اقپاراتتار اعىنى

 سوڭعى ايدا قازاقستاندا ونەركاسىپ جانە ازىق-ت ۇلىك ونىمدەرىنىڭ باعاسى ارزاندادى. ستاتيستيكا كوميتەتىنىڭ مالىمەتىنشە, 2015 جىلعى شىلدەدە ماۋسىم ايىمەن سالىستىرعاندا, تاۋ-كەن ونەركاسىبىندەگى باعالار 1,5 پايىزعا, وڭدەۋ ونەركاسىبىندەگى باعالار 0,7 پايىزعا ارزاندادى. وندىرىستىك ونىمدەر باعاسى 1,2 پايىزعا تومەندەدى, ال وندىرىستىك سيپاتتاعى قىزمەتتەر باعاسى 1,2 پايىزعا قىمباتتادى.  باس پروكۋراتۋرا قۇقىق قورعاۋ ورگاندارىن رەفورمالاۋ ماسەلەلەرى جونىندەگى ينتەرنەت-سايتتى ىسكە قوستى. ەندى اتالعان سايت مەملەكەت باسشىسى جاريالاعان بەس ينستيتۋتتىق رەفورمالاردى جانە «100 ناقتى قادام» ۇلت جوسپارىن جۇزەگە اسىرۋ بويىنشا ماقساتتى تۇردە جۇمىس جۇرگىزەتىن بولادى. ىسكە قوسىلعان پورتالعا (www. pro.kz) كەز كەلگەن ازامات قۇقىق قورعاۋ جۇيەسىن رەفورمالاۋ جانە زاڭنامانى جەتىلدىرۋ بويىنشا ءوز ۇسىنىستارىن قالدىرا الادى.  استاناداعى «ساراندا» شاعىن اۋدانىندا 240 ورىندىق بالالار باقشاسى اشىلدى. ءبىلىم سالاسىنىڭ ماماندارى بۇل قالاداعى بالاباقشا كەزەگىن ازايتادى دەگەندى ايتۋدا. جاڭا ورتالىقتىڭ باستى ەرەكشەلىگى, عيمارات ەدەنى ارقىلى جىلىتىلادى. سونداي-اق, شكافتاردا كيىمدەر مەن اياقكيىمدەردى كەپتىرۋگە بولادى.  الماتى وبلىسىنداعى ءىرى كونديتەرلىك كومپانيا – «الماتى ءونىمى» ايىنا 800 تونناعا دەيىن ءتاتتى ءونىم شىعارۋعا كىرىستى. قازىر مۇنداعى ەكى تسەحتا 480 ادام جۇمىس ىستەيدى. كاسىپورىن ءتاتتى تاعام ءتۇرىن وندىرەتىن ورتالىق ازياداعى ەڭ ءىرى زاۋىت بولىپ ەسەپتەلەدى.  قاراعاندى وبلىسىنىڭ تاۋار وندىرۋشىلەرى ەكسپو نىساندارى قۇرىلىسى بويىنشا جاسالعان كەلىسىمشارتتار سوماسىن 6 ملرد.-تان استام تەڭگەگە جەتكىزدى. وبلىستىق ونەركاسىپ جانە يندۋستريالىق-يننوۆاتسيالىق دامىتۋ باسقارماسىنىڭ حابارلاۋىنشا, ەكسپو-2017 نىساندارىن سالاتىن مەردىگەر كومپانيالار ايماقتاعى 12 كاسىپورىنمەن 15 كەلىسىمشارتقا قول قويعان.  پاۆلودار وبلىسىنىڭ جەلەزينكا اۋدانىندا اعاش وڭدەيتىن جاڭا كومبينات ىسكە قوسىلدى. مۇندا تەك قايىڭ اعاشى وڭدەلەدى. كومبيناتتىڭ اشىلۋى شاعىن اۋىلدىڭ تامىرىنا قان جۇگىرتكەندەي اسەر بەرىپ وتىر. قازىرگى كۇنى 37 تۇرعىن تۇراقتى جۇمىسپەن قامتىلدى.  پەتروپاۆل اۋەجايىندا ۇشۋ-قونۋ الاڭدارىن جوندەۋ جۇمىستارى باستالدى. وندا ۇشۋ-قونۋ جولاعىن قالىڭدىعى 10 سم بولاتىن اسفالتتى بەتونمەن جابۋ, ونى 300 مەترگە ۇزارتۋ, 18 مەترگە كەڭەيتۋ, سونىمەن قاتار, ۇشۋ جولى مەن پەرروندى قالىپقا كەلتىرۋ جۇمىستارى جۇرگىزىلەدى. وسىعان وراي, قۇرىلىس اياقتالعانعا دەيىن بۇل اۋەجاي ارقىلى ۇشۋ-قونۋ توقتاتىلدى. حابارلار ۇكىمەت, وبلىستىق اكىمدىكتەر سايتتارى, «قازاقپارات» اگەنتتىگى جانە «24kz» تەلەارناسىنىڭ دەرەكتەرى بويىنشا دايىندالدى.