مەملەكەت باسشىسىنىڭ تاپسىرماسى بويىنشا پرەمەر-مينيستر ولجاس بەكتەنوۆ پەن پرەزيدەنت اكىمشىلىگىنىڭ باسشىسى ايبەك دادەباي الماتى قالاسى ءماسليحاتى دەپۋتاتتارىنىڭ جينالىسىنا قاتىستى.
جينالىس بارىسىندا دەپۋتاتتارعا مەملەكەت باسشىسىنىڭ الماتى قالاسىنىڭ اكىمى لاۋازىمىنا ەكى كانديداتتى – پرەزيدەنت اكىمشىلىگى باسشىسىنىڭ ءبىرىنشى ورىنباسارى دارحان ساتىبالدى مەن الماتى قالاسى اكىمىنىڭ ورىنباسارى بەيبىت شاحانوۆتى ۇسىنۋ تۋرالى حاتى وقىلدى.
اشىق داۋىس بەرۋ قورىتىندىسى بويىنشا 32 دەپۋتاتتىڭ 23-ءى دارحان ساتىبالدىنىڭ كانديداتۋراسىنا داۋىس بەردى. بەيبىت شاحانوۆتىڭ كانديداتۋراسىن 9 دەپۋتات جاقتادى.
پرەزيدەنتتىڭ ءتيىستى جارلىعىمەن دارحان ساتىبالدى الماتى قالاسىنىڭ اكىمى بولىپ تاعايىندالدى.
قالا اكتيۆىمەن كەزدەسۋدە پرەمەر-مينيستر مەملەكەت باسشىسى قاسىم-جومارت توقاەۆتىڭ اتىنان ەربولات دوساەۆقا قالانىڭ قارجى-ەكونوميكالىق الەۋەتىن دامىتۋ جونىندەگى بەلسەندى جۇمىسى ءۇشىن العىسىن ءبىلدىردى. 2024 جىلى قالانىڭ قازاقستاننىڭ ءىجو-گە قوسقان ۇلەسى 21,8%-عا دەيىن ءوستى. مەگاپوليستە پرەزيدەنتتىڭ تاپسىرماسى بويىنشا بيۋدجەتتى ورتالىقسىزداندىرۋ, اباتتاندىرۋ, جاڭا الەۋمەتتىك نىساندار سالۋ تاعى باسقا جۇمىستار جۇرگىزىلىپ كەلەدى.
پرەمەر-مينيستر قالا اكتيۆىنە جاڭا اكىم دارحان ساتىبالدىنى تانىستىرا كەلە, مەملەكەت باسشىسىنىڭ الماتى اكىمدىگىنىڭ الدىنا قالانىڭ الەۋمەتتىك-ەكونوميكالىق دامۋىن قامتاماسىز ەتۋ جانە ەكونوميكا قۇرىلىمىن ءارتاراپتاندىرۋ, ينجەنەرلىك ينفراقۇرىلىمدى ودان ءارى جاڭعىرتۋ جانە قوعامدىق كەڭىستىكتەردى كەڭەيتۋ بويىنشا مىندەتتەر قويىلعانىن اتاپ ءوتتى. سونداي-اق جول-كولىك جۇيەسى, ەكولوگيا, وڭدەۋ ونەركاسىبى, تۋريزم, IT-سەكتور, كرەاتيۆتى يندۋستريا سالاسىندا تاپسىرمالار بەرىلدى.