قاراعاندى وبلىسىندا ەكى جاسار بالا جۇك پويىزىنىڭ استىنا ءتۇسىپ, اۋىر جاراقات العان. قازىر ءبۇلدىرشىن اۋىر جاعدايدا وبلىستىق بالالار اۋرۋحاناسىنىڭ جانساقتاۋ بولىمىندە جاتىر, دەپ حابارلايدى Egemen.kz.
وقيعا «قاراعاندى — اقادىر» تەمىرجول ۋچاسكەسىندەگى «قاراعانوزەك — قاراباس» وتكەلىندە بولعان.
«قازاقستان تەمىر جولى» ۇلتتىق كومپانياسىنىڭ حابارلاۋىنشا, پويىز ءماشينيسى رەلسكە شىققان بالانى بايقاپ, دەرەۋ شۇعىل تەجەگىشتى قولدانعان. سوعان قاراماستان, بالا جاراقات العان.
قاراعاندى وبلىستىق دەنساۋلىق ساقتاۋ باسقارماسىنىڭ مالىمەتىنشە, زارداپ شەككەن بالا اۋىر حالدە اۋرۋحاناعا جەتكىزىلگەن.
«بالا اۋىر جاعدايدا وبلىستىق بالالار اۋرۋحاناسىنا جەتكىزىلىپ, جانساقتاۋ بولىمىنە جاتقىزىلدى», دەلىنگەن حابارلامادا.
قازىرگى تاڭدا اتالعان فاكتى بويىنشا تەرگەۋ امالدارى جۇرگىزىلىپ جاتىر.