استانادا اۆتوبۋس جول اپاتىنا ۇشىراپ, 15 ادام زارداپ شەكتى. ۇشەۋى اۋرۋحاناعا جاتقىزىلدى, بىرىنە اياق امپۋتاتسياسى جاسالدى دەپ حابارلايدى Egemen.kz.
استانا قالاسىنىڭ قوعامدىق دەنساۋلىق ساقتاۋ باسقارماسى اۆتوبۋسپەن بولعان جول-كولىك وقيعاسىندا جاراقات العان جولاۋشىلاردىڭ جاعدايى تۋرالى جاڭارتىلعان اقپارات تاراتتى.
جەدەل جاردەم بريگادالارى ءتۇرلى جاراقات العان 15 ادامدى قالانىڭ مەديتسينالىق مەكەمەلەرىنە جەتكىزدى. ولاردىڭ ۇشەۋى اۋرۋحاناعا جاتقىزىلدى, قالعاندارىنا العاشقى مەديتسينالىق كومەك كورسەتىلىپ, ۇيلەرىنە جىبەرىلدى.
- اۋرۋحاناعا تۇسكەندەردىڭ جاعدايى اۋىر دەپ باعالانىپ وتىر. ءبىر ناۋقاسقا تومەنگى اياقتىڭ امپۋتاتسياسى جاسالدى. بارلىق زارداپ شەككەندەرگە تولىق كولەمدە قاجەتتى مەديتسينالىق كومەك كورسەتىلىپ جاتىر, - دەلىنگەن باسقارمانىڭ حابارلاماسىندا.
ەسكە سالا كەتەيىك, جول اپاتى 2 ماۋسىمدا استانانىڭ رەسپۋبليكا داڭعىلىندا بولعان. مارشرۋتتىق اۆتوبۋس جول بەلگىلەرىنىڭ تىرەگىنە سوعىلعان. الدىن الا مالىمەت بويىنشا, جاراقات العانداردىڭ ەكەۋى ۇلتتىق جەدەل مەديتسينالىق ۇيلەستىرۋ ورتالىعىنا جەتكىزىلگەن.
جانەل تولەۋبەكوۆا, ەۇۋ ستۋدەنتى