حالىقارالىق ناشاقورلىققا قارسى كۇرەس كۇنىنە وراي وتكىزىلىپ جاتقان ايلىق اياسىندا قىزىلوردا وبلىسى پوليتسيا دەپارتامەنتىنىڭ ەسىرتكى قىلمىسىنا قارسى ءىس – قيمىل باسقارماسى شەرۋ-اكتسيا ۇيىمداستىردى, دەپ حابارلايدى Egemen.kz
شەرۋلەر قازالى, قارماقشى, جالاعاش, جاڭاقورعان اۋداندارى بويىنشا ءبىلىم بولىمدەرىمەن بىرلەسە ۇيىمداستىرىلدى. اكتسيا بالالار, جاسوسپىرىمدەر مەن جاستار بويىندا پسيحواكتيۆتى زاتتاردى تاراتۋ مەن قولدانۋعا قارسىلىقتى دامىتىپ, سالاۋاتتى جانە قاۋىپسىز ءومىر سالتى داعدىلارىن قالىپتاستىرۋعا ارنالعان.
شەرۋگە قاتىسۋشىلار ەسىرتكىگە قارسىلىققا ۇندەيتىن ترانسپارانتتاردى كوتەرىپ, لەك بولىپ ءوتتى. اكتسيا شەڭبەرىندە ەسىرتكى قىلمىسىنا قارسى ءىس – قيمىل باسقارماسى ۇيىمداستىرعان سايىستاردىڭ جۇلدەگەرلەرى ءوز ونەرلەرىن كورسەتتى. سپورتتىق جارىستار, بي, سۋرەتتەر كورمەسى ۇيىمداستىرىلدى.