعىستاۋ وبلىسىنىڭ ەكونوميكالىق دامۋى سىندى سالماقتى تاقىرىپ وزەك بولدى.
وڭىردەگى بۇقارالىق اقپارات قۇرالدارى وكىلدەرى الدىندا ماڭعىستاۋ وبلىسى اكىمىنىڭ ورىنباسارى ش.يلمۋحامبەتوۆا, وسى وبلىستىڭ كاسىپكەرلىك جانە ساۋدا باسقارماسىنىڭ باسشىسى ۆ.مۇستاپاەۆا مەن جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى گ.قالمۇراتوۆا, سونداي-اق, «اقتاۋ حالىقارالىق تەڭىز-ساۋدا پورتى» ۇك» اكتسيونەرلىك قوعامىنىڭ پرەزيدەنتى م.يالباچەۆ ءتيىستى سالالارداعى جاسالىپ جاتقان جۇمىستار تۋرالى بايانداپ, جۋرناليستەر تاراپىنان قويىلعان سۇراقتارعا جاۋاپ بەردى. ەلىمىزدە جاسالىپ جاتقان الۋان جۇمىستار مەن اۋقىمدى جوسپار-جوبالاردىڭ, باعدارلامالاردىڭ تۇپكى ماقساتى مەن نەگىزى – مەملەكەت باسشىسى ن.نازارباەۆتىڭ باستاماسىمەن تاۋەلسىز قازاقستاندى ودان ءارى جانە جان-جاقتى دامىتا وتىرىپ, ەلىمىزدىڭ الدىڭعى قاتارلى دامىعان ساناۋلى ەلدەردىڭ اراسىنان ءوز ورنىن الۋىنا جەتكىزۋدە جاتىر. بۇل باعىتتاعى جۇمىستاردىڭ جولباسشىسىنداي بولعان ءتۇرلى مەملەكەتتىك باعدارلامالار مەن جىل سايىنعى ەلباسى جولداۋىنىڭ ءىزباسارى سىندى «100 ناقتى قادام» مىندەتتەمەلىك باعدارلاماسى قازىر رەسپۋبليكا كولەمىندە قىزۋ قولداۋعا يە بولۋدا. باعدارلامادا مەملەكەتتىك كاسىبي اپپاراتتان باستاپ, سوت بيلىگى, ەسەپ بەرەتىن مەملەكەتتى قالىپتاستىرۋ جانە ۇلان-عايىر قازاق دالاسىن مەكەندەگەن كوپ ۇلتتىڭ ءوزارا بەيبىتشىلىك ءۇشىن تىلەك, جاسامپاز ەڭبەك ءۇشىن بىلەك قوسا الاتىن اۋىزبىرلىگىن, تاتۋلىعىنا دەيىن ناقتى ايتىلىپ, ارنايى تاپسىرمالار بەرىلدى. ءبىزدىڭ وتانداستارىمىز ءۇشىن ەندى باعدارلاما سىلتەۋ بەرگەن سۇبەلى تاپسىرمالاردى بۇلجىتپاي جانە ءمىنسىز ورىنداۋ مىندەتى تۇر. بارلىق ايماقتاردىڭ, بارلىق سالالىق قۇرىلىمداردىڭ ءوز ىشىندەگى جۇمىسىن وسى باعدارلامادا ايتىلعان ءمىندەتتەر مەن تاپسىرمالارعا ساي يكەمدەپ, ونى جۇزەگە اسىرۋ ءۇشىن جۇمىستانىپ جاتقانى بەلگىلى. جۋرناليستەرمەن وتكەن ءباسپاسوز ءماسليحاتىندا ماڭعىستاۋ وبلىسىنىڭ ەكونوميكالىق دامۋ قارقىنى باياندالىپ, ەلباسى ۇسىنعان اتالعان باعدارلامانى جۇزەگە اسىرۋ ءۇشىن جاسالىنار الداعى جۇمىستاردىڭ بارىسى اڭگىمەلەندى. مەملەكەت باسشىسى نۇرسۇلتان نازارباەۆتىڭ تاپسىرماسىنا وراي, وڭىردە «100 ناقتى قادام» اياسىندا يندۋستريالاندىرۋ جۇمىسى بەلسەندى ءجۇرىپ جاتىر دەۋگە بولادى. 2015-2016 جىلدارى وڭىرىمىزدە 21 ينۆەستيتسيالىق جوبا ىسكە قوسىلادى دەپ جوسپارلانعان بولاتىن, بۇل جوبالاردىڭ 16-سى بيىل ىسكە قوسىلادى دەپ كۇتىلۋدە, – دەدى ماڭعىستاۋ وبلىسى اكىمىنىڭ ورىنباسارى ش.يلمۋحامبەتوۆا. قازىرگى تاڭدا سولتۇستىك باعىتتا كەڭەيتۋ جۇمىستارى قارقىندى سيپات العان «اقتاۋ حالىقارالىق تەڭىز-ساۋدا پورتىندا» بۇل جوبا سوڭعى دەڭگەيىنە, ياعني اياقتالۋعا جەتىپ قالدى. بيىل جىل سوڭىنا دەيىن نەمەسە 2016 جىلدىڭ باسىندا اياقتالاتىن جوبا تەڭىزدەگى تاسىمالدى 3 ملن. تونناعا دەيىن ارتتىراتىن بولادى. سونداي-اق, «اقتاۋ حالىقارالىق تەڭىز-ساۋدا پورتىنىڭ» باسشىسى م.يالباچەۆ ءدال وسى كۇنى قازاقستان, گرۋزيا, ازەربايجان, تۇركيا, قىتاي مەملەكەتتەرىنىڭ پورت قىزمەتكەرلەرى مەن كەمە يەلەرىنىڭ ورتاق جۇمىستى ۇيلەستىرۋ ناتيجەسىندە اقتاۋ پورتىندا العاش رەت كونتەينەرلى پويىز قازاقستان پورتىنان ەۋروپاعا قاراي اتتاناتىندىعىن جەتكىزدى. ءباسپاسوز ءماسليحاتىندا جۋرناليستەر جانە ونلاين-رەجىمدە استانا, اتىراۋ قالاسىنداعى قاتىسۋشىلار الەمدىك ەكونوميكالىق داعدارىستىڭ ءوڭىر ەكونوميكاسىنا اسەرى, رەسپۋبليكالىق ماڭىزداعى بەينەۋ – اقتاۋ اۆتوكولىك جولىنىڭ, جاڭاوزەن – اقتاۋ جولىنىڭ قۇرىلىسى, ايماقتى سۋمەن قامتاماسىز ەتۋ جايلارىمەن بىرگە, وڭىردەگى كاسىپورىنداردا قىسقارتۋلاردىڭ, سونداي-اق, ەڭبەك داۋلارىنىڭ بار-جوقتىعى, مۇناي باعاسى تومەندەۋىنىڭ اسەرى, كاسىپكەرلىكتى قولداۋ مەن جۇمىسپەن قامتۋ, شەتەلدىكتەردىڭ جۇمىسقا ورنالاسۋى, ت.ب. سۇراقتارعا جاۋاپ الدى.
گۇلايىم شىنتەمىرقىزى, «ەگەمەن قازاقستان».
ماڭعىستاۋ وبلىسى. سۋرەتتى تۇسىرگەن سەرىك مايەمەروۆ.