شاكارىم ۋنيۆەرسيتەتىندە ابايدىڭ 180 جىلدىق مەرەيتويىنا وراي «ابايدىڭ تولىق ادام ءىلىمى: ۇلتتىق قۇندىلىقتار مەن زاماناۋي كوزقاراس» اتتى رەسپۋبليكالىق جاستار فورۋمى ءوتتى. ايتۋلى ءىس-شارا عىلىم جانە جوعارى ءبىلىم مينيسترلىگىنىڭ باستاماسىمەن ۇيىمداستىرىلدى. وعان ابايتانۋشى عالىمدار, ەلىمىزدەگى جوعارى وقۋ ورىندارىنىڭ باسشىلارى مەن ستۋدەنتتەر قاتىستى.
فورۋم ماقساتى – ابايدىڭ «تولىق ادام» ءىلىمىن جاستار اراسىندا ناسيحاتتاۋ, ۇلتتىق قۇندىلىقتاردى دارىپتەۋ جانە زاماناۋي كوزقاراستارمەن بايلانىستىرۋ.
مازمۇندى جيىننىڭ اشىلۋىندا شاكارىم ۋنيۆەرسيتەتىنىڭ رەكتورى دۋمان ورىنبەكوۆ ءىس-شاراعا قاتىسىپ وتىرعان قاۋىمعا قۇتتىقتاۋ ءسوزىن ارناپ, فورۋم جۇمىسىنىڭ ماڭىزىنا توقتالدى.
«مەملەكەت باسشىسى قاسىم-جومارت توقاەۆ حالىققا جولداۋىندا ابايدىڭ «تولىق ادام» ءىلىمىن جاستاردىڭ زياتكەرلىك تاربيەسىنىڭ وزەگىنە اينالدىرۋ كەرەكتىگىن باسا ايتقان بولاتىن. بۇل ءۇردىس مادەني باستاما رەتىندە ەمەس, جاۋاپتى, كەمەل, ويلى ازاماتتى قالىپتاستىرۋدىڭ ستراتەگيالىق مودەلىنە اينالۋعا ءتيىس. ويتكەنى بۇل – قوعام مەن مەملەكەتتىڭ تۇراقتى دامۋىنىڭ ىرگەتاسى. بۇگىنگى فورۋم حاكىم ابايدىڭ «تولىق ادام» ءىلىمىن ۇلتتىق جانە زاماناۋي تۇرعىدا تەرەڭىرەك ءتۇسىنىپ, ءار قىرىنان تالداپ, ماڭىزىن زەردەلەۋگە ارنالىپ وتىر», دەدى ول. فورۋمنىڭ پلەنارلىق وتىرىسىندا عىلىم جانە جوعارى ءبىلىم مينيسترلىگى جوعارى جانە جوعارى وقۋ ورنىنان كەيىنگى ءبىلىم كوميتەتى توراعاسىنىڭ ورىنباسارى اقەركە ابىلايحانقىزى, نازارباەۆ ۋنيۆەرسيتەتىنىڭ پروفەسسورى گۇلتاس قۇرمانباي, استانا قالاسى بويىنشا سوت اكىمشىلىگى دەپارتامەنتى باسشىسىنىڭ ورىنباسارى قانات وسپانوۆ جانە ابايتانۋشى, اۋەزوۆتانۋشى ءازىمحان يسابەك سىندى عالىمدار حاكىمنىڭ «تولىق ادام» ءىلىمى تۋرالى پاراساتتى ءسوز ساباقتادى.
عالىم گۇلتاس قۇرمانباي ابايدىڭ تاعىلىمى مول قاراسوزدەرى مەن ولەڭدەرىندەگى پالساپالىق وي-تۇجىرىمداردى قازىرگى كۇنمەن ساباقتاستىرا سويلەپ, دالا دانىشپانىنىڭ مۇراسى بۇگىندە تۇتاس ءبىر حالىقتىڭ اداستىرماس تەمىرقازىعى, رۋحاني قاينارى, سارقىلماس قازىناسى بولىپ وتىرعانىن جەتكىزدى. ول اباي ءىلىمىن زەردەلەۋدى جاڭا بەلەسكە كوتەرۋ ءۇشىن جاڭا تەحنولوگياعا بەيىمدەۋىمىز كەرەك دەيدى.
جيىن اياسىندا «اباي جاستارى» جاستار ورتالىعى سەمينار-ترەنينگ وتكىزىپ, «TED talks» فورماتىندا ءوز ويلارىمەن ءبولىستى. سونداي-اق ەڭ بەلسەندى قاتىسۋشىلارعا عىلىم جانە جوعارى ءبىلىم مينيسترلىگىنىڭ العىس حاتى مەن سەرتيفيكاتى تابىس ەتىلدى.
ءىس-شارا سوڭىندا فورۋمعا كەلگەن دەلەگاتسيا وكىلدەرى اباي وبلىسىنىڭ كيەلى ورىندارى – كۇشىكباي مەموريالى, ءبورىلى, سىرت قاسقابۇلاق, جيدەباي, اباي-شاكارىم كەشەنىن ارالاپ, رۋحاني اسەر الدى.