قر پرەمەر-ءمينيسترى ولجاس بەكتەنوۆ ExxonMobil كومپانياسىنىڭ اعا ۆيتسە-پرەزيدەنتى پيتەر لاردەنمەن كەزدەسۋ وتكىزدى.
مۇناي-گاز سالاسىنداعى ىنتىماقتاستىق, ينفراقۇرىلىمدى دامىتۋ جانە وزىق تەحنولوگيالاردى ەنگىزۋ جوسپارلارى تالقىلاندى, ءتۇرلى باعىتتار بويىنشا ءوزارا ءىس-قيمىلدى كەڭەيتۋ پەرسپەكتيۆالارى قارالدى.
كەزدەسۋ بارىسىندا تەڭىز جانە قاشاعان كەن ورىندارىن قوسا العاندا, نەگىزگى بىرلەسكەن جوبالاردىڭ اعىمداعى مارتەبەسى مەن ىسكە اسىرىلۋ بارىسىنا, سونداي-اق كاسپي قۇبىر كونسورتسيۋمىنىڭ قۇبىر جۇيەلەرىن ودان ءارى پايدالانۋعا نازار اۋدارىلدى. اسىرەسە, قازاقستاننىڭ الەمدىك ەنەرگەتيكالىق نارىقتاعى پوزيتسياسىن نىعايتا تۇسەتىن تەڭىز كەنىشىندەگى بولاشاق كەڭەيتۋ جوباسىنىڭ ىسكە قوسىلۋى ەرەكشە اتاپ ءوتىلدى.
پرەمەر-مينيستر تاۋارلار بويىنشا لوكاليزاتسيالاۋ دەڭگەيى جەتكىلىكسىز بولىپ قالاتىن تەڭىز جوباسى شەڭبەرىندە تاۋارلاردى, جۇمىستار مەن كورسەتىلەتىن قىزمەتتەردى ساتىپ الۋداعى جەرگىلىكتى قامتۋ ۇلەسىن ۇلعايتۋ جونىندەگى كۇش-جىگەردى جانداندىرۋ قاجەتتىگىن اتاپ ءوتتى.
تاراپتار قاشاعان كەن ورنىن يگەرۋ كەزەڭدەرىن ىسكە اسىرۋدى, ونىڭ ىشىندە ءوندىرۋ كولەمىن ۇلعايتۋ جانە قۋاتتىلىعى جىلىنا 2,5 ملرد م3 گاز وڭدەۋ زاۋىتىن سالۋ جوسپارلانىپ وتىرعان 2ا كەزەڭىن ىسكە اسىرۋ دايىندىعىن تالقىلادى. 2ب كەزەڭىن ىسكە اسىرۋ بويىنشا جەدەل شەشىم قابىلداۋدىڭ ماڭىزدىلىعى اتاپ ءوتىلدى. جالپى, جوبا ىسكە قوسىلعان ساتتەن باستاپ كەن ورنىندا شامامەن 906 ملن باررەل مۇناي جانە 75 ملرد م3 گاز ءوندىرىلدى, جالپى الىناتىن قورلارى شامامەن 15,885 باررەل مۇناي جانە 1,4 ترلن م3 گازدى قۇرايدى.
بۇدان بولەك, قازاقستاندىق مۇنايدى سىرتقى نارىقتارعا تاسىمالداۋدا شەشۋشى ءرول اتقاراتىن كاسپي قۇبىر كونسورتسيۋمىنىڭ مۇناي قۇبىرىنىڭ تۇراقتى جانە ۇزدىكسىز جۇمىسىن قامتاماسىز ەتۋ ماسەلەلەرى قارالدى.
كەزدەسۋ سوڭىندا تاراپتار سەرىكتەستىكتى نىعايتۋعا جانە ءىرى ينۆەستيتسيالىق جوبالاردى ىسكە اسىرۋعا باعىتتالعان اشىق جانە سىندارلى ديالوگقا دايىن ەكەندىكتەرىن جەتكىزدى.